Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 67: Jehoshafate o Bota Jehofa

Kgaolo 67: Jehoshafate o Bota Jehofa

NA O a tseba gore banna bao ba lego mo seswantšhong ke bomang le gore ba dira eng? Ba ya ntweng gomme banna bao ba etilego pele ba a opela. Eupša o ka botšiša gore: ‘Ke ka baka la’ng diopedi tše di se tša swara marumo le ditšhoša tša go lwa?’ Anke re bone.

Baisiraele ba gwantela ntweng

Jehoshafate e be e le kgoši ya mmušo wa meloko e mebedi ya Isiraele. O phetše mehleng ya Kgoši Ahaba le Isebele ba mmušong wa ka leboa wa meloko e 10. Eupša Jehoshafate e be e le kgoši ya go loka gomme Asa tatagwe le yena e le kgoši ya go loka. Ka gona, setšhaba sa mmušong wa ka borwa wa meloko e mebedi se ile sa phela se thabile ka nywaga e mentši.

Eupša ga bjale go direga selo se itšego seo se ilego sa dira gore setšhaba se boife. Go ile gwa tla batseta gomme ba begela Jehoshafate ba re: ‘Go tlile lešaba le legolo leo le tšwago Moaba, Amoni le Thabeng ya Seire go tlo go hlasela.’ Baisiraele ba bantši ba ile ba bokana Jerusalema go tlo nyaka thušo ya Jehofa. Ba ya tempeleng gomme ge ba le moo Jehoshafate a rapela a re: ‘Wena Jehofa Modimo wa rena, ga re tsebe gore re dire eng. Rena ga re na matla pele ga lešaba le le legolo. Re lebeletše wena gore o re thuše.’

Jehofa o ile a kwa thapelo yeo gomme a dira gore yo mongwe wa bahlanka ba gagwe a botše setšhaba a re: ‘Tlhabano ye ga se ya lena, eupša ke ya Modimo. Go ka se nyakege gore le lwe. Lebelelang feela gomme le bone kamoo Jehofa a tlago go le phološa ka gona.’

Bjale mesong e latelago Jehoshafate a botša setšhaba a re: ‘Botang Jehofa!’ Ke moka a emiša diopedi ka pele ga madira a gagwe gomme ge di dutše di sepela di be di opela di tumiša Jehofa. Na o a tseba gore go ile gwa direga’ng ge setšhaba se fihla kgauswi le moo ntwa e bego e tlo lwelwa gona? Jehofa o ile a dira gore madira ao a bego a elwa le Baisiraele a bolayane. Eitše ge Baisiraele ba fihla moo, ba hwetša madira ao ka moka a hwile!

Na Jehoshafate o be a se bohlale ka gore a bote Jehofa? Le rena re tla ba re le bohlale ge e ba re mmota.

1 Dikgoši 22:41-53; 2 Dikoronika 20:1-30.


Dipotšišo

  • Jehoshafate e be e le mang, gomme o phetše mehleng efe?
  • Ke ka baka la’ng Baisiraele ba ile ba boifa, gona ke eng seo ba bantši ba bona ba ilego ba se dira?
  • Jehofa o ile a araba bjang thapelo ya Jehoshafate?
  • Ke’ng seo Jehofa a ilego a dira gore se direge pele ga ge ntwa e ka thoma?
  • Ke thuto efe yeo re ka ithutago yona go Jehoshafate?

Dipotšišo tša tlaleletšo

  • Bala 2 Dikoronika 20:1-30.

    Jehoshafate o bontšhitše bjang seo bahlanka ba botegago ba Modimo ba swanetšego go se dira ge ba lebane le maemo a tšhošago? (2 Dikor. 20:12; Ps. 25:15; 62:1)

    Ka ge Jehofa ka mehla a be a diriša mokero wa poledišano ge a dirišana le batho ba gagwe, ke mokero ofe woo a o dirišago lehono? (2 Dikor. 20:14, 15; Mat. 24:45-47; Joh. 15:15)

    Ge Modimo a tliša “[ntwa] ya letšatši le legolo la Modimo Ramatlaohle,” boemo bja rena bo tla swana bjang le bja Jehoshafate? (2 Dikor. 20:15, 17; 32:8; Kut. 16:14, 16)

    Ka go ekiša Balefi, lehono babulamadibogo le baromiwa ba thuša ka tsela efe modirong wa lefase ka bophara wa go ruta? (2 Dikor. 20:19, 21; Baroma 10:13-15; 2 Tim. 4:2)