Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 74: Monna yo a sa Boifego

Kgaolo 74: Monna yo a sa Boifego

BONA batho ba mo seswantšhong, ba sega lesogana le. Na o a tseba gore ke mang? Ke Jeremia. E be e le moporofeta yo bohlokwa kudu wa Modimo.

Batho ba sega Jeremia

Gateetee ka morago ga gore Kgoši Josia a thome go fediša medingwana ya diswantšho nageng, Jehofa o ile a kgetha Jeremia gore e be moporofeta wa Gagwe. Lega go le bjalo, Jeremia o be a nagana gore e sa le yo monyenyane kudu gore e ka ba moporofeta. Eupša Jehofa o ile a re O tla mo thuša.

Jeremia o ile a botša Baisiraele gore ba kgaotše go dira dilo tše mpe. A re go bona: ‘Medimo yeo batho ba ditšhaba ba e rapelago ke ya maaka.’ Eupša Baisiraele ba bantši ba ile ba kgetha go rapela medingwana ya diswantšho go e na le go rapela Jehofa Modimo wa therešo. Ge Jeremia a be a botša batho gore Jehofa o tla ba otla ka baka la bobe bja bona, ba ile ba fo mo sega.

Go ile gwa feta nywaga e mentši. Josia a hwa gomme ka morago ga dikgwedi tše tharo, Jehoyakima morwa wa gagwe a ba kgoši. Jeremia a dula a botša batho a re: ‘Ge le sa fetoše ditsela tša lena tše mpe, Jerusalema e tla senywa.’ Baperisita ba mo swara gomme ba goeletša ba re: ‘O swanetše go bolawa ka ge o boletše dilo tše.’ Ke moka ba botša dikgošana tša Isiraele ba re: ‘Jeremia o swanetše go bolawa ka gobane o boletše gampe ka motse wa rena.’

Bjale Jeremia o be a tla dira’ng? O be a sa boife! A re go bona ka moka: ‘Jehofa o nthomile gore ke le botše dilo tše. Ge e ba le sa fetoše ditsela tša lena tše mpe, gona Jehofa o tla senya Jerusalema. Eupša tsebang gore ge le ka mpolaya, le tla ba le bolaile motho yo a se nago molato.’

Dikgošana tšeo tša se ke tša mmolaya, eupša Baisiraele ba se fetoše ditsela tša bona tše mpe. Ka morago Nebukadinetsara kgoši ya Babilona a tla gomme a lwa le Jerusalema. Mafelelong Nebukadinetsara a dira gore Baisiraele e be bahlanka ba gagwe. A iša ba bantši ba bona Babilona. Anke o nagane gore go be go tla ba bjang ge batho bao o sa ba tsebego ba be ba ka go tloša ga geno ba go iša nageng yeo o sa e tsebego!

Jeremia 1:1-8; 10:1-5; 26:1-16; 2 Dikgoši 24:1-17.



Dipotšišo

  • Lesogana leo le lego mo seswantšhong ke mang?
  • Jeremia o be a nagana’ng ka go ba moporofeta, eupša ke eng seo Jehofa a ilego a mmotša sona?
  • Ke molaetša ofe wo Jeremia a ilego a dulela go o botša Baisiraele?
  • Baperisita ba ile ba leka bjang go thibela Jeremia, eupša o ile a bontšha bjang gore o be a sa boife?
  • Go ile gwa direga’ng ge Baisiraele ba be ba sa fetoše ditsela tša bona tše mpe?

Dipotšišo tša tlaleletšo

  • Bala Jeremia 1:1-8.

    Go etša ge mohlala wa Jeremia o bontšha, ke eng seo se dirago gore motho a swanelegele tirelo ya Jehofa? (2 Bakor. 3:5, 6)

    Mohlala wa Jeremia o kgothatša bjang bafsa ba Bakriste lehono? (Mmo. 12:1; 1 Tim. 4:12)

  • Bala Jeremia 10:1-5.

    Ke papišo efe e matla yeo Jeremia a ilego a e diriša go bontšha gore go bota medimo ya diswantšho ke ga lefeela? (Jer. 10:5; Jes. 46:7; Habak. 2:19)

  • Bala Jeremia 26:1-16.

    Ge mašaledi a batlotšwa a tsebatša molaetša wa temošo lehono, a etše hloko bjang taelo yeo Jehofa a ilego a e nea Jeremia ya gore “go se be le lentšu leo [a] le tlogelago”? (Jer. 26:2; Doit. 4:2; Dit. 20:27)

    Ke mohlala ofe o mobotse wo Jeremia a o beetšego Dihlatse tša Jehofa lehono tabeng ya go tsebatša temošo ya Jehofa ditšhabeng? (Jer. 26:8, 12, 14, 15; 2 Tim. 4:1-5)

  • Bala 2 Dikgoši 24:1-17.

    Ke mafelelo afe a bohloko ao a bilego gona ka baka la ge batho ba Juda ba ile ba se botegele Jehofa? (2 Dikg. 24:2-4, 14)

Ithute ka mo go oketšegilego

Karata ya Beibele ya Jeremia

Jeremia o ile a kgethwa neng gore e be moporofeta? Diriša karata ye ya Beibele gore o hwetše karabo.