Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 116: Kamoo re ka Phelago ka mo go sa Felego

Kgaolo 116: Kamoo re ka Phelago ka mo go sa Felego

NA O a bona gore ngwanenyana yo yo monyenyane le bagwera ba gagwe ba bala eng? Ee, ba bala yona puku ye o e balago—Puku ya ka ya Ditaba tša Beibele. Le gona ba bala yona kgaolo ye o e balago yeo e rego, “Kamoo re ka Phelago ka mo go sa Felego.”

Mošemane o bala Beibele

Na o a tseba gore ba ithuta’ng? Ba ithuta gore sa pele re swanetše go tseba ka Jehofa le Morwa wa gagwe Jesu ge e ba re nyaka go phela ka mo go sa felego. Beibele e re: ‘Tsela ya go hwetša bophelo bjo bo sa felego ke gore re ithute ka Modimo a nnoši wa therešo le ka Morwa wa gagwe yo a mo romilego lefaseng e lego Jesu Kriste.’

Re ka ithuta bjang ka Jehofa Modimo le ka Morwa wa gagwe Jesu? Tsela e nngwe ke ka go bala Puku ya ka ya Ditaba tša Beibele go tloga mathomong go fihla mafelelong. E bolela mo gontši ka Jehofa le ka Jesu, na ga go bjalo? Le gona e bolela mo gontši ka dilo tšeo ba di dirilego le tšeo ba sa tlago go di dira. Eupša re swanetše go dira se se fetago go fo bala puku ye.

Beibele

Na o a e bona puku e nngwe yeo e lego mo fase? Ke Beibele. Kgopela motho yo mongwe gore a go balele ditemana tša Beibele tšeo ditaba tše di lego ka pukung ye di theilwego go tšona. Beibele e re nea ditaba ka botlalo tšeo re di nyakago e le gore ka moka ga rena re hlankele Jehofa ka tsela e nepagetšego gomme re tle re hwetše bophelo bjo bo sa felego. Ka gona re swanetše go tlwaela go ithuta Beibele ka mehla.

Eupša go fo ithuta ka Jehofa Modimo le ka Jesu Kriste ga se gwa lekana. Re ka tseba mo gontši kudu ka bona le ka dithuto tša bona, eupša ra se ke ra hwetša bophelo bjo bo sa felego. Na o a tseba gore go nyakega’ng gape?

Go nyakega le gore re phele ka go dumelelana le dilo tšeo re ithutago tšona. Na o sa gopola Judase Isikariote? E be e le yo mongwe wa barutiwa ba 12 bao Jesu a bego a ba kgethile gore e be baapostola ba gagwe. Judase o be a tseba mo gontši ka Jehofa le ka Jesu. Eupša go ile gwa direga’ng ka yena? Ka morago ga nako e itšego, o ile a ba le megabaru gomme a rekiša Jesu go manaba a gagwe ka ditsekana tše 30 tša silifera. Ka gona Judase a ka se hwetše bophelo bjo bo sa felego.

Na o sa gopola Gehasi yoo re ithutilego ka yena go Kgaolo 69? O ile a nyaka go hwetša diaparo le tšhelete yeo e bego e se ya gagwe. Ka gona a bolela maaka gore a tle a hwetše dilo tšeo. Eupša Jehofa a mo otla. Le rena o tla re otla ge e ba re ka se kwe melao ya gagwe.

Eupša go na le batho ba bantši ba go loka bao ka mehla ba ilego ba hlankela Jehofa ka go botega. Re nyaka go swana le bona, na ga go bjalo? Samuele yo monyenyane ke mohlala o mobotse wo re ka o latelago. Go etša ge re ithutile go Kgaolo 55, gopola gore o be a na le nywaga e mene goba e mehlano feela ge a be a thoma go hlankela Jehofa taberenakeleng ya gagwe. Ka gona, go sa šetšwe gore o yo monyenyane gakaakang, o ka se palelwe ke go hlankela Jehofa.

Eupša motho yoo ka moka ga rena re nyakago go mo latela ke Jesu Kriste. Go etša ge go bontšhitšwe go Kgaolo 87, gaešita le nakong ya ge e be e sa le mošemanyana o ile a hlwa tempeleng a bolela le batho ba bangwe ka Tatagwe wa legodimong. Anke le rena re lateleng mohlala wa gagwe. Anke re botšeng batho ba bantši kamoo re ka kgonago ka gona ka Jehofa Modimo wa rena yo mogolo le ka Morwa wa gagwe Jesu Kriste. Ge e ba re ka dira dilo tše, gona re tla phela ka mo go sa felego paradeiseng e mpsha ya Modimo mo lefaseng.

Johane 17:3; Psalme 145:1-21.



Dipotšišo

  • Ke’ng seo re swanetšego go se tseba ge e ba re nyaka go phela ka mo go sa felego?
  • Bjalo ka ge go bontšhitšwe ke ngwanenyana yo yo monyenyane le bagwera ba gagwe mo seswantšhong, re ka ithuta bjang ka Jehofa Modimo le ka Jesu?
  • Ke puku efe e nngwe yeo o e bonago mo seswantšhong, gona ke ka baka la’ng re swanetše go e bala ka mehla?
  • Ka ntle le go ithuta ka Jehofa le ka Jesu, go nyakega’ng gape gore re tle re hwetše bophelo bjo bo sa felego?
  • Re ithutile thuto efe go Kgaolo 69?
  • Mohlala o mobotse wa Samuele yo monyenyane go Kgaolo 55 o bontšha’ng?
  • Re ka latela bjang mohlala wa Jesu Kriste, gomme ge e ba re o latela re tla kgona go dira’ng nakong e tlago?

Dipotšišo tša tlaleletšo

  • Bala Johane 17:3.

    Mangwalo a bontšha bjang gore go tseba Jehofa Modimo le Jesu Kriste go bolela se se fetago go fo swara ditherešo ka hlogo? (Mat. 7:21; Jak. 2:18-20; 1 Joh. 2:17)

  • Bala Psalme 145:1-21.

    A mangwe a mabaka a mantši ao re nago le wona a go tumiša Jehofa ke afe? (Ps. 145:8-11; Kut. 4:11)

    Jehofa ke “yo a lokilego go bohle” bjang, gona se se swanetše go re batametša bjang kgauswiuswi le yena? (Ps. 145:9; Mat. 5:43-45)

    Ge e ba re rata Jehofa ka dipelo tša rena ka moka, re tla tutueletšega go dira’ng? (Ps. 119:171, 172, 175; 145:11, 12, 21)