Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 63: Kgoši Solomone yo Bohlale

Kgaolo 63: Kgoši Solomone yo Bohlale

SOLOMONE e be e le mofsa ge a eba kgoši. O be a rata Jehofa e bile a latela keletšo e botse yeo Dafida tatagwe a bego a mo neile yona. Jehofa o be a kgahlišwa ke Solomone moo bošegong bjo bongwe a ilego a bolela le yena torong a re: ‘Solomone, ke eng seo o ka ratago ke go nea sona?’

Solomone a re: ‘Jehofa Modimo wa ka, ke yo monyenyane kudu e bile ga ke tsebe go buša. Ka gona nnee bohlale gore ke kgone go buša setšhaba sa gago gabotse.’

Jehofa o ile a kgahlišwa ke seo Solomone a se kgopetšego. A re go yena: ‘Ka ge o kgopetše bohlale e sego bophelo bjo botelele goba mahumo, ke tla go nea bohlale bjo bo fetago bja motho le ge e le ofe yo a kilego a ba gona. Le gona ke tla go nea le tšeo o sa kago wa di kgopela, e lego mahumo le letago.’

Ka moragonyana ga moo, gwa tla basadi ba babedi go Solomone ba na le bothata bjo bogolo. Yo mongwe wa bona a re: ‘Nna le mosadi yo re dula ka ntlong e tee. Ke belege ngwana wa mošemane gomme ka morago ga matšatši a mabedi le yena a belega ngwana wa mošemane. Ke moka bošegong bjo bongwe ngwana wa gagwe a hwa. Eupša ya re ge ke sa robetše, a bea ngwana wa gagwe yo a hwilego kgauswi le nna gomme a tšea ngwana wa ka. Ge ke tsoga gomme ke lebelela ngwana yo a hwilego, ka bona gore e be e se wa ka.’

Mosadi yola yo mongwe ge a ekwa se a re: ‘Aowa! Ngwana yo a phelago ke wa ka gomme yo a hwilego ke wa gagwe!’ Mosadi wa pele a re: ‘Aowa! Ngwana yo a hwilego ke wa gago gomme yo a phelago ke wa ka!’ Basadi bao ba ngangišana ka yona tsela yeo. Solomone o be a tla dira’ng?

O ile a laela gore a tlišetšwe tšhoša, ke moka ge e tlišitšwe a re: ‘Kgaolang ngwana yo a phelago a be diripa tše pedi, le nee mosadi yo mongwe seripa ke moka se sengwe le se nee yo mongwe.’

Mosadi yo e bego e le mmago ngwana yoo a re: ‘Aowa! Le se ke la mmolaya hle. Mo neeng mosadi yo.’ Eupša mosadi yoo yo mongwe a re: ‘Le se ke la mo nea le ge e le ofe wa rena; mo kgaoleng.’

Kgoši Solomone o rarolla bothata bjo bogolo

Mafelelong Solomone a re: ‘Le se ke la bolaya ngwana yo! Mo neeng mosadi wa pele. Ke yena mmagwe.’ Solomone o tsebile se ka gobane yoo e bego e le mmago ngwana yoo, o be a mo rata kudu moo a bego a ikemišeditše go mo nea mosadi yo yo mongwe e le gore ngwana yoo a se ke a bolawa. Ge batho ba ekwa kamoo Solomone a rarolotšego bothata bjoo ka gona, ba thaba ka ge ba na le kgoši e bjalo e bohlale.

Nakong ya pušo ya Solomone, Modimo o ile a šegofatša batho ka go dira gore mmu o tšweletše korong e ntši, mabele, diterebe, mago le dijo tše dingwe. Batho ba be ba apara diaparo tše dibotse e bile ba dula ka dintlong tše dibotse. Go be go na le dilo tše dintši tše dibotse bakeng sa batho ka moka.

1 Dikgoši 3:3-28; 4:29-34.



Dipotšišo

  • Ke’ng seo Jehofa a ilego a se botšiša Solomone, gomme o ile a araba bjang?
  • Ka ge Jehofa a be a kgahlilwe ke seo Solomone a se kgopetšego, o ile a holofetša go mo nea eng?
  • Ke bothata bofe bjo bogolo bjoo basadi ba ba babedi ba ilego ba bo tliša go Solomone?
  • Bjalo ka ge o bona mo seswantšhong, Solomone o ile a rarolla bjang bothata bjo?
  • Bophelo bo be bo le bjang nakong ya pušo ya Solomone, gona ka baka la’ng?

Dipotšišo tša tlaleletšo

  • Bala 1 Dikgoši 3:3-28.

    Ke’ng seo banna bao ba filwego boikarabelo ka mokgatlong wa Modimo lehono ba ka ithutago sona mantšung a tšwago pelong a Solomone ao a begilwego go 1 Dikgoši 3:7? (Ps. 119:105; Die. 3:5, 6)

    Ke bjang seo Solomone a ilego a se kgopela e lego mohlala o mobotse wa dilo tša maleba tšeo re ka di rapelelago? (1 Dikg. 3:9, 11; Die. 30:8, 9; 1 Joh. 5:14)

    Tsela yeo Solomone a ilego a rarolla bothata bja basadi ba ba babedi e re nea kgonthišetšo efe mabapi le pušo ya nakong e tlago ya Solomone yo Mogolo Jesu Kriste? (1 Dikg. 3:28; Jes. 9:6, 7; 11:2-4)

  • Bala 1 Dikgoši 4:29-34.

    Jehofa o ile a araba Solomone bjang ge a be a kgopela pelo yeo e kwago? (1 Dikg. 4:29)

    Ka ge batho ba ile ba dira maiteko a go tla go Solomone go tlo kwa bohlale bja gagwe, re swanetše go ba le boemo bofe bja kgopolo ka go ithuta Lentšu la Modimo? (1 Dikg. 4:29, 34; Joh. 17:3; 2 Tim. 3:16)