Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 70: Jona le Hlapi e Kgolo

Kgaolo 70: Jona le Hlapi e Kgolo

BONA monna yo a lego ka mo meetseng. O bothateng bjo bogolo, na ga go bjalo? Hlapi ye e kgauswi le go mo metša! Na o a tseba gore monna yo ke mang? Leina la gagwe ke Jona. Anke re bone gore go tlile bjang gore a tsene bothateng bjo bjo bogolo.

Jona e be e le moporofeta wa Jehofa. E be e se kgale moporofeta Elisha a hwile ge Jehofa a tla re go Jona: ‘Eya motseng o mogolo wa Ninife. Bobe bja batho ba moo ke bjo bogolo kudu gomme ke nyaka gore o yo ba botša ka bjona.’

Jona le hlapi e kgolo

Eupša Jona o be a sa nyake go ya moo. Ka gona a namela sekepe seo se bego se sa ye Ninife. Jehofa a se kgahlišwe ke go tšhaba ga Jona. Ke moka a tsoša ledimo le legolo lewatleng. E be e le le legolo kudu moo sekepe seo se bego se le kgauswi le go nwelela. Basepediši ba sona ba be ba tšhogile kudu gomme ba goeletša medimo ya bona gore e ba thuše.

Mafelelong Jona a re go bona: ‘Nna ke rapela Jehofa Modimo yo a dirilego legodimo le lefase. Ke tšhaba go yo dira seo Jehofa a mpoditšego gore ke se dire.’ Bona ba re go yena: ‘Re go dire’ng gore ledimo le le okobale?’

Jona a re go bona: ‘Ntahleleng lewatleng gomme lona le tla boela la okobala.’ Basepediši bao ba sekepe ba be ba sa nyake go mo lahlela ka lewatleng, eupša ya re ge ledimo le sa okobale, ba mo lahlela. Ka yona nako yeo ledimo la kgaotša gomme lewatle la boela la okobala.

Ge Jona a sobelela tlasetlase ka meetseng, o ile a metšwa ke hlapi e kgolo. Eupša a se hwe. A fetša matšatši a mararo le mašego a mararo a le ka mpeng ya hlapi yeo. A itshola kudu gore ga se a kwa Jehofa ka gore a se ke a ya Ninife. Na o a tseba gore o ile a dira’ng?

O ile a rapela Jehofa gore a mo thuše. Ke moka Jehofa a dira gore hlapi yeo e mo hlatšetše mo go omilego. Ka morago ga moo Jona a ya Ninife. Na se ga se re rute kamoo go lego bohlokwa ka gona gore re dire selo le ge e le sefe seo Jehofa a rego re se dire?

Puku ya Beibele ya Jona.



Dipotšišo

  • Jona e be e le mang, gomme ke eng seo Jehofa a ilego a mmotša gore a se dire?
  • Ke’ng seo Jona a ilego a se dira ka baka la ge a be a sa nyake go ya moo Jehofa a bego a re a ye gona?
  • Jona o ile a botša basepediši ba sekepe gore ba dire’ng e le gore ledimo le tle le kgaotše?
  • Bjalo ka ge o bona mo seswantšhong, go ile gwa direga’ng ge Jona a be a sobelela ka meetseng?
  • Jona o bile ka mpeng ya hlapi e kgolo ka nako e kaaka’ng, gomme o ile a dira’ng ge a be a le ka moo?
  • Jona o ile a ya kae ka morago ga gore a tšwe ka mpeng ya hlapi ye, gona se se re ruta’ng?

Dipotšišo tša tlaleletšo

  • Bala Jona 1:1-17.

    Go bonagala Jona a be a ikwa bjang ka modiro wa gagwe wa go yo ruta Baninife? (Jona 1:2, 3; Die. 3:7; Mmo. 8:12)

  • Bala Jona 2:1, 2, 10.

    Phihlelo ya Jona e re kgodiša bjang gore Jehofa o tla araba dithapelo tša rena? (Ps. 22:24; 34:6; 1 Joh. 5:14)

  • Bala Jona 3:1-10.

    Ke kgothatšo efe yeo re e hwetšago tabeng ya gore Jehofa o ile a tšwela pele a diriša Jona go sa šetšwe gore mathomong o ile a palelwa ke go phetha modiro wa gagwe? (Ps. 103:14; 1 Pet. 5:10)

    Phihlelo ya Jona le Baninife e re ruta’ng mabapi le go ahlola batho ba tšhemong ya gabo rena? (Jona 3:6-9; Mmo. 11:6; Dit. 13:48)

Ithute ka mo go oketšegilego

Karata ya Beibele ya Jona

Re ithuta dika dife tša Jehofa pegong ya Beibele ya Jona?