Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 65: Mmušo o a Aroganywa

Kgaolo 65: Mmušo o a Aroganywa

NA O a tseba gore ke ka baka la’ng monna yo a lego mo seswantšhong a gagoganya seaparo sa gagwe? Jehofa o be a mo laetše gore a dire bjalo. Monna yo ke Ahija moporofeta wa Modimo. Na o a tseba gore moporofeta ke eng? Ke motho yoo Modimo a mmotšago e sa le pele seo se tlago go direga.

Ahija le Jeroboama

Ahija mo o bolela le Jeroboama. Jeroboama e be e le monna yoo Solomone a ilego a mmea gore a hlokomele karolo e nngwe ya modiro wa gagwe wa go aga. Ge Ahija a gahlana le Jeroboama tseleng, o ile a dira selo se se makatšago. O ile a apola seaparo sa gagwe se sefsa seo a bego a se apere gomme a se gagoganya ka diripa tše 12. A re go Jeroboama: ‘Itšeele diripa tše 10.’ Na o a tseba gore ke ka baka la’ng Ahija a neile Jeroboama diripa tše 10?

Ahija o ile a re Jehofa o tlo amoga Solomone mmušo. A re Jehofa o tla nea Jeroboama meloko e 10. Se se be se bolela gore Rehoboama morwa wa Solomone o be a tla šala a buša meloko e mebedi feela.

Ge Solomone a ekwa seo Ahija a se boditšego Jeroboama, o ile a galefa kudu. A leka go bolaya Jeroboama. Eupša Jeroboama a tšhabela Egipita. Ka morago ga nako e itšego, Solomone o ile a hwa. O bile kgoši ka nywaga e 40, eupša gona bjale morwa wa gagwe Rehoboama o be a dirilwe kgoši. Ge Jeroboama a be a le kua Egipita, o ile a kwa gore Solomone o hwile gomme a boela Isiraele.

Rehoboama e be e se kgoši ya go loka. O be a hlakiša setšhaba go feta kamoo Solomone tatagwe a bego a le ka gona. Jeroboama le baetapele ba bangwe ba setšhaba ba ile ba ya go Kgoši Rehoboama gomme ba mo kgopela gore a sware setšhaba gabotse. Eupša Rehoboama a se ke a ba theetša. Ge e le gabotse, o ile a hlakiša setšhaba le go feta peleng. Ka gona setšhaba sa dira Jeroboama kgoši ya meloko e 10, eupša meloko e mebedi e lego wa Benjamini le wa Juda yona ya tšwela pele e bušwa ke Rehoboama.

Jeroboama o be a sa nyake gore setšhaba sa gagwe se ye Jerusalema go yo rapela tempeleng ya Jehofa. Ka go re’alo a dira dinamane tše pedi tša gauta ke moka a dira gore setšhaba sa mmušo wa meloko e 10 se rapele tšona. Go se go ye kae, naga ya thoma go tlala bosenyi le bošoro.

Mathata a ile a ba gona le mmušong wa meloko e mebedi. Eitše go sešo gwa feta nywaga e mehlano Rehoboama e le kgoši, kgoši ya Egipita ya tla ya lwa le Jerusalema. Ya tšea mahumo a mantši tempeleng ya Jehofa. Ka gona, tempele e ile ya fetša nakwana feela e le boemong bjo bo swanago le bja ge e be e sa tšwa go agwa.

1 Dikgoši 11:26-43; 12:1-33; 14:21-31.



Dipotšišo

  • Maina a banna ba babedi bao ba lego mo seswantšhong ke bomang, gomme mošomo wa bona e be e le eng?
  • Ahija o ile a dira’ng ka seaparo se seo a bego a se apere, gona tiro yeo e be e bolela’ng?
  • Ke’ng seo Solomone a ilego a leka go se dira Jeroboama?
  • Ke ka baka la’ng batho ba ile ba dira Jeroboama kgoši ya meloko e lesome?
  • Ke ka baka la’ng Jeroboama a ile a dira dinamane tše pedi tša gauta, gona naga e ile ya thoma go ba bjang ka moragonyana ga moo?
  • Go ile gwa direga’ng ka mmušo wa meloko e mebedi le tempele ya Jehofa kua Jerusalema?

Dipotšišo tša tlaleletšo

  • Bala 1 Dikgoši 11:26-43.

    Jeroboama e be e le motho wa mohuta mang, gona Jehofa o ile a mo holofetša eng ge e ba a be a ka boloka melao ya Modimo? (1 Dikg. 11:28, 38)

  • Bala 1 Dikgoši 12:1-33.

    Ke’ng seo batswadi le bagolo ba ka ithutago sona mohlaleng o mobe wa Rehoboama mabapi le go diriša gampe matla a taolo? (1 Dikg. 12:13; Mmo. 7:7; 1 Pet. 5:2, 3)

    Bafsa lehono ba swanetše go nyaka tlhahlo e ka botwago go bomang ge ba dira diphetho tše dikgolo bophelong? (1 Dikg. 12:6, 7; Die. 1:8, 9; 2 Tim. 3:16, 17; Baheb. 13:7)

    Ke’ng seo se ilego sa tutueletša Jeroboama go dira mafelo a mabedi a borapedi bja namane, gomme se se ile sa bontšha bjang gore o be a tloga a se na tumelo go Jehofa? (1 Dikg. 11:37; 12:26-28)

    Ke mang yo a ilego a dira gore batho ba mmušong wa meloko e lesome ba hlanogele borapedi bja therešo? (1 Dikg. 12:32, 33)