Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 57: Modimo o Kgetha Dafida

Kgaolo 57: Modimo o Kgetha Dafida
Dafida o phološa kwana

NA O bona seo se diregilego mo seswantšhong? Mošemane yo o hlakodišitše kwana ye go bere. Bere ye e ile ya tla ya tšea kwana ye gomme e be e tlo eja. Eupša mošemane yo o ile a e kitimiša ke moka a hlakodiša kwana yeo molomong wa yona. Eitše ge bere yeo e re e lwa le yena, a e swara a e bolaya! Lebakeng le lengwe, mošemane yo o ile a hlakodiša e nngwe ya dinku go tau. Na yo ga se mošemane yo a nago le sebete? Na o a tseba gore ke mang?

Ke Dafida. O be a dula motseng wa Betlelehema. Rakgolo wa gagwe e be e le Obede, morwa wa Ruthe le Boase. Na o a ba gopola? Tatago Dafida e be e le Jese. Dafida o be a diša dinku tša tatagwe. O belegwe nywaga e 10 ka morago ga ge Jehofa a kgethile Saulo gore e be kgoši.

Go ile gwa fihla nako yeo Jehofa a ilego a botša Samuele a re: ‘Tšea makhura a kgethegilego o ye ntlong ya Jese kua Betlelehema. Ke kgethile yo mongwe wa barwa ba gagwe gore e be kgoši.’ Eitše ge Samuele a bona Eliaba morwa yo mogolo wa Jese, a ipotša gore: ‘Ruri yo ke yena yo Jehofa a mo kgethilego.’ Eupša Jehofa o ile a re go yena: ‘O se ke wa lebelela botelele le botse bja gagwe. Ga se ka kgetha yena gore e be kgoši.’

Ka gona Jese a bitša morwa wa gagwe yo mongwe e lego Abinadaba gomme a mo tliša go Samuele. Eupša Samuele a re: ‘Aowa, le yena yo Jehofa ga se a mo kgetha.’ Ka morago ga moo, Jese a tliša morwa wa gagwe yo mongwe gape e lego Shaama. Samuele a re: ‘Aowa, le yena yo Jehofa ga se a mo kgetha.’ Jese o ile a tliša ba šupago ba barwa ba gagwe go Samuele eupša Jehofa a se ke a kgetha le ge e le ofe gare ga bona. Samuele a botšiša a re: “Na ba ke bona bašemane ba gago ka moka?”

Jese a re: ‘Go sa na le yo monyenyane go bona. Eupša o ile go diša dinku.’ Ge Dafida a tlišwa, Samuele a bona gore e be e le mošemane yo mobotse. Jehofa a re go Samuele: ‘Yo ke yena. Mo tšhele ka makhura hlogong.’ Se ke sona seo Samuele a ilego a se dira. Go be go tla tla nako yeo ka yona Dafida e bego e tla ba kgoši ya Isiraele.

1 Samuele 17:34, 35; 16:1-13.



Dipotšišo

  • Leina la mošemane yo a lego mo seswantšhong ke mang, gona re tseba bjang gore o be a na le sebete?
  • Dafida o be a dula kae, gomme tatagwe le rakgolo’agwe e be e le bomang?
  • Ke ka baka la’ng Jehofa a ile a botša Samuele gore a ye ntlong ya Jese kua Betlelehema?
  • Go ile gwa direga’ng ge Jese a be a tliša barwa ba gagwe ba šupago go Samuele?
  • Ke’ng seo Jehofa a ilego a se botša Samuele ge Dafida a tlišwa?

Dipotšišo tša tlaleletšo

  • Bala 1 Samuele 17:34, 35.

    Ditiragalo tše di bontšha bjang gore Dafida o be a na le sebete le gore o be a ithekga ka Jehofa? (1 Sam. 17:37)

  • Bala 1 Samuele 16:1-14.

    Mantšu a Jehofa ao a lego go 1 Samuele 16:7 a re thuša bjang go phema go beba sefahlego le go kgetholla batho ba bangwe ka baka la ponagalo ya bona ya ka ntle? (Dit. 10:34, 35; 1 Tim. 2:4)

    Mohlala wa Saulo o re bontšha bjang gore ge Jehofa a tloša moya wa gagwe o mokgethwa mothong, sekgoba seo se ka thibja ke moya o mobe goba kganyogo ya go nyaka go dira dilo tše di fošagetšego? (1 Sam. 16:14; Mat. 12:43-45; Bagal. 5:16)

Ithute ka mo go oketšegilego

Karata ya Beibele ya Dafida

Go ka direga gore o tseba kanegelo ya Dafida le Goliata, eupša go na le dilo tše dintši tšeo o ka ithutago tšona ka Dafida.