Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 2: Serapa se Sebotse

Kgaolo 2: Serapa se Sebotse

BONA lefase mo seswantšhong se! Ruri dilo ka moka ke tše dibotse! Bona bjang, dihlare, matšoba le diphoofolo ka moka. Na o ka kgona go šupa tlou le ditau?

Diphoofolo serapeng sa Edene

Serapa se se sebotse se bile gona bjang? Anke re bone kamoo Modimo a ilego a re lokišeletša lefase ka gona.

Modimo o thomile ka go mediša bjang bjo botala gore bo apeše lefase. Le gona o ile a mediša dimela tša mehuta ka moka le dihlare. Dilo tše di thuša go dira gore lefase e be le lebotse. Eupša ga di dire seo feela. Tše dintši tša tšona di re nea dijo tše dibose kudu.

Ka morago Modimo o ile a dira dihlapi gore di phele ka meetseng gomme a dira dinonyana gore di fofe sebakabakeng. O ile a dira dimpša, dikatse le dipere; diphoofolo tše dikgolo le tše dinyenyane. Ke diphoofolo dife tšeo di phelago kgauswi le ga geno? Na ga se ra swanela go thabišwa ke gore Modimo o re diretše dilo tše ka moka?

Mafelelong Modimo o ile a dira karolo e nngwe ya lefase gore e be lefelo le lebotse kudu. O ile a bitša lefelo leo gore ke serapa sa Edene. Se be se ratega kudu. Dilo ka moka tša moo e be e le tše dibotse. Modimo o be a nyaka gore lefase ka moka le swane le serapa se se sebotse seo a se dirilego.

Eupša lebelela seswantšho se sa serapa gape. Na o a tseba gore ke eng seo Modimo a ilego a bona se se gona? Anke re bone.

Genesi 1:11-25; 2:8, 9.



Dipotšišo

  • Modimo o ile a lokišeletša lefase bjang gore e be legae la rena?
  • Bolela mehutahuta ya diphoofolo tšeo Modimo a di dirilego. (Lebelela seswantšho.)
  • Ke ka baka la’ng serapa sa Edene se be se ratega kudu?
  • Modimo o be a nyaka gore lefase ka moka le fetoge eng?

Dipotšišo tša tlaleletšo

  • Bala Genesi 1:11-25.

    Modimo o bopile eng letšatšing la boraro la tlholo? (Gen. 1:12)

    Go ile gwa direga’ng letšatšing la bone la tlholo? (Gen. 1:16)

    Ke mehuta efe ya diphoofolo yeo Modimo a ilego a e bopa letšatšing la bohlano le la botshelela? (Gen. 1:20, 21, 25)

  • Bala Genesi 2:8, 9.

    Ke dihlare dife tše pedi tše di kgethegilego tšeo Modimo a ilego a di mediša serapeng sa Edene, gona di be di swantšhetša’ng?