Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 54: Monna yo Matla Kudu

Kgaolo 54: Monna yo Matla Kudu

NA O tseba leina la monna yo matla kudu yo a kilego a ba gona? Ke moahlodi yo a bego a bitšwa Simisone. O be a newa matla ke Jehofa. Gaešita le pele ga ge Simisone a ka belegwa, Jehofa o ile a botša mmagwe a re: ‘Go se go ye kae o tlo ba le morwa. Ke yena a tlago go phološa Baisiraele go Bafilisita.’

Simisone o lwa le tau

Bafilisita e be e le batho ba babe bao ba bego ba dula Kanana. Ba be ba na le banna ba bantši ba ntwa e bile ba tlaiša Baisiraele kudu. Nakong e nngwe ge Simisone a be a eya moo Bafilisita ba dulago gona, o ile a gahlana le tau e kgolo e rora. Eupša o ile a e bolaya ka diatla tša gagwe feela. O ile a bolaya le Bafilisita ba bantši ba babe.

Ka morago Simisone o ile a ratana le mosadi yo a bego a bitšwa Delila. Baetapele ba Bafilisita ba ile ba holofetša Delila gore yo mongwe le yo mongwe wa bona o tla mo nea ditšhelete tše 1 100 ge e ba a ka ba botša seo se neago Simisone matla. Delila o be a nyaka tšhelete yeo ka moka. E be e se mogwera wa kgonthe wa Simisone goba wa batho ba Modimo. Ka gona o ile a dulela go botšiša Simisone ka seo se bego se mo dira gore a be le matla a magolo.

Delila le Simisone

Mafelelong Delila o ile a kgona go dira gore Simisone a mmotše moo matla a gagwe a bego a etšwa gona. Simisone o ile a re: ‘Moriri wa ka ga se wa ka wa kotwa. Go tloga ge ke be ke belegwa, Modimo o ile a nkgetha gore ke be mohlanka wa gagwe yo a kgethegilego yo a bitšwago Monasari. Ge nka kotwa moriri, matla a ka a tla fela.’

Ge Delila a kwele se, a robatša Simisone diropeng tša gagwe. Ke moka a bitša monna yo a itšego gore a tle a mo kote moriri. Ge Simisone a tsoga, a kwa a feletšwe ke matla. Ka go re’alo Bafilisita ba tla ba mo swara. Ba mo gonya mahlo gomme ba mo dira lekgoba la bona.

Simisone o wiša dikokwane

Ka letšatši le lengwe, Bafilisita ba ile ba dira monyanya o mogolo gore ba rapele Dagoni modimo wa bona ke moka ba ntšha Simisone kgolegong gore ba tle ba bapale ka yena. Ka nako yeo, moriri wa gagwe o be o godile gape. A bolela le mošemane yo a bego a mo hlahla a mo swere ka seatla a re: “Nthuše gore ke phopholetše dikokwane tšeo di thekgilego ntlo ye.” Ke moka Simisone a rapela Jehofa gore a mo nee matla gomme a swara dikokwane tšeo. A goeletša a re: ‘Anke ke hwe le Bafilisita ba.’ Go be go na le Bafilisita ba 3 000 monyanyeng woo, ka gona eitše ge Simisone a kgorometša dikokwane tšeo, ntlo yeo ya wa ya bolaya batho bao ba babe ka moka.

Baahlodi dikgaolo 13 go ya go 16.



Dipotšišo

  • Leina la monna yo matla kudu yo a kilego a phela e be e le mang, gona ke mang yo a bego a mo nea matla?
  • Bjalo ka ge o bona mo seswantšhong, ke eng seo nakong e nngwe Simisone a ilego a se dira tau e kgolo?
  • Simisone o botša Delila sephiri sefe mo seswantšhong, gona seo se ile sa lebiša bjang go swarweng ga gagwe ke Bafilisita?
  • Simisone o ile a bolaya bjang manaba a gagwe a Bafilisita a 3 000 letšatšing leo a hwilego ka lona?

Dipotšišo tša tlaleletšo

  • Bala Baahlodi 13:1-14.

    Manoa le mosadi wa gagwe ba beetše batswadi bjang mohlala o mobotse wa go godiša bana ba bona? (Baa. 13:8; Ps. 127:3; Baef. 6:4)

  • Bala Baahlodi 14:5-9 le 15:9-16.

    Dipego tša gore Simisone o ile a bolaya tau, a kgaola dithapo tše mpsha tšeo a bego a tlemilwe ka tšona le go diriša lerapo la mohlagare wa pokolo e tona go bolaya banna ba 1 000 di utolla’ng mabapi le go šoma ga moya o mokgethwa wa Jehofa?

    Moya o mokgethwa o re thuša bjang lehono? (Baa. 14:6; 15:14; Sak. 4:6; Dit. 4:31)

  • Bala Baahlodi 16:18-31.

    Simisone o ile a kgongwa bjang ke go tlwaelana le batho ba babe, gona re ka ithuta’ng go se? (Baa. 16:18, 19; 1 Bakor. 15:33)