Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 60: Abigaile le Dafida

Kgaolo 60: Abigaile le Dafida

NA O a mo tseba mosadi yo yo mobotse yo a tlago go gahlana le Dafida mo? Leina la gagwe ke Abigaile. O be a le bohlale, e bile o ile a thibela Dafida go dira selo se itšego se sebe. Eupša pele ga ge re ka ithuta ka seo, anke re bone seo se ilego sa diragalela Dafida.

Ka morago ga gore Dafida a tšhabe Saulo, o ile a iphihla leweng. Bana babo le metswalo ya gagwe ka moka ba ile ba ya moo go yena. Batho ba e ka bago ba 400 ba tla go yena gomme Dafida a ba moetapele wa bona. Ke moka Dafida a ya go kgoši ya Moaba a re: ‘Ke kgopela gore tate le mma ba dule le wena go fihlela ke bona seo se ntiragalelago.’ Ka morago Dafida le batho ba gagwe ba thoma go iphihla dithabeng.

E bile ka morago ga tiragalo ye moo Dafida a ilego a gahlana le Abigaile. Monna wa Abigaile e lego Nabala e be e le mohumi yo a bego a na le naga ya gagwe. O be a na le dinku tše 3 000 le dipudi tše 1 000. O be a se na mekgwa e mebotse. Eupša mosadi wa gagwe e lego Abigaile e be e le yo mobotse kudu. Le gona o be a tseba go dira seo se nepagetšego. Ka nako e nngwe o kile a ba a phološa lapa la gagwe. Anke re bone kamoo a ilego a dira se ka gona.

Dafida le banna ba gagwe ba ile ba swara Nabala ka botho. Ba ile ba thuša badiši ba gagwe go šireletša dinku tša gagwe. Bjale ka letšatši le lengwe Dafida o ile a roma ba bangwe ba banna ba gagwe gore ba yo kgopela thušo go Nabala. Banna bao ba tlile ge Nabala le bathuši ba gagwe ba be ba kota dinku. E be e le letšatši la monyanya gomme Nabala o be a na le dijo tše dintši. Ka gona, banna ba Dafida ba re go yena: ‘Re go swere ka botho. Ga se ra ka ra utswa dinku tša gago, eupša re ile ra thuša go di hlokomela. Bjale re kgopela dijo.’

Nabala a re: ‘Nka se nee banna ba ba swanago le lena dijo tša ka.’ O ile a bolela le bona ka tsela ya lenyatšo, le gona a bolela dilo tše mpe ka Dafida. Ge banna bao ba boile gomme ba botša Dafida ditaba tšeo, yena a galefa kudu. A re go bona: ‘Tšeang ditšhoša tša lena.’ Ke moka ba tloga gore ba yo bolaya Nabala le banna ba gagwe.

Yo mongwe wa banna ba Nabala yo a kwelego mantšu a lenyatšo ao Nabala a a boletšego, a ya a botša Abigaile seo se diragetšego. Gateetee Abigaile a tšea dijo, a di nametša dipokolo gomme a tloga. Ge a gahlana le Dafida, a fologa pokolo ya gagwe a khunama a re: ‘Hle mong wa ka, o se ke wa šetša Nabala monna wa ka. Ke lešilo e bile o dira dilo tša bošilo. Mpho še. Hle e tšee gomme o re lebalele dilo tšeo di diragetšego.’

Abigaile o tlišetša Dafida dijo

Dafida a re: ‘O mosadi yo bohlale. O nthibetše gore ke se ke ka bolaya Nabala ka baka la lenyatšo la gagwe. Eya ntlong ya gago ka khutšo.’ Ka morago ge Nabala a hwile, Abigaile o ile a ba yo mongwe wa basadi ba Dafida.

1 Samuele 22:1-4; 25:1-43.



Dipotšišo

  • Leina la mosadi yo a tlago go gahlana le Dafida mo seswantšhong ke mang, gona e be e le motho wa mohuta mang?
  • Nabala e be e le mang?
  • Ke ka baka la’ng Dafida a ile a roma ba bangwe ba banna ba gagwe gore ba yo kgopela thušo go Nabala?
  • Nabala o ile a botša banna ba Dafida gore’ng, gona Dafida o ile a arabela bjang?
  • Abigaile o ile a bontšha bjang gore e be e le mosadi yo bohlale?

Dipotšišo tša tlaleletšo

  • Bala 1 Samuele 22:1-4.

    Lapa la Dafida le beile bjang mohlala o mobotse wa kamoo re swanetšego go thekgana ka gona borwarreng bja rena bja Bokriste? (Die. 17:17; 1 Bathes. 5:14)

  • Bala 1 Samuele 25:1-43.

    Ke ka baka la’ng Nabala a ile a hlaloswa ka tsela ya lenyatšo? (1 Sam. 25:2-5, 10, 14, 21, 25)

    Basadi ba Bakriste lehono ba ka ithuta’ng mohlaleng wa Abigaile? (1 Sam. 25:32, 33; Die. 31:26; Baef. 5:24)

    Abigaile o ile a thibela Dafida gore a se ke a dira dilo dife tše pedi tše mpe? (1 Sam. 25:31, 33; Baroma 12:19; Baef. 4:26)

    Tsela yeo Dafida a ilego a arabela ka yona mantšung a Abigaile e thuša bjang banna lehono gore ba be le pono ya Jehofa ka basadi? (Dit. 21:8, 9; Baroma 2:11; 1 Pet. 3:7)

Ithute ka mo go Oketšegilego

EKIŠA TUMELO YA BONA

Abigaile o Dirile ka Bohlale

Re ka ithuta’ng boemong bjo thata bjo Abigaile a ilego a lebeletšana le bjona lenyalong?