Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Puku ya ka ya Ditaba tša Beibele

Puku ya ka ya Ditaba tša Beibele
Jesu o bolela le bana

PUKU ye e bolela ka ditaba tšeo di diragetšego e le ka kgonthe. Di tšerwe ka pukung yeo e phalago dipuku ka moka mo lefaseng, e lego Beibele. Dikgaolo tša ka pukung ye di tla go botša ka histori ya lefase go tloga ge Modimo a be a thoma go bopa dilo go fihlela mehleng ye ya rena. E bile di tla go botša ka dilo tšeo Modimo a holofeditšego gore o tla di dira nakong e tlago.

Puku ye e tla go hlalosetša seo Beibele e se bolelago. E bolela ka batho ba ka Beibeleng le ka dilo tšeo ba ilego ba di dira. Le gona e bolela ka kholofelo e kgolo ya bophelo bjo bo sa felego lefaseng la paradeise leo Modimo a tlago go le nea batho.

Puku ye e na le dikgaolo tše 116. Dikgaolo tšeo di arotšwe ka dikarolo tše seswai. Letlakala leo le thomago karolo e nngwe le e nngwe le hlalosa ka boripana seo o tlago go se bala karolong yeo. Ditiragalo tšeo di lego ka pukung ye di anegwa go ya ka tatelano yeo di diragetšego ka yona. Se se tla go thuša go tseba gore ditiragalo tše itšego di diragetše neng historing ge o di bapetša le tše dingwe.

Ditaba tša ka pukung ye di anegwa ka polelo e bonolo. Bana ba bantši ba tla kgona go ipalela tšona. Lena batswadi, le tla hwetša gore bana ba lena ba tla thabela gore le ba balele ditaba tše leboelela. Le tla hwetša gore puku ye e swere ditaba tše di tlago go kgahliša bana gotee le batho ba bagolo.

Mafelelong a kgaolo e nngwe le e nngwe go na le ditemana tša Beibele. O kgothaletšwa gore o bale ditemana tše tša Beibele tšeo ditaba tša ka pukung ye di tšerwego go tšona. Ge o feditše go bala kgaolo, hlahloba dipotšišo tša kgaolo yeo tšeo di lego matlakaleng ao a latelago Kgaolo 116 gomme o leke go gopola dikarabo.

Ditemana tša Beibele tšeo di lego ka pukung ye di hlalositšwe. Di ngwadilwe ka polelo e bonolo e le gore bana ba kgone go di kwešiša. Ditemana tšeo di lego mafelelong a kgaolo e nngwe le e nngwe, di bontšha moo taba yeo go bolelwago ka yona e tšerwego gona ka Beibeleng.