Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 78: Mongwalo Lebotong

Kgaolo 78: Mongwalo Lebotong
Seatla se ngwala lebotong

GO DIREGA’NG mo seswantšhong? Batho ba ba monyanyeng o mogolo. Kgoši ya Babilona e be e laleditše baeng ba bantši ba go hlomphega. Ba be ba diriša dikomiki le dibjana tša gauta le silifera tše di tšerwego tempeleng ya Jehofa kua Jerusalema. Eupša gateetee go ile gwa tšwelela menwana ya seatla sa motho mo sebakabakeng gomme ya thoma go ngwala lebotong. Batho ka moka ba ile ba tšhoga.

Belshatsara le baeng ba gagwe

Ka nako yeo, Belshatsara setlogolo sa Nebukadinetsara e be e le kgoši. O ile a goeletša a re go tlišwe banna ba gagwe ba bohlale. A re go bona: ‘Motho le ge e le ofe yo a ka kgonago go bala mongwalo wo gomme a mpotša tlhathollo ya wona, o tla newa dimpho tše dintši gomme ya ba wa boraro ka maemo mmušong wa ka.’ Eupša ga go le o tee wa banna bao ba bohlale yo a ilego a kgona go o bala goba go bolela tlhathollo ya wona.

Mmago kgoši o ile a kwa lešata gomme a tla ka phapošing e kgolo ya go jela yeo ba bego ba le ka go yona. A re go kgoši: ‘Aowa hle, o se ke wa tšhoga kudu. Go na le monna yo mongwe mmušong wa gago yo a tsebago medimo e mekgethwa. Ge rakgolo wa gago Nebukadinetsara e be e le kgoši, o ile a mmea gore e be molaodi wa banna ba gagwe ka moka ba bohlale. Leina la gagwe ke Daniele. E re a bitšwe gomme yena o tla go botša seo se bolelwago ke dilo tše ka moka.’

Gateetee Daniele a tlišwa pele ga kgoši. Ka morago ga gore a gane dimpho tša kgoši, Daniele a thoma go bolela lebaka leo ka lona Jehofa ka nako e nngwe a ilego a dira gore Nebukadinetsara rakgolo wa Belshatsara e se sa ba kgoši. A re go Belshatsara: ‘Rakgolo wa gago o ile a thoma go ikgantšha kudu. Ke moka Jehofa a mo otla.’

Daniele a re go yena gape: ‘Eupša wena o tseba dilo tše ka moka tšeo di diragaletšego Nebukadinetsara gomme o sa dutše o ikgantšha go swana le yena. Lena le tšere dikomiki le dibjana tše di tšwago tempeleng ya Jehofa gomme la nwa beine ka tšona. Wena wa tumiša medingwana yeo e dirilwego ka kota le ka leswika, wa se tagafatše Mmopi wa rena yo Mogolo. Ke ka baka leo Modimo a rometšego seatla se gore se ngwale mantšu a.’

Daniele a re: ‘Go ngwadilwe se: “MENE, MENE, TEKEL le PHARSIN.”’

‘MENE e bolela gore Modimo o badile matšatši a mmušo wa gago gomme a o fetša. TEKEL e bolela gore wena o beilwe sekaleng gomme wa hwetšwa o se na mohola. PHARSIN e bolela gore mmušo wa gago o neilwe Bamede le Baperesia.’

Ka yona nako yeo Daniele a bego a bolela mantšu a, Bamede le Baperesia ba be ba šetše ba thomile go hlasela Babilona. Ba ile ba thopa motse wo gomme ba bolaya Belshatsara. Mongwalo wo o lego mo lebotong o ile wa phethagala bjona bošegong bjoo! Eupša bjale go be go tla direga’ng ka Baisiraele? Re tla tloga re hwetša karabo, eupša anke sa pele re bone seo se ilego sa diragalela Daniele.

Daniele 5:1-31.



Dipotšišo

  • Go ile gwa direga’ng ge kgoši ya Babilona e be e dirile monyanya o mogolo gomme e diriša dikomiki le dibjana tšeo di bego di tšerwe tempeleng ya Jehofa kua Jerusalema?
  • Belshatsara o ile a re’ng go banna ba gagwe ba bohlale, eupša ba ile ba palelwa ke go dira’ng?
  • Ke’ng seo mmago kgoši a ilego a botša kgoši gore e se dire?
  • Go ya ka seo Daniele a ilego a se botša kgoši, ke ka baka la’ng Modimo a ile a romela seatla gore se tle se ngwale lebotong?
  • Daniele o ile a hlalosa bjang seo se bolelwago ke mantšu ao a bego a le lebotong?
  • Go ile gwa direga’ng ge Daniele a be a sa bolela?

Dipotšišo tša tlaleletšo

  • Bala Daniele 5:1-31.

    Bontšha phapano magareng ga go boifa Modimo le poifo yeo Belshatsara a ilego a ba le yona ge a be a bona mongwalo lebotong. (Dan. 5:6, 7; Ps. 19:9; Baroma 8:35-39)

    Daniele o ile a bontšha bjang gore o na le sebete ge a be a bolela le Belshatsara le bakgomana ba gagwe? (Dan. 5:17, 18, 22, 26-28; Dit. 4:29)

    Daniele kgaolo 5 e hlatsela bjang gore Jehofa ke mmuši wa legohle? (Dan. 4:17, 25; 5:21)