Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 72: Modimo o Thuša Kgoši Hesekia

Kgaolo 72: Modimo o Thuša Kgoši Hesekia

NA O a tseba gore ke ka baka la’ng monna yo a lego mo seswantšhong a rapela Jehofa? Ke ka baka la’ng a beile mangwalo a ka pele ga aletare ya Jehofa? Monna yo ke Hesekia. E be e le kgoši ya meloko e mebedi ya ka borwa ya Isiraele. Le gona o bothateng bjo bogolo. Ka baka la’ng?

Kgoši Hesekia o a rapela

Ka gobane madira a Baasiria a be a šetše a fentše meloko e 10 ya ka leboa. Jehofa o ile a dumelela se gore se direge ka gobane batho bao e be e le ba babe kudu. Gona bjale madira a Asiria a be a tlile go lwa le mmušo wa meloko e mebedi.

Kgoši ya Asiria e be e sa tšwa go romela mangwalo go Kgoši Hesekia. Mangwalo a gona ke ao Hesekia a a beilego mo pele ga Modimo. Mangwalo a a be a kwera Jehofa gomme a re Hesekia a lese go lwa. Bjale ke ka baka leo Hesekia a rapelago ka gore: ‘Wena Jehofa, re phološe go kgoši ya Asiria. Ke moo ditšhaba ka moka di tlago go tseba gore ke wena Modimo o nnoši.’ Na Jehofa o be a tla theetša Hesekia?

Hesekia e be e le kgoši ya go loka. O be a sa swane le dikgoši tše mpe tša mmušong wa meloko e 10 ya Isiraele, e bile o be a sa swane le tatagwe yo mobe e lego Kgoši Ahasi. Hesekia o ile a kgonthišetša gore o kwa melao ka moka ya Jehofa. Bjale ka morago ga ge a feditše go rapela, moporofeta Jesaya o ile a mo romela molaetša o tšwago go Jehofa wo o rego: ‘Kgoši ya Asiria e ka se tsene Jerusalema. Ga go le o tee wa banna ba yona yo a tlago go batamela motse wo. Madira ao a ka se betše motse wo gaešita le ka mosebe o tee.’

Lebelela seswantšho seo se lego letlakaleng le. Na o a tseba gore madira a ka moka ao a hwilego ke a bomang? Ke a Baasiria. Jehofa o ile a romela morongwa wa gagwe gomme a bolaya madira a Baasiria a 185 000 ka bošego botee. Ka go re’alo kgoši ya Asiria e ile ya tloga moo ya boela gae.

Madira a Baisiria ao a hwilego

Mmušo wa meloko e mebedi o ile wa phološwa gomme batho ba phela ka khutšo ka nakwana. Eupša ge Hesekia a hwile, Manase morwa wa gagwe o ile a ba kgoši. Manase le Amone morwa wa gagwe ba ile ba ba dikgoši tše mpe kudu. Ka gona naga e ile ya boela ya tlala bosenyi le bošoro. Ka morago ga gore Kgoši Amone a bolawe ke bahlanka ba gagwe, Josia morwa wa gagwe o ile a dirwa kgoši ya mmušo wa meloko e mebedi.

2 Dikgoši 18:1-36; 19:1-37; 21:1-25.



Dipotšišo

  • Monna yo a lego mo seswantšhong ke mang, gomme ke ka baka la’ng a be a le bothateng bjo bogolo?
  • Ke mangwalo a eng ao Hesekia a a beilego pele ga Modimo, gona Hesekia o ile a re’ng ge a be a rapela?
  • Hesekia e be e le kgoši ya mohuta mang, gomme Jehofa o ile a mo romela molaetša ofe ka moporofeta Jesaya?
  • Bjalo ka ge go bontšhitšwe mo seswantšhong, ke eng seo morongwa wa Jehofa a ilego a se dira Baasiria?
  • Le ge batho ba mmušong wa meloko e mebedi ba ile ba phela ka khutšo ka nakwana, go ile gwa direga’ng ka morago ga gore Hesekia a hwe?

Dipotšišo tša tlaleletšo

  • Bala 2 Dikgoši 18:1-36.

    Rabashake mmoleledi wa Baasiria o ile a leka bjang go fokodiša tumelo ya Baisiraele? (2 Dikg. 18:19, 21; Ek. 5:2; Ps. 64:3)

    Dihlatse tša Jehofa di latela bjang mohlala wa Hesekia ge di lebeletšane le baganetši? (2 Dikg. 18:36; Ps. 39:1; Die. 26:4; 2 Tim. 2:24)

  • Bala 2 Dikgoši 19:1-37.

    Batho ba Jehofa lehono ba ekiša bjang Hesekia dinakong tša mathata? (2 Dikg. 19:1, 2; Die. 3:5, 6; Baheb. 10:24, 25; Jak. 5:14, 15)

    Kgoši Sanheribe o ile a fenywa bjang ka makga a mararo, gomme o swantšhetša mang ka tsela ya boporofeta? (2 Dikg. 19:32, 35, 37; Kut. 20:2, 3)

  • Bala 2 Dikgoši 21:1-6, 16.

    Ke ka baka la’ng go ka thwe Manase e be e le yo mongwe wa dikgoši tše mpe kudu tšeo di kilego tša buša Jerusalema? (2 Dikor. 33:4-6, 9)