Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 51: Ruthe le Naomi

Kgaolo 51: Ruthe le Naomi

KA Beibeleng o tla hwetša puku yeo e bitšwago Ruthe. E bolela ka lapa leo le phetšego mehleng ya ge Baisiraele ba be ba na le baahlodi. Ruthe e be e le mosadi yo mofsa yo a bego a etšwa nageng ya Moaba; e be e se wa setšhaba sa Modimo sa Isiraele. Eupša ka morago ga gore a ithute ka Jehofa Modimo wa therešo, o ile a mo rata kudu. Naomi e be e le mosadi yo a tsofetšego yoo a ilego a thuša Ruthe go ithuta ka Jehofa.

Naomi e be e le Moisiraele. Yena le monna wa gagwe gotee le barwa ba gagwe ba babedi ba ile ba hudugela nageng ya Moaba nakong ya ge go be go wele tlala Isiraele. Ke moka ka letšatši le lengwe monna wa gagwe o ile a hwa. Ka morago, barwa ba gagwe ba ile ba nyala banenyana ba babedi ba Bamoaba bao ba bego ba bitšwa Ruthe le Oropa. Eupša ka morago ga mo e ka bago nywaga e 10, barwa ba babedi ba Naomi ba ile ba hwa. Ruri Naomi le banenyana bao ba babedi ba ile ba nyama kudu! Bjale Naomi o be a tla dira’ng?

Ka letšatši le lengwe, Naomi o ile a phetha ka gore a tšee leeto le letelele la go boela gae bathong ba gabo. Ka ge Ruthe le Oropa ba be ba nyaka go dula le yena, ba ile ba tloga le yena. Eupša ka morago ga ge ba sepetše sebakanyana, Naomi a retologela go banenyana ba gomme a re go bona: ‘Boelang magagabo lena le yo dula le bommago lena.’

Naomi a ba atla gomme a ba laela. Ge a dira bjalo, ba thoma go lla ka gobane ba be ba mo rata kudu. Ba re go yena: ‘Aowa! Re tla ya le wena bathong ba geno.’ Eupša yena a re go bona: ‘Barwedi ba ka, boelang gae. Go tla ba kaone ge le le gae.’ Ka gona Oropa o ile a boela gae. Eupša Ruthe ga se a ka a dira bjalo.

Naomi a re go Ruthe: ‘Oropa o tlogile. Le wena boela gae le yena.’ Eupša Ruthe a re: ‘O se ke wa leka go ntira gore ke go tlogele! Ntlogele ke sepele le wena. Moo o tlago go ya gona le nna ke tla ya, le gona moo o tlago go dula gona le nna ke tla dula gona. Batho ba geno e tla ba ba gešo gomme Modimo wa gago ya ba Modimo wa ka. Moo o tlago go hwela gona le nna ke tla hwela gona gomme ka bolokelwa moo.’ Ge Ruthe a boletše se, Naomi a lesa go mo gapeletša gore a boele gae.

Mafelelong basadi ba ba babedi ba ile ba fihla Isiraele ke moka ba dula moo. Gateetee Ruthe o ile a thoma go šoma mašemong ka gobane e be e le nako ya go buna mabele. Monna yo a bitšwago Boase o ile a mo dumelela gore a bune mabele mašemong a gagwe. Na o a tseba gore mmago Boase e be e le mang? E be e le Rahaba wa kua motseng wa Jeriko.

Ka letšatši le lengwe Boase o ile a re go Ruthe: ‘Ke boditšwe ditaba tše dintši ka wena le kamoo o swerego Naomi gabotse ka gona. Ke tseba kamoo o tlogetšego tatago, mmago, naga ya geno le kamoo o tlilego wa dula le batho bao o bego o sa ba tsebe. Anke Jehofa a go šegofatše!’

Ruthe a re go Boase: ‘Ruri o mpontšhitše botho mong wa ka. O ntirile gore ke thabe ka tsela e botse yeo o boletšego le nna ka yona.’ Boase o ile a rata Ruthe kudu gomme go se go ye kae ba nyalana. Se se ile sa thabiša Naomi kudu! Eupša Naomi o ile a thaba kudu le go feta ge Ruthe le Boase ba be ba eba le morwa wa pele yo a bego a bitšwa Obede. Ka morago Obede e ile ya ba rakgolo wa Dafida, yoo re tlago go ithuta mo gontši ka yena ka morago.

Ruthe le Naomi

Puku ya Beibele ya Ruthe.



Dipotšišo

  • Go tlile bjang gore Naomi a dule nageng ya Moaba?
  • Ruthe le Oropa e be e le bomang?
  • Ruthe le Oropa ba ile ba arabela bjang ge Naomi a be a ba botša gore ba boele gagabo bona?
  • Boase e be e le mang, gomme o ile a thuša Ruthe le Naomi bjang?
  • Leina la ngwana wa Boase le Ruthe e be e le mang, gona ke ka baka la’ng re sa swanela go mo lebala?

Dipotšišo tša tlaleletšo

  • Bala Ruthe 1:1-17.

    Ruthe o ile a bolela mantšu afe a mabotse ao a bontšhago lerato la kgonthe? (Ruthe 1:16, 17)

    Boemo bja Ruthe bja kgopolo bo bontšha bjang boemo bja kgopolo bjoo “dinku tše dingwe” di nago le bjona ka batlotšwa lefaseng lehono? (Joh. 10:16; Sak. 8:23)

  • Bala Ruthe 2:1-23.

    Ruthe o beetše basadi ba bafsa ba lehono mohlala o mobotse bjang? (Ruthe 2:17, 18; Die. 23:22; 31:15)

  • Bala Ruthe 3:5-13.

    Boase o ile a lebelela bjang go rata ga Ruthe go nyalwa ke yena go e na le gore a nyalwe ke lesogana?

    Boemo bja Ruthe bja kgopolo bo re ruta’ng ka lerato la kgonthe? (Ruthe 3:10; 1 Bakor. 13:4, 5)

  • Bala Ruthe 4:7-17.

    Banna ba Bakriste lehono ba ka swana bjang le Boase? (Ruthe 4:9, 10; 1 Tim. 3:1, 12, 13; 5:8)