Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 1: Modimo O Thoma Go Dira Dilo

Kgaolo 1: Modimo O Thoma Go Dira Dilo

DILO ka moka tše dibotse tšeo re nago le tšona di tšwa go Modimo. O dirile letšatši go re nea seetša mosegare gomme a dira ngwedi le dinaledi gore re be le seetša bošego. Le gona Modimo o dirile lefase gore re phele go lona.

Lega go le bjalo, letšatši, ngwedi, dinaledi le lefase e be e se dilo tša pele tšeo Modimo a di dirilego. Na o tseba seo a se dirilego pele? Modimo o thomile ka go dira batho bao ba swanago le yena. Re ka se kgone go ba bona, go fo swana le ge re ka se kgone go bona Modimo. Ka Beibeleng, batho ba ba bitšwa barongwa. Modimo o dirile barongwa gore ba phele le yena legodimong.

Morongwa wa pele yo Modimo a mo dirilego o ile a bitšwa Morwa wa pele wa Modimo. O be a mo rata kudu. O šomile gotee le Tatagwe. O thušitše Modimo go dira dilo tše dingwe ka moka. O mo thušitše go dira letšatši, ngwedi, dinaledi gotee le lefase la rena.

Ka nako yeo lefase le be le le bjang? Mathomong go be go se na motho yo a bego a ka phela mo lefaseng. E be e le feela bodiba bjo bogolo bja meetse lefaseng ka moka. Eupša Modimo o be a nyaka gore batho ba phele mo lefaseng. Ka gona, o ile a thoma go re lokišeletša dilo. O ile a dira’ng?

Sa pele, go be go nyakega seetša lefaseng. Ka go re’alo, Modimo o ile a dira gore seetša sa letšatši se bonege lefaseng. O dirile seetša e le gore go be le bošego le mosegare. Ka morago ga moo, Modimo o ile a dira gore bodibeng bja meetse go tšwelele naga e omilego.

Mathomong go be go se na selo mo lefaseng. Le be le swana le seswantšho se o se bonago mo. Go be go se na matšoba, dihlare goba diphoofolo. E bile go be go se na dihlapi mawatleng. Modimo o be a sa na le mošomo o montši wo a swanetšego go o dira gore lefase e be le lebotse kudu bakeng sa diphoofolo le batho go phela go lona.

Jeremia 10:12; Bakolose 1:15-17; Genesi 1:1-10.

Naga e se nago selo


Dipotšišo

  • Dilo ka moka tše dibotse di tšwa kae, gomme na o ka bolela tše dingwe tša tšona?
  • Ke selo sefe sa pele seo Modimo a ilego a se dira?
  • Ke ka baka la’ng Modimo a be a rata morongwa wa pele kudu?
  • Hlalosa gore lefase le be le le bjang mathomong. (Lebelela seswantšho.)
  • Modimo o ile a dira’ng go lokišeletša lefase gore le tle le dulwe ke batho le diphoofolo?

Dipotšišo tša tlaleletšo

  • Bala Jeremia 10:12.

    Ke dika dife tša Modimo tšeo re di bonago tlholong ya gagwe? (Jes. 40:26; Baroma 11:33)

  • Bala Bakolose 1:15-17.

    Jesu o kgathile tema efe ge dilo di be di bopša, gona se se swanetše go kgoma bjang pono ya rena ka yena? (Bakol. 1:15-17)

  • Bala Genesi 1:1-10.

    Lefase le hlodilwe ke mang? (Gen. 1:1)

    Ke’ng seo se diregilego letšatšing la pele la tlholo? (Gen. 1:3-5)

    Hlalosa seo se diregilego letšatšing la bobedi la tlholo. (Gen. 1:7, 8)