Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 71: Modimo o re Holofeditše Paradeise

Kgaolo 71: Modimo o re Holofeditše Paradeise

SE KE seswantšho sa paradeise yeo e swanago le yeo Modimo a ka bago a kile a e bontšha moporofeta wa gagwe Jesaya. Jesaya o phetše ka moragonyana ga mehla ya Jona.

Batho Paradeiseng

Lentšu paradeise le bolela gore “serapa” goba “phaka.” Na e go gopotša selo se itšego seo re šetšego re se bone ka pukung ye? Na ga e swane le serapa se sebotse seo Jehofa Modimo a bego a se diretše Adama le Efa? Eupša na lefase ka moka e tla ka ya ba paradeise?

Jehofa o ile a botša moporofeta wa gagwe Jesaya gore a ngwale ka paradeise e mpsha yeo batho ba gagwe ba tlago go dula go yona. O ile a re: ‘Diphiri le dinku di tla dula gotee ka khutšo. Dinamane le ditawana di tla fula gotee gomme bana ba banyenyane ba tla di diša. Le lesea le ka se gobale ge le bapala kgauswi le noga ya mpholo.’

Batho ba bantši ba ka re: ‘Dilo tše di ka se tsoge di diregile. Ke kgale go na le mathata mo lefaseng gomme a tla dula a le gona.’ Eupša nagana ka se: Modimo o be a neile Adama le Efa legae la mohuta mang?

Modimo o be a beile Adama le Efa paradeiseng. Ke feela ka gobane ba se ba kwa Modimo moo ba ilego ba lahlegelwa ke legae la bona le lebotse, ba tšofala gomme ba hwa. Modimo o holofeditše gore o tla nea batho bao ba mo ratago tšona dilo tšeo Adama le Efa ba lahlegetšwego ke tšona.

Paradeiseng e mpsha yeo e tlago, ga go na selo seo se tlago go re gobatša goba go re bolaya. Go tla ba le khutšo e phethagetšego. Batho ka moka ba tla phela gabotse mmeleng gomme ba thaba. Go tla ba ka yona tsela yeo Modimo a bego a rerile gore go be ka yona mathomong. Eupša re tla ithuta ka moragonyana kamoo Modimo a tlago go dira se ka gona.

Jesaya 11:6-9; Kutollo 21:3, 4.



Dipotšišo

  • Jesaya e be e le mang, o phetše neng, gona Jehofa o ile a mmontšha eng?
  • Lentšu “paradeise” le bolela’ng, gomme e go gopotša’ng?
  • Ke’ng seo Jehofa a ilego a botša Jesaya gore a se ngwale ka Paradeise e mpsha?
  • Ke ka baka la’ng Adama le Efa ba ile ba lahlegelwa ke legae la bona le lebotse?
  • Ke’ng seo Jehofa a se holofeditšego bao ba mo ratago?

Dipotšišo tša tlaleletšo

  • Bala Jesaya 11:6-9.

    Lentšu la Modimo le hlalosa bjang khutšo yeo e tlago go ba gona magareng ga diphoofolo le batho lefaseng le lefsa? (Ps. 148:10, 13; Jes. 65:25; Hesek. 34:25)

    Mantšu a Jesaya a phethagala ka tsela efe ya moya gare ga batho ba Jehofa lehono? (Baroma 12:2; Baef. 4:23, 24)

    Ke mang yo a swanetšego go retwa ge batho ba kgona go fetoša dimelo tša bona gona bjale e bile ba tla dira bjalo le lefaseng le lefsa? (Jes. 48:17, 18; Bagal. 5:22, 23; Bafil. 4:7)

  • Bala Kutollo 21:3, 4.

    Mangwalo a bontšha bjang gore go dula ga Modimo le batho mo lefaseng go bolela gore o gona ka tsela ya seswantšhetšo, e sego ka tsela ya kgonthe? (Lef. 26:11, 12; 2 Dikor. 6:18; Jes. 66:1; Kut. 21:2, 3, 22-24)

    Ke megokgo efe le bohloko bja mohuta ofe tšeo di tlago go fedišwa? (Luka 8:49-52; Baroma 8:21, 22; Kut. 21:4)