Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 68: Bašemane ba Babedi Bao ba Tsošitšwego

Kgaolo 68: Bašemane ba Babedi Bao ba Tsošitšwego

GE E ba o be o ka hwa, mmago o be a tla ikwa bjang ge o be o ka tsošwa? O be a tla thaba kudu! Eupša na motho yo a hwilego a ka boela a phela? Na seo se kile sa direga?

Bona batho bao ba lego mo seswantšhong. Monna yo ke moporofeta Eliya. Mosadi yo yena ke mohlologadi wa motseng wa Tsarepata gomme mošemane yo ke morwa wa gagwe. Bjale ka letšatši le lengwe mošemane yo o ile a babja. A babja kudu moo mafelelong a ilego a hwa. Ke moka Eliya a re go mosadi yo: ‘Nnee mošemane yo.’

Eliya le mohlologadi le morwa wa gagwe yo a tsošitšwego

Eliya a tšea mošemane yo a hwilego a mo iša ka phapošing ya ka godimo gomme a mo robatša bolaong. Ke moka a rapela a re: ‘Wena Jehofa, dira gore mošemane yo a boele a phele.’ Ka gona mošemane yoo a boela a phela! Bjale Eliya a theogela le yena ka phapošing ya ka tlase gomme a re go mosadi yo: “Bona, morwa wa gago o a phela!” Ke ka baka leo o bonago mmagwe a thabile kudu.

Moporofeta yo mongwe wa Jehofa e be e le Elisha. O be a thuša Eliya. Eupša ge nako e dutše e eya, Jehofa o ile a diriša le Elisha go dira mehlolo. Ka letšatši le lengwe, Elisha o ile a ya motseng wa Shunema moo mosadi yo mongwe a ilego a mo amogela ka botho. Ka morago mosadi yoo a ba le ngwana wa mošemane.

Mesong e mengwe ge mošemane yo a šetše a godile, o ile a ya go tatagwe yo a bego a šoma mašemong. Gateetee mošemane yo a lla a re: “Ke opša ke hlogo!” Ka morago ga ge a išitšwe gae, a hwa. Mmagwe a nyama kudu. Ka yona nako yeo a tloga a yo nyaka Elisha.

Ge Elisha a fihla moo, a ya ka phapošing yeo mošemane yo a hwilego a bego a le ka go yona. A rapela Jehofa gomme a robala godimo ga gagwe. Go se go ye kae mmele wa mošemane yo wa thoma go ruthela ke moka a ethimola gašupa. Mmagwe o ile a thaba kudu ge a tsena ka phapošing yeo gomme a hwetša mošemane wa gagwe a phela.

Batho ba bantši kudu ba hwile. Se se dirile gore ba malapa a gabo bona le bagwera ba kwe bohloko kudu. Rena ga re na matla a go tsoša bahu. Eupša Jehofa o na le wona. Ka morago re tla ithuta kamoo a tlago go tsoša batho ba bantšintši gore ba boele ba phele.

1 Dikgoši 17:8-24; 2 Dikgoši 4:8-37.


Dipotšišo

  • Batho ba bararo bao ba lego mo seswantšhong ke bomang, gomme ke eng seo se ilego sa diragalela mošemane yo?
  • Eliya o ile a rapela gore go direge’ng ka mošemane yo, ke moka go ile gwa direga’ng ka morago ga moo?
  • Ke mang yo a bego a thuša Eliya?
  • Ke ka baka la’ng Elisha a ile a biletšwa ntlong ya mosadi wa motseng wa Shunema?
  • Ke’ng seo Elisha a ilego a se dira, gomme go ile gwa direga’ng ka ngwana yo a bego a hwile? Bjalo ka ge go bontšhitšwe ka Eliya le Elisha, Jehofa o na le matla a go kgona go dira eng?
  • Bjalo ka ge go bontšhitšwe ka Eliya le Elisha, Jehofa o na le matla a go kgona go dira eng?

Dipotšišo tša tlaleletšo

  • Bala 1 Dikgoši 17:8-24.

    Go kwa ga Eliya le tumelo ya gagwe di ile tša lekwa bjang? (1 Dikg. 17:9; 19:1-4, 10)

    Ke ka baka la’ng tumelo ya mohlologadi wa motseng wa Tsarepata e be e le e kgahlišago? (1 Dikg. 17:12-16; Luka 4:25, 26)

    Phihlelo ya mohlologadi wa motseng wa Tsarepata e bontšha bjang go rereša ga mantšu a Jesu ao a begilwego go Mateo 10:41, 42? (1 Dikg. 17:10-12, 17, 23, 24)

  • Bala 2 Dikgoši 4:8-37.

    Ke’ng seo mosadi wa motseng wa Shunema a re rutago sona mabapi le go amogela baeng? (2 Dikg. 4:8; Luka 6:38; Baroma 12:13; 1 Joh. 3:17)

    Lehono re ka bontšha bahlanka ba Modimo botho ka ditsela dife? (Dit. 20:35; 28:1, 2; Bagal. 6:9, 10; Baheb. 6:10)

Ithute ka mo go oketšegilego

Lwela Borapedi bja Therešo!

Ke kae moo o ka bontšhago sebete kudu ge go tliwa tabeng ya borapedi bja therešo?