Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 8: Dinatla Lefaseng

Kgaolo 8: Dinatla Lefaseng

GE MOTHO yo a itšego a be a ka tla go wena a go lebantšhitše gomme e le yo motelele go fihla tlhakeng ya ntlo ya geno, o be o tla nagana eng? O be o tla nagana gore motho yoo ke senatla! Ka nako e nngwe, go kile gwa ba le dinatla mo lefaseng. Beibele e bontšha gore botatago tšona e be e le barongwa ba go tšwa legodimong. Eupša seo se ile sa kgonega bjang?

Dinatla tše šoro

Gopola gore morongwa yo mobe e lego Sathane o be a baka mathata. O be a bile a leka go dira gore barongwa ba Modimo e be ba babe. Mafelelong ba bangwe ba barongwa ba ba ile ba thoma go theetša Sathane. Ba ile ba tlogela go dira modiro woo Modimo a bego a ba neile wona legodimong. Ba ile ba tla mo lefaseng gomme ba ikapeša mebele ya batho. Na o a tseba gore ke ka baka la’ng ba ile ba dira se?

Beibele e re ke ka gobane barwa ba ba Modimo ba ile ba bona basadi ba babotse mo lefaseng gomme ba nyaka go phela le bona. Ka gona ba ile ba tla lefaseng ke moka ba nyala basadi bao. Beibele e re seo se be se fošagetše, ka gobane Modimo o dirile barongwa gore ba phele legodimong.

Ge barongwa ba le basadi ba bona ba be ba eba le bana, bana bao ba be ba sa swane le bana ba bangwe. Mathomong ba ka no ba ba be ba bonagala ba swana le bana ba bangwe. Eupša ba ile ba gola ba ba le matla a magolo go fihlela e eba dinatla.

Dinatla tše e be e le tše mpe. Le gona, ka ge e be e le ditšitširipa e bile di na le matla, di be di tlaiša batho. Di ile tša leka go gapeletša motho yo mongwe le yo mongwe gore a swane le tšona ka go dira bobe.

Henoge o be a hwile, eupša ga bjale go be go na le monna yo mongwe lefaseng yo a bego a lokile. Leina la monna yoo e be e le Noa. Ka mehla o be a dira dilo tšeo Modimo a bego a nyaka gore a di dire.

Ka letšatši le lengwe, Modimo o ile a botša Noa gore nako e fihlile ya gore A fediše batho ba babe ka moka. Eupša Modimo o be a tla phološa Noa, lapa la gagwe le diphoofolo tše dintši. Anke re bone kamoo Modimo a dirilego se ka gona.

Genesi 6:1-8; Juda 6.



Dipotšišo

  • Go ile gwa direga’ng ge ba bangwe ba barongwa ba Modimo ba be ba theetša Sathane?
  • Ke ka baka la’ng barongwa ba bangwe ba ile ba tlogela mošomo wa bona legodimong gomme ba tla mo lefaseng?
  • Ke ka baka la’ng go be go fošagetše gore barongwa ba tle mo lefaseng gomme ba ikapeše mebele ya batho?
  • Ke’ng seo bana ba barongwa ba bego ba sa swane ka sona le bana ba bangwe?
  • Bjalo ka ge o bona mo seswantšhong, ke eng seo bana ba barongwa bao ba ilego ba se dira ge ba be ba eba dinatla?
  • Ka morago ga ge Henoge a hwile, ke monna ofe wa go loka yo a ilego a phela mo lefaseng, gona ke ka baka la’ng Modimo a ile a mo rata?

Dipotšišo tša tlaleletšo

  • Bala Genesi 6:1-8.

    Genesi 6:6 e re botša gore boitshwaro bja rena bo ka dira gore Jehofa a ikwe bjang? (Ps. 78:40, 41; Die. 27:11)

  • Bala Juda 6.

    Ke ka tsela efe barongwa bao “ba sa kago ba boloka boemo bja bona bja pele” mehleng ya Noa e lego temošo go rena lehono? (1 Bakor. 3:5-9; 2 Pet. 2:4, 9, 10)