Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 66: Isebele—Mohumagadi yo Mobe

Kgaolo 66: Isebele—Mohumagadi yo Mobe

KA MORAGO ga ge Kgoši Jeroboama a hwile, kgoši e nngwe le e nngwe yeo e bušitšego mmušong wa ka leboa wa meloko e 10 wa Isiraele e be e le e mpe. Kgoši Ahaba e be e le yo mobe kudu go feta dikgoši tše dingwe ka moka. Na o a tseba gore ke ka baka la’ng? Ke ka baka la mosadi wa gagwe e lego Mohumagadi Isebele yo mobe.

Isebele e be e se Moisiraele. E be e le morwedi wa kgoši ya Sidone. O be a rapela modimo wa maaka e lego Baali gomme a dira gore Ahaba le Baisiraele ba bantši le bona ba rapele modimo yoo. Isebele o be a hloile Jehofa, ka gona o ile a bolaya baporofeta ba Modimo ba bantši. Ba bangwe ba ile ba swanelwa ke go iphihla ka maweng e le gore ba se ke ba bolawa. Ge Isebele a be a nyaka selo se itšego, o be a ka ba a bolaya motho gore a tle a se hwetše.

Ka letšatši le lengwe, Kgoši Ahaba o be a nyamile kudu. Ka gona Isebele a mmotšiša a re: ‘Ke ka baka la’ng lehono o nyamile?’

Ahaba a araba a re: ‘Ke nyamišitšwe ke seo Nabothe a mpoditšego sona. Ke be ke nyaka go reka serapa sa gagwe sa merara. Eupša o re a ka se nthekišetše sona.’

Isebele a re: ‘O se ke wa tshwenyega, ke tla go hweletša sona.’

Ka gona Isebele a ngwalela banna ba bangwe ba bagolo ba motseng wa gabo Nabothe mangwalo. A re go bona: ‘Nyakang banna ba babedi bao e sego ba selo gomme ba bolele gore Nabothe o rogile Modimo le kgoši. Ke moka le ntšhetšeng Nabothe ka ntle ga motse le mo kgatle ka maswika a hwe.’

Gateetee ge Isebele a ekwa gore Nabothe o hwile, a re go Ahaba: ‘Bjale sepela o yo tšea serapa sa gagwe sa merara.’ Na ga o dumele gore Isebele o swanetše go otlwa ka baka la ge a dirile selo se se bjalo se sešoro?

Mohumagadi Isebele

Bjale ge nako e dutše e eya, Jehofa o ile a romela Jehu gore a yo mo otla. Ge Isebele a ekwa gore Jehu o etla, a tlotša mahlo a gagwe ka ditlolo gomme a leka go itokiša gore a be botsana. Eupša ge Jehu a fihla a bona Isebele lefasetereng, a goeletša banna bao ba lego ka mošate a re: “Mo lahleleng fase!” Banna bao ba mo kwa, go etša ge o ka bona mo seswantšhong. Ba mo lahlela fase gomme a hwa. A e bile mafelelo a Mohumagadi Isebele yo yo mobe.

1 Dikgoši 16:29-33; 18:1-4; 21:1-16; 2 Dikgoši 9:30-37.



Dipotšišo

  • Isebele e be e le mang?
  • Ke ka baka la’ng Kgoši Ahaba a ile a nyama kudu ka letšatši le lengwe?
  • Isebele o ile a dira’ng gore a hweletše monna wa gagwe Ahaba serapa sa Nabothe sa merara?
  • Jehofa o ile a romela mang gore a yo otla Isebele?
  • Bjalo ka ge o bona mo seswantšhong, go ile gwa direga’ng ge Jehu a fihla ntlong ya Isebele ya ka mošate?

Dipotšišo tša tlaleletšo

  • Bala 1 Dikgoši 16:29-33 le 18:3, 4.

    Maemo e be e le a mabe gakaaka’ng Isiraele mehleng ya Kgoši Ahaba? (1 Dikg. 14:9)

  • Bala 1 Dikgoši 21:1-16.

    Nabothe o ile a bontšha bjang sebete le go botegela Jehofa? (1 Dikg. 21:1-3; Lef. 25:23-28)

    Ke’ng seo re ka ithutago sona mohlaleng wa Ahaba mabapi le go lebeletšana le go nyamišwa? (1 Dikg. 21:4; Baroma 5:3-5)

  • Bala 2 Dikgoši 9:30-37.

    Re ka ithuta’ng tabeng ya Jehu ya go fišegela go dira thato ya Jehofa? (2 Dikg. 9:4-10; 2 Bakor. 9:1, 2; 2 Tim. 4:2)

Ithute ka mo go Oketšegilego

MEŠOMO YA GO ITHUTA BEIBELE

Modimo yo a Hlaswago go Hloka Toka

Taonelouta mošomo wo gomme o bone seo o ka ithutago sona pegong ya Ahaba, Isebele, Nabothe le Eliya.