Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 59: Lebaka la Gore Dafida a Tšhabe

Kgaolo 59: Lebaka la Gore Dafida a Tšhabe

KA MORAGO ga gore Dafida a bolaye Goliata, molaodi yo mogolo wa madira a Baisiraele e lego Abenere o ile a mo tliša go Saulo. Saulo o be a kgahlilwe kudu ke Dafida. O ile a mo dira molaodi wa madira a gagwe gomme a mo tšea gore a tlo dula ka ntlong ya gagwe.

Ka morago ge madira ao a boa go lwa le Bafilisita, basadi ba ile ba opela ba re: ‘Saulo o bolaile ba dikete, eupša Dafida yena o bolaile ba dikete tše masome.’ Se se ile sa dira gore Saulo a be le mona ka gobane Dafida o be a retwa go mo feta. Eupša Jonathane morwa wa Saulo yena o be a se na mona. O be a rata Dafida kudu gomme Dafida le yena a mo rata. Ka gona bobedi bja bona ba ile ba holofetšana gore e tla dula e le bagwera.

Kgoši Saulo o foša lerumo

Dafida o be a tseba go letša harepa gabotse gomme Saulo a rata dikoša tšeo a bego a di letša. Eupša ka letšatši le lengwe, mona wa Saulo o ile wa mo diriša selo se itšego se sešoro. Eitše ge Dafida a sa letša harepa, Saulo a tšea lerumo la gagwe a mo foša ka lona, a re: “Ke tla hlaba Dafida ka mo pataganya le leboto!” Eupša Dafida o ile a le phema gomme la se ke la mo hlaba. Ka morago Saulo a palelwa gape ke go hlaba Dafida ka lerumo la gagwe. Ga bjale Dafida o ile a lemoga gore o swanetše go itlhokomela.

Na o sa gopola kholofetšo yeo Saulo a bego a e dirile? O be a boletše gore o tla tšea morwedi wa gagwe a mo nea monna yo a bego a tla bolaya Goliata. Mafelelong Saulo o ile a botša Dafida gore a ka tšea Mikala morwedi wa gagwe, eupša a re o swanetše go bolaya Bafilisita ba 100 pele. Anke o nagane ka seo! Ruri Saulo o be a holofela gore Bafilisita bao ba be ba tla bolaya Dafida. Eupša ga se ba ka ba mmolaya, ka gona Saulo o ile a nea Dafida morwedi wa gagwe gore e be mosadi wa gagwe.

Ka letšatši le lengwe, Saulo o ile a botša Jonathane le bahlanka ba gagwe ka moka gore o nyaka go bolaya Dafida. Eupša Jonathane a re go tatagwe: ‘O se ke wa bolaya Dafida. Ga se a ka a go dira selo se sebe. Go e na le moo, dilo ka moka tšeo a di dirilego di go thušitše kudu. O ile a bea bophelo bja gagwe kotsing nakong ya ge a be a bolaya Goliata gomme eitše ge o bona seo wa thaba.’

Dafida a phema lerumo

Saulo o ile a theetša morwa wa gagwe gomme a holofetša gore a ka se bolaye Dafida. Dafida a bušetšwa ntlong ya Saulo ke moka a mo hlankela gape go etša peleng. Lega go le bjalo, ka letšatši le lengwe ge Dafida a sa letša harepa, Saulo o ile a mo foša gape ka lerumo la gagwe. Dafida a le phema gomme la hlaba leboto. Le e be e le lekga la boraro Saulo a dira bjalo! Bjale Dafida o ile a tseba gore o swanetše go tšhaba!

Bošegong bjoo, Dafida o ile a ya ntlong ya gagwe. Eupša Saulo a romela banna ba bangwe gore ba yo mmolaya. Mikala o be a tseba seo tatagwe a bego a nyaka go se dira. Ka gona a re go monna wa gagwe: ‘Ge e ba o sa tšhabe bošegong bjo, gosasa o tla ba o hwile.’ Bošegong bjoo Mikala a thuša Dafida go tšwa ka lefasetere gore a tšhabe. Dafida o ile a swanelwa ke go tšama a iphihla gohle ka nywaga e ka bago e šupago e le gore Saulo a se ke a mo hwetša.

1 Samuele 18:1-30; 19:1-18.



Dipotšišo

  • Ke ka baka la’ng Saulo a be a jela Dafida mona, eupša Jonathane morwa wa Saulo yena o be a ikwa bjang ka Dafida?
  • Go ile gwa direga’ng ka letšatši le lengwe ge Dafida a be a leletša Saulo harepa?
  • Saulo o ile a re Dafida o swanetše go dira’ng pele ga ge a ka nyala Mikala morwedi wa gagwe, gona ke ka baka la’ng Saulo a ile a bolela se?
  • Go etša ge seswantšho se se bontšha, go ile gwa direga’ng ge Dafida a be a leletša Saulo harepa ka lekga la boraro?
  • Mikala o ile a thuša Dafida bjang gore a phološe bophelo bja gagwe, gomme ke eng seo Dafida a ilego a swanelwa ke go se dira ka morago ga moo ka nywaga e šupago?

Dipotšišo tša tlaleletšo

  • Bala 1 Samuele 18:1-30.

    Lerato le matla la magareng ga Jonathane le Dafida le bontšhitše bjang e sa le pele lerato la magareng ga “dinku tše dingwe” le “mohlatswana”? (1 Sam. 18:1; Joh. 10:16; Luka 12:32; Sak. 8:23)

    Ka ge ka tlwaelo Jonathane a be a swanetše go tlo hlatlama Saulo e le kgoši, 1 Samuele 18:4 e bontšha bjang go ikokobeletša ga Jonathane motho yo a bego a kgethilwe go tlo ba kgoši?

    Mohlala wa Saulo o bontšha bjang gore mona o ka diriša motho sebe se segolo, gomme se se re nea temošo efe? (1 Sam. 18:7-9, 25; Jak. 3:14-16)

  • Bala 1 Samuele 19:1-17.

    Jonathane o ile a bea bjang bophelo bja gagwe kotsing ge a be a bolela mantšu ao a begilwego go 1 Samuele 19:4, 5? (1 Sam. 19:1, 6)

Ithute ka mo go oketšegilego

Dafida—O Ile a Bota Modimo

Dafida o ile a dira diphošo gomme a lebeletšana le ditlhohlo tše dintši, eupša ga se a ka a tlogela go hlankela Modimo. Mohlala wa gagwe o mobotse o ka go thuša gore o dule o botega.