Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 82: Morodekai le Esitere

Kgaolo 82: Morodekai le Esitere

ANKE re boele morago nywageng e sego kae pele ga ge Esera a ka ya Jerusalema. Morodekai le Esitere e be e le Baisiraele ba maemo a phagamego kudu mmušong wa Peresia. Esitere e be e le mohumagadi gomme Morodekai motswalagwe a latela kgoši ka maemo mmušong. Anke re bone kamoo se se diregilego ka gona.

Batswadi ba Esitere ba ile ba hwa e sa le yo monyenyane kudu gomme a godišwa ke Morodekai. Ahasiwerosi kgoši ya Peresia o be a na le mošate motseng wa Shushani gomme Morodekai e be e le yo mongwe wa bahlanka ba gagwe. Bjale, ka letšatši le lengwe kgoši e ile ya bitša mosadi wa yona e lego Wasithi eupša yena a gana go tla, ke moka kgoši ya kgetha mosadi yo mongwe gore e be mohumagadi wa yona. Na o a tseba gore e ile ya kgetha mang? Ee, e ile ya kgetha mosadi yo mobotse le yo e a lego yo mofsa yo a bego a bitšwa Esitere.

Hamani o galefetše Morodekai

Na o a mmona monna yo a ikgogomošago yo batho ba mo khunamelago mo seswantšhong? Ke Hamani. O be a le maemong a phagamego kudu Peresia. O be a nyaka gore Morodekai yo o mmonago a dutše mo, le yena a mo khunamele. Eupša Morodekai ga se a ka a dira bjalo. O be a bona e le phošo go khunamela monna yo yo mobe. Se se ile sa galefiša Hamani kudu. Ka gona o ile a dira se se latelago:

O ile a botša kgoši maaka ka Baisiraele. A re: ‘Setšhaba se ga se sa loka e bile ga se kwe melao ya gago. Se swanetše go bolawa.’ Ahasiwerosi o be a sa tsebe gore Esitere mosadi wa gagwe e be e le Moisiraele. Ka go re’alo, a theetša Hamani gomme a bea molao wa gore ka letšatši le itšego Baisiraele ka moka ba bolawe.

Ge Morodekai a ekwa ka molao woo, a nyama kudu. A romela molaetša go Esitere a re: ‘O swanetše go botša kgoši taba ye gomme o e kgopele gore e re phološe.’ Molao wa Peresia o be o sa dumelele motho go ya go kgoši ka ntle ga ge e mmiditše. Eupša Esitere o ile a ya a se a bitšwa. Kgoši e ile ya mo šupa ka molamo wa yona wa gauta, e lego seo se bego se bontšha gore a ka se bolawe. Esitere a laletša kgoši le Hamani monyanyeng o mogolo wo a bego a o dirile. Ke moka gona moo kgoši ya botšiša Esitere seo a nyakago go se kgopela go yona. Esitere a re o tla e botša seo a se kgopelago ge e ka tla le Hamani monyanyeng o mongwe letšatšing le le latelago.

Ge ba le moo monyanyeng, Esitere a re go kgoši: ‘Nna le setšhaba sa gešo re tlo bolawa.’ Kgoši ya galefa. Ya re: ‘Ke mang motho yo a nago le sebete se sekaakaa sa go dira sona seo?’

Esitere a re: ‘Motho yoo wa lenaba ke Hamani yo yo mobe!’

Mohumagadi Esitere o phara Hamani ka molato

Bjale kgoši ya galefa kudu le go feta. Ya laela gore Hamani a bolawe. Ka morago ga moo, kgoši ya dira gore Morodekai e be yena a e latelago ka maemo mmušong. Morodekai a laela gore go bewe molao o mofsa woo o dumelelago Baisiraele gore ba itwele letšatšing leo ba bego ba tlo bolawa ka lona. Ka ge Morodekai bjale a be a le maemong a phagamego, batho ba bantši ba ile ba thuša Baisiraele gomme ba phološwa manabeng a bona.

Puku ya Beibele ya Esitere.



Dipotšišo

  • Morodekai le Esitere e be e le bomang?
  • Ke ka baka la’ng Kgoši Ahasiwerosi a ile a nyaka go nyala mosadi yo mongwe, gona o ile a kgetha mang?
  • Hamani e be e le mang, gomme ke eng seo se ilego sa mo galefiša kudu?
  • Ke molao ofe wo o ilego wa bewa, gona Esitere o ile a dira’ng ka morago ga gore a amogele molaetša wo o tšwago go Morodekai?
  • Go ile gwa direga’ng ka Hamani, gomme Morodekai yena a diragalelwa ke eng?
  • Baisiraele ba ile ba phološwa bjang manabeng a bona?

Dipotšišo tša tlaleletšo

  • Bala Esitere 2:12-18.

    Esitere o ile a bontšha bjang bohlokwa bja go hlagolela “moya wo o homotšego le o boleta”? (Esitere 2:15; 1 Pet. 3:1-5)

  • Bala Esitere 4:1-17.

    Go swana le ge Esitere a ile a newa sebaka sa go emela borapedi bja therešo, lehono re neilwe sebaka sefe sa go bontšha boineelo bja rena go Jehofa le go mmotegela? (Esitere 4:13, 14; Mat. 5:14-16; 24:14)

  • Bala Esitere 7:1-6.

    Go swana le ge Esitere a ile a dira, ba bantši ba batho ba Modimo lehono le bona ba ile ba ipea bjang kotsing ya go ka tlaišwa? (Esitere 7:4; Mat. 10:16-22; 1 Pet. 2:12)

Ithute ka mo go Oketšegilego

DIKARATA TŠA BATHO BA KA BEIBELENG

Karata ya Beibele ya Esitere

Go ba le sebete ga Esitere go ile gwa phološa bjang maphelo? Phrintha karata ye ya Beibele gomme o ithute mohlaleng wa gagwe.