Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 6: Morwa wa go Loka le yo Mobe

Kgaolo 6: Morwa wa go Loka le yo Mobe

BONA Kaine le Abele gona bjale. Ba godile. Kaine ke molemi. O lema mabele, dienywa le merogo.

Kaine le Abele ba direla Modimo dihlabelo

Abele ke modiši wa dinku. O rata go hlokomela dikwana. Di a gola ya ba dinku tše dikgolo gomme Abele o thoma go hlokomela mohlape ka moka wa dinku.

Ka letšatši le lengwe, Kaine le Abele ba ile ba tlišetša Modimo dimpho. Kaine o ile a tliša tše dingwe tša dijo tšeo a di lemilego. Abele yena a tliša dinku tše di nonnego tšeo a bego a na le tšona. Jehofa o ile a kgahlišwa ke Abele le mpho ya gagwe. Eupša ga se a ka a kgahlišwa ke Kaine le mpho ya gagwe. Na o a tseba gore e be e le ka baka la’ng?

E be e se ka gobane mpho ya Abele e phala ya Kaine. E be e le ka gobane Abele o be a lokile. O be a rata Jehofa e bile a rata le ngwanabo. Eupša Kaine e be e le yo mobe; a sa rate ngwanabo.

Ka gona, Modimo o ile a botša Kaine gore o swanetše go fetoša ditsela tša gagwe. Eupša Kaine ga se a ka a theetša. O ile a galefa kudu ka gobane Modimo a be a rata Abele go mo feta. Ke moka Kaine o ile a re go Abele: “A re ye kua nageng.” Ya re ge ba le moo ba nnoši, Kaine a itia Abele ngwanabo. A mo itia ka matla moo a ilego a mmolaya. Na seo e be e se selo se sešoro kudu gore Kaine a ka se dira?

Kaine o a tšhaba ka morago ga go bolaya Abele

Gaešita le ge Abele a ile a hwa, Modimo o sa mo gopola. Abele o be a lokile gomme Jehofa ga a lebale motho yo bjalo. Ka gona ka letšatši le lengwe Jehofa Modimo o tla mo tsoša bahung. Ka nako yeo, Abele a ka se sa hwa. O tla phela mo lefaseng ka mo go sa felego. Na e ka se be mo gobotse go tsebana le batho bao ba swanago le Abele?

Eupša Modimo ga a kgahlišwe ke batho bao ba swanago le Kaine. Ka gona, ka morago ga ge Kaine a bolaile ngwanabo, Modimo o ile a mo otla ka go mo rakela kgole le lapa labo. Ge Kaine a be a tloga gore a yo dula karolong e nngwe ya lefase, o ile a tšea yo mongwe wa dikgaetšedi tša gagwe gomme ya ba mosadi wa gagwe.

Ge nako e dutše e eya, Kaine le mosadi wa gagwe ba ile ba ba le bana. Barwa le barwedi ba bangwe ba Adama le Efa ba ile ba nyalana gomme le bona ba ba le bana. Go se go ye kae ke ge go šetše go na le batho ba bantši lefaseng. Anke re ithute ka ba bangwe ba bona.

Genesi 4:2-26; 1 Johane 3:11, 12; Johane 11:25.



Dipotšišo

  • Ke mešomo efe yeo Kaine le Abele ba bego ba e dira?
  • Ke dimpho dife tšeo Kaine le Abele ba ilego ba di tlišetša Jehofa?
  • Ke ka baka la’ng Jehofa a ile a kgahlišwa ke mpho ya Abele, gona ke ka baka la’ng a ile a se kgahlišwe ke ya Kaine?
  • Kaine e be e le motho wa mohuta mang, gomme Jehofa o ile a leka bjang go mo phošolla?
  • Kaine o ile a dira’ng ge a be a le nageng le Abele ngwanabo?
  • Hlalosa seo se ilego sa diragalela Kaine ka morago ga gore a bolaye ngwanabo.

Dipotšišo tša tlaleletšo

  • Bala Genesi 4:2-26.

    Jehofa o ile a botša Kaine ka kotsi efe yeo a bego a lebeletšane le yona? (Gen. 4:7)

    Kaine o ile a bontšha bjang seo se bego se le ka pelong ya gagwe? (Gen. 4:9)

    Pono ya Jehofa ke efe ka go bolaya motho? (Gen. 4:10; Jes. 26:21)

  • Bala 1 Johane 3:11, 12.

    Ke ka baka la’ng Kaine a ile a galefa kudu, gona se ke temošo bjang go rena lehono? (Gen. 4:4, 5; Die. 14:30; 28:22)

    Beibele e bontšha bjang gore re sa dutše re ka kgomarela potego ya rena gaešita le ge ditho ka moka tša malapa a gabo rena di ganetša Jehofa? (Ps. 27:10; Mat. 10:21, 22)

  • Bala Johane 11:25.

    Ke’ng seo Jehofa a se kgonthišetšago mabapi le batho ka moka bao ba hwago ka baka la go loka? (Joh. 5:24)

Ithute ka mo go oketšegilego

Re ka Ithuta’ng go Kaine le Abele?

Phrintha mošomo wo, bala ditemana tša Beibele gomme o tlatše dikgoba tše di se nago selo.

Abele—‘Le ge a Hwile, o sa Bolela’

Re ka ithuta’ng ka Abele le tumelo ya gagwe le ge go bolelwa dilo tše sego kae feela ka yena ka Beibeleng?