Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 3: Monna wa Pele le Mosadi

Kgaolo 3: Monna wa Pele le Mosadi

KE ENG seo o thomago go se bona seswantšhong se? Ee, ke batho bao ba lego go sona. Ke monna wa pele le mosadi wa pele. Ba bopilwe ke mang? Ke Modimo. Na o tseba leina la gagwe? Ke Jehofa. Monna le mosadi yoo ba ile ba bitšwa Adama le Efa.

Adama le Efa serapeng sa Edene

Jehofa Modimo o bopile Adama ka mokgwa wo: O ile a tšea lerole la mmu a dira mmele o phethagetšego ka lona, e lego mmele wa motho. Ka morago a mmudulela moya ka dinkong ke moka Adama a napa a phela.

Jehofa Modimo o be a na le mošomo wo a bego a nyaka gore Adama a o dire. O ile a botša Adama gore a reele diphoofolo ka moka maina. Adama o swanetše go ba a ile a ithuta diphoofolo ka nako e telele e le gore a tle a kgone go di rea maina ao a di swanetšego. Ge Adama a be a rea diphoofolo maina, o ile a thoma go lemoga selo se itšego. Na o a tseba gore selo seo e be e le eng?

Diphoofolo ka moka di be di na le bagwera. Go be go na le botate le bomma ba ditlou, e bile go na le botate le bomma ba ditau. Eupša Adama yena o be a se na mogwera. Ka gona, Jehofa o ile a swariša Adama boroko bjo bogolo ke moka a ntšha e nngwe ya dikgopo tša gagwe. Jehofa o ile a direla Adama mosadi ka kgopo yeo gomme ya ba mosadi wa gagwe.

Ga bjale Adama o be a thabile e le ruri! Anke o nagane kamoo Efa a swanetšego go ba a be a thabile ka gona ge a beilwe serapeng se bjalo se sebotse gore a phele go sona! Bjale ba be ba ka ba le bana gomme ba phela gotee ka lethabo.

Jehofa o be a nyaka gore Adama le Efa ba phele ka mo go sa felego. O be a nyaka ba dira lefase ka moka gore e be le lebotse go swana le serapa sa Edene. Ba swanetše go ba ba ile ba thaba gakaakaang ge ba be ba nagana ka go dira se! Na o be o tla thabela go dira lefase gore e be serapa se sebotse? Eupša lethabo la Adama le Efa le ile la fela. Anke re bone lebaka la seo.

Psalme 83:18; Genesi 1:26-31; 2:7-25.



Dipotšišo

  • Seswantšho seo se lego go Kgaolo 3 se fapana bjang le seo se lego go Kgaolo 2?
  • Ke mang yo a bopilego monna yo wa pele, gomme leina la monna yo ke mang?
  • Modimo o ile a nea Adama mošomo ofe?
  • Ke ka baka la’ng Modimo a ile a swariša Adama boroko bjo bogolo?
  • Adama le Efa ba be ba ka phela nako e kaaka’ng, gona ke mošomo ofe woo Jehofa a bego a nyaka gore ba o dire?

Dipotšišo tša tlaleletšo

  • Bala Psalme 83:18.

    Leina la Modimo ke mang, gomme o na le matla a makaaka’ng godimo ga lefase? (Jer. 16:21; Dan. 4:17)

  • Bala Genesi 1:26-31.

    Ke’ng seo mafelelong Modimo a ilego a se bopa letšatšing la botshelela la tlholo, gona sebopiwa seo se be se fapana bjang le diphoofolo? (Gen. 1:26)

    Ke dijo tša mohuta mang tšeo Jehofa a ilego a di nea batho le diphoofolo? (Gen. 1:30)

  • Bala Genesi 2:7-25.

    Ke’ng seo Adama a swanetšego go ba a ile a se dira gore a tle a kgone go rea diphoofolo maina? (Gen. 2:19)

    Genesi 2:24 e re thuša bjang go kwešiša pono ya Jehofa ka lenyalo, karogano le tlhalo? (Mat. 19:4-6, 9)