Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 115: Paradeise e Mpsha mo Lefaseng

Kgaolo 115: Paradeise e Mpsha mo Lefaseng

LEBELELA dihlare tše tše ditelele, matšoba a a mabotse le dithaba tše tše ditelele. Na lefelo le ga se le lebotse? Bona kgama yeo e jelago ka seatleng sa mošemanyana yo. Le gona lebelela ditau le dipere tšeo di lego mola mafulong. Na o ka se rate go dula ntlong yeo e lego lefelong leo le swanago le le?

Modimo o nyaka gore o tle o phele ka mo go sa felego paradeiseng mo lefaseng. Le gona ga a nyake gore o kwe bohloko le ge e le bofe bjoo batho ba bo kwago lehono. Kholofetšo ya Beibele go batho bao ba tlago go phela paradeiseng e mpsha še: ‘Modimo o tla ba le bona. Go ka se sa ba le lehu goba sello goba bohloko. Dilo tša kgale di tla ba di fetile.’

Jesu o tla kgonthišetša gore diphetogo tše tšeo di kgahlišago di a direga. Na o a tseba gore seo se tla direga neng? Ee, se tla direga ka morago ga ge a fedišitše bobe ka moka mo lefaseng gotee le batho ba babe. Gopola gore ge Jesu a be a le mo lefaseng o ile a fodiša batho ba malwetši a mehuta ka moka, a ba a tsoša le bahu. Jesu o dirile se go bontšha seo a tlago go se dira lefaseng ka moka ge a tla be a buša e le Kgoši ya mmušo wa Modimo.

Anke o nagane gore e tla ba mo go kgahlišago gakaakang paradeiseng e mpsha mo lefaseng! Jesu gotee le batho bao a ba kgethilego mo lefaseng ba tla be ba buša legodimong. Babuši bao ba tla hlokomela batho ka moka mo lefaseng gomme ba kgonthišetša gore ba thabile. Anke re bone seo re swanetšego go se dira go kgonthišetša gore Modimo o tla re nea bophelo bjo bo sa felego paradeiseng ya gagwe e mpsha.

Kutollo 21:3, 4; 5:9, 10; 14:1-3.

Lefase la paradeise


Dipotšišo

  • Beibele e bontšha gore re tla thabela maemo afe lefaseng la Paradeise?
  • Ke’ng seo Beibele e se holofetšago batho bao ba tlago go phela Paradeiseng?
  • Jesu o tla kgonthišetša neng gore diphetogo tše tšeo di kgahlišago di a direga?
  • Ge Jesu a be a le mo lefaseng, o ile a dira’ng go bontšha seo a tlago go se dira ge e tla be e le Kgoši ya Mmušo wa Modimo?
  • Jesu le babušigotee le yena ba legodimong ba tla kgonthišetša gore go direga’ng ge ba tla be ba buša lefase ba le legodimong?

Dipotšišo tša tlaleletšo

  • Bala Kutollo 5:9, 10.

    Ke ka baka la’ng re ka kgodišega gore bao ba tla bego ba buša lefase nakong ya Pušo ya Nywaga e Sekete e tla ba dikgoši le baperisita ba botho le bao ba nago le kgaugelo? (Baef. 4:20-24; 1 Pet. 1:7; 3:8; 5:6-10)

  • Bala Kutollo 14:1-3.

    Ke’ng seo se swantšhetšwago ke gore leina la Tate le leina la Kwana a ngwadilwe diphatleng tša ba 144- 000? (1 Bakor. 3:23; 2 Tim. 2:19; Kut. 3:12)

Ithute ka mo go oketšegilego

DIPOTŠIŠO TŠA BEIBELE DI A ARABJA

Mmušo wa Modimo o tla Phetha Eng?

Ithute seo o ka se letelago ge mmušo wa Modimo o tla be o buša lefase.