Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 64: Solomone o Aga Tempele

Kgaolo 64: Solomone o Aga Tempele

PELE ga ge Dafida a ka hwa, o ile a nea Solomone dipolane tše di tšwago go Modimo bakeng sa go aga tempele ya Jehofa. Solomone o thomile go aga tempele yeo ngwageng wa bone wa pušo ya gagwe, gomme gwa mo tšea nywaga e šupago le seripa go e fetša. Banna ba dikete tše masome ba ile ba aga tempele yeo, le gona moago woo o be o bitša tšhelete e ntši kudu. Se ke ka gobane go ile gwa dirišwa gauta e ntši le silifera go wona.

Tempele yeo e be e na le diphapoši tše pedi tše dikgolo, go swana le ge taberenakele e be e le bjalo. Eupša diphapoši tše di be di feta tšela tša taberenakele gabedi ka bogolo. Solomone o ile a laela gore areka ya kgwerano e bewe ka phapošing ya ka garegare ya tempele gomme dilo tše dingwe tšeo di bego di le ka taberenakeleng di bewe ka phapošing e nngwe.

Ge tempele e fedile, go ile gwa dirwa monyanya o mogolo. Solomone a khunama ka pele ga tempele gomme a rapela, go etša ge o mmona mo seswantšhong. A re go Jehofa: ‘Le legodimo la magodimo ga le kgone go go lekana, bjale tempele ye yona e tla ba e nyenyane gakaakang! Eupša wena Modimo wa ka, hle theetša setšhaba sa gago ge se go rapela se le lefelong le.’

Kgoši Solomone o a rapela

Ge Solomone a feditše go rapela, mollo wa theoga legodimong. Wa tšhuma dihlabelo tša diphoofolo tšeo di bego di dirilwe. Ke moka seetša se se phadimago seo se tšwago go Jehofa sa tlala tempele. Se se ile sa bontšha gore Jehofa o be a theeditše le gore o kgahlwa ke tempele le thapelo ya Solomone. Ga bjale batho ba be ba ka se sa ya taberenakeleng, eupša ba be ba tla ya tempeleng go yo rapela gona.

Solomone o ile a buša ka bohlale ka nako e telele, e bile setšhaba se be se thabile. Eupša o ile a nyala basadi ba bantši ba dinageng tše dingwe bao ba bego ba sa rapele Jehofa. Na o bona yo mongwe wa bona mo seswantšhong a rapela pele ga modingwana wa seswantšho? Mafelelong basadi bao ba gagwe ba ile ba mo dira gore le yena a rapele medimo e mengwe. Na o a tseba gore go ile gwa direga’ng ge Solomone a be a dira se? O ile a se sa swara setšhaba gabotse. A ba yo sehlogo gomme setšhaba sa se sa thaba.

Kgoši Solomone a rapela modimo wa seswantšho

Se se ile sa dira gore Jehofa a galefele Solomone, ke moka a re go yena: ‘Ke tlo go amoga bogoši gomme ka bo nea motho yo mongwe. Nka se dire se mehleng ya gago, eupša ke tla se dira nakong ya pušo ya morwa wa gago. Eupša nka se mo amoge setšhaba ka moka sa mmušong woo.’ Anke re bone kamoo se se ilego sa direga ka gona.

1 Dikoronika 28:9-21; 29:1-9; 1 Dikgoši 5:1-18; 2 Dikoronika 6:12-42; 7:1-5; 1 Dikgoši 11:9-13.



Dipotšišo

  • Solomone o tšere nako e kaaka’ng a aga tempele ya Jehofa, gomme ke ka baka la’ng moago woo o be o bitša tšhelete e ntši kudu?
  • Tempele yeo e be e na le diphapoši tše kae tše dikgolo, gona ke eng seo se bego se beilwe ka phapošing ya ka garegare?
  • Solomone o ile a re’ng thapelong ya gagwe ge tempele e be e fedile?
  • Jehofa o ile a bontšha bjang gore o be a kgahlilwe ke thapelo ya Solomone?
  • Basadi ba Solomone ba ile ba mo dira gore a dire’ng, gona yena o ile a diragalelwa ke eng?
  • Ke ka baka la’ng Jehofa a ile a galefela Solomone, gomme Jehofa o ile a re’ng go yena?

Dipotšišo tša tlaleletšo

  • Bala 1 Dikoronika 28:9, 10.

    Go ya ka mantšu a Dafida ao a begilwego go 1 Dikoronika 28:9, 10, ke eng seo re swanetšego go katanela go se dira maphelong a rena a letšatši le letšatši? (Ps. 19:14; Bafil. 4:8, 9)

  • Bala 2 Dikoronika 6:12-21, 32-42.

    Solomone o ile a bontšha bjang gore ga go na moago wo o dirilwego ke motho wo o ka lekanago Modimo Yo Godimodimo? (2 Dikor. 6:18; Dit. 17:24, 25)

    Mantšu a Solomone ao a lego go 2 Dikoronika 6:32, 33 a re ruta’ng ka Jehofa? (Dit. 10:34, 35; Bagal. 2:6)

  • Bala 2 Dikoronika 7:1-5.

    Go fo swana le ge Baisiraele ba ile ba tutueletšega go tumiša Jehofa ge ba be ba bona letago la gagwe, rena lehono re swanetše go ikwa bjang ge re naganišiša ka ditšhegofatšo tšeo Jehofa a di neago batho ba gagwe? (2 Dikor. 7:3; Ps. 22:22; 34:1; 96:2)

  • Bala 1 Dikgoši 11:9-13.

    Tsela yeo Solomone a phetšego ka yona e bontšha bjang bohlokwa bja gore re botege go fihla bofelong? (1 Dikg. 11:4, 9; Mat. 10:22; Kut. 2:10)