Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 5: Bophelo bo Thoma go ba Thata

Kgaolo 5: Bophelo bo Thoma go ba Thata

KA MORAGO ga gore Adama le Efa ba rakwe serapeng sa Edene, ba ile ba ba le mathata a mantši. Ba ile ba swanelwa ke go šoma ka thata gore ba hwetše dijo. Go e na le gore ba bone go mela dihlare tše dibotse tša dienywa, ba ile ba bona go mela meetlwa le dimela tše di hlabago. Se ke seo se ilego sa direga ge Adama le Efa ba ile ba se kwe Modimo gomme e se sa le bagwera ba Gagwe.

Adama o šoma ka thata le morwa wa gagwe

Eupša se bohloko le go feta, Adama le Efa ba be ba ka se sa phela ka mo go sa felego. Gopola gore Modimo o be a ba lemošitše gore ba be ba tla hwa ge ba ka ja dienywa tša sehlare se itšego. Go tloga letšatšing leo ba di jelego ka lona, ganyenyane-ganyenyane ba be ba tla tšofala ke moka mafelelong ba hwa. Ruri e bile mašilo ka go se theetše Modimo!

Bana ba Adama le Efa ka moka ba belegwe ka morago ga gore Modimo a rake batswadi ba bona serapeng sa Edene. Se se bolela gore bana bao le bona ba be ba tla tšofala le go hwa.

Ge nkabe Adama le Efa ba ile ba kwa Jehofa, ruri bona le bana ba bona nkabe ba ile ba thabela bophelo. Ka moka ga bona nkabe ba ile ba phela ka mo go sa felego lefaseng ba thabile. Nkabe go se na yo a bego a tla tšofala, a babja le go hwa.

Modimo o nyaka gore batho ba phele ka mo go sa felego ba thabile gomme O holofetša gore ka letšatši le lengwe go tla ba bjalo. Ga se feela gore lefase e tla ba le lebotse, eupša le batho ka moka ba tla phela gabotse mmeleng. E bile batho ka moka lefaseng ba tla gwerana le go ba bagwera ba Modimo.

Efa le bana ba gagwe

Eupša Efa e be e se sa hlwa e le mogwera wa Modimo. Ka gona go be go se bonolo ge a be a belega bana. O be a ekwa bohloko. Na o a bona gore go se kwe ga gagwe Jehofa go mo tlišeditše manyami a magolo?

Adama le Efa ba ile ba ba le barwa le barwedi ba bantši. Ge morwa wa bona wa pele a be a belegwa, ba ile ba mmitša Kaine. Ba ile ba bitša morwa wa bona wa bobedi gore ke Abele. Na o a tseba gore ke eng seo se ilego sa ba diragalela?

Genesi 3:16-23; 4:1,2; Kutollo 21:3,4.



Dipotšišo

  • Bophelo bo be bo le bjang go Adama le Efa ka ntle ga serapa sa Edene?
  • Ke’ng seo se ilego sa thoma go diragalela Adama le Efa, gona ka baka la’ng?
  • Ke ka baka la’ng bana ba Adama le Efa ba be ba tla tšofala le go hwa?
  • Ge nkabe Adama le Efa ba ile ba kwa Jehofa, bona le bana ba bona ba be ba tla phela bjang?
  • Go se kwe ga Efa go ile gwa mmakela bohloko bjang?
  • Maina a barwa ba babedi ba pele ba Adama le Efa e be e le bomang? Bana ba bangwe bao ba lego mo seswantšhong ke bomang?
  • Bana ba bangwe bao ba lego mo seswantšhong ke bomang?

Dipotšišo tša tlaleletšo

  • Bala Genesi 3:16-23 le 4:1, 2.

    Bophelo bja Adama bo ile bja ba bjang ka morago ga gore lefase le rogakwe? (Gen. 3:17-19; Baroma 8:20, 22)

    Ke ka baka la’ng leina Efa, leo le bolelago gore “Yo a Phelago,” le be le mo swanetše? (Gen. 3:20)

    Jehofa o ile a hlokomela Adama le Efa bjang gaešita le ka morago ga ge ba dirile sebe? (Gen. 3:7, 21)

  • Bala Kutollo 21:3, 4.

    “Dilo tša pele” tšeo o lebeletšego pele go di bona di fedišwa ke dife?