Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 4: Lebaka la Gore ba Lahlegelwe ke Legae la Bona

Kgaolo 4: Lebaka la Gore ba Lahlegelwe ke Legae la Bona

BONA seo bjale se diregago mo seswantšhong. Adama le Efa ba rakwa serapeng se sebotse sa Edene. Na o tseba lebaka la seo?

Adama le Efa ba bewa serapeng sa Edene

Ke ka gobane ba dirile selo se itšego se sebe kudu. Jehofa bjale o a ba otla. Na o tseba selo se sebe seo Adama le Efa ba se dirilego?

Ba dirile selo se itšego seo Modimo a bego a ba boditše gore ba se ke ba se dira. Modimo o be a ba boditše gore ba ka ja dienywa tša dihlare tša serapeng seo. Eupša gape o be a ba boditše gore ba se ke ba ja dienywa tša sehlare se itšego ka gobane ge ba ka di ja ba be ba tla hwa. Sehlare seo e be e le sa gagwe a nnoši. Akere re a tseba gore ke phošo go tšea selo sa motho yo mongwe. Bjale go be go diregile eng?

Ka letšatši le lengwe ge Efa a be a le nnoši mo serapeng, noga e ile ya bolela le yena. Anke o nagane ka seo! E ile ya mmotša gore a je dienywa tša sehlare seo Modimo a bego a ba boditše gore ba se ke ba ja tša sona. Ge Jehofa a be a dira dinoga, ga se a ka a di dira gore di kgone go bolela. Ka gona se se ra gore go be go na le motho yo mongwe yo a bego a dira gore noga yeo e bolele. E be e le mang?

E be e se Adama. E swanetše go ba e be e le yo mongwe wa batho bao Jehofa a bego a ba dirile kgale pele ga ge a ka dira lefase. Batho bao ke barongwa gomme re ka se kgone go ba bona. Bjale go na le morongwa yo mongwe yo a ilego a ikgogomoša kudu. A thoma go nagana gore o swanetše go buša go swana le Modimo. E bile o be a nyaka gore batho ba kwe yena go e na le go kwa Jehofa. Ke yena yo a dirilego gore noga e bolele.

Morongwa yo o ile a kgona go fora Efa. Efa o ile a kgolwa morongwa yoo ge a be a mmotša gore o tla swana le Modimo ge e ba a ka ja seenywa seo. Ka gona o ile a ja gomme Adama le yena a ja. Adama le Efa ba ile ba se kwe Modimo, ke ka baka leo ba ilego ba lahlegelwa ke legae la bona le lebotse.

Eupša ka letšatši le lengwe Modimo o tla kgonthišetša gore lefase ka moka le dirwa le lebotse go swana le serapa sa Edene. Re tla ithuta ka morago kamoo le wena o ka thušago go le dira gore le be bjalo. Eupša ga bjale anke re bone seo se ilego sa diragalela Adama le Efa.

Genesi 2:16, 17; 3:1-13, 24; Kutollo 12:9.



Dipotšišo

  • Ke’ng seo se diragalelago Adama le Efa mo seswantšhong?
  • Ke ka baka la’ng Jehofa a ile a ba otla?
  • Ke’ng seo noga e ilego ya se botša Efa?
  • Ke mang yo a dirilego gore noga e bolele le Efa?
  • Ke ka baka la’ng Adama le Efa ba ile ba lahlegelwa ke legae la bona la Paradeise?

Dipotšišo tša tlaleletšo

  • Bala Genesi 2:16, 17 le 3:1-13, 24.

    Potšišo yeo noga e ilego ya e botšiša Efa e ile ya fetoša bjang seo Jehofa a bego a se boletše? (Gen. 3:1-5; 1 Joh. 5:3)

    Mohlala wa Efa o re lemoša eng? (Bafil. 4:8; Jak. 1:14, 15; 1 Joh. 2:16)

    Adama le Efa ba ile ba palelwa ke go amogela ditlamorago tša ditiro tša bona ka tsela efe? (Gen. 3:12, 13)

    Bakerubi bao ba bego ba beilwe ka bohlabela bja serapa sa Edene ba ile ba godiša bjang bogoši bja Jehofa? (Gen. 3:24)

  • Bala Kutollo 12:9.

    Sathane o atlegile go fihla bokgoleng bofe go dira gore batho ba hlanogele bogoši bja Modimo? (1 Joh. 5:19)