Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 47: Lehodu Isiraele

Kgaolo 47: Lehodu Isiraele
Akane o uta dilo tšeo a di utswitšego

BONA seo monna yo a se utago ka tenteng ya gagwe! O uta kobo e botse, gauta le ditsekana tša silifera. O di tšere motseng wa Jeriko. Eupša go be go swanetše gore go dirwe eng ka dilo tša Jeriko? Na o a gopola?

Di be di swanetše go senywa gomme gauta le silifera di išwe mahumong a taberenakeleng ya Jehofa. Eupša batho ba ba be ba se ba kwa Modimo. Ba be ba utswitše dilo tšeo e bego e le tša Modimo. Leina la monna yo a utago dilo ke Akane gomme bao ba nago le yena ke ba bangwe ba lapa la gagwe. Anke re bone seo se ilego sa direga.

Ka morago ga ge Akane a utswitše dilo tše, Joshua o ile a romela banna ba bangwe gore ba yo lwa le motse wa Ai. Eupša ba ile ba fenywa. Ba bangwe ba ile ba bolawa mola ba bangwe ba ile ba tšhaba. Joshua o ile a nyama kudu. A wela fase ka sefahlego gomme a rapela Jehofa a re: ‘Ke ka baka la’ng o dumeletše se se re diragalela?’

Jehofa a araba a re: ‘Ema! Baisiraele ba dirile sebe. Ba tšere tše dingwe tša dilo tšeo di bego di swanetše go senywa goba go išwa taberenakeleng ya Jehofa. Ba utswitše kobo e botse gomme ba e uta. Nka se ke ka le šegofatša go fihlela ge le fedišitše dilo tšeo gotee le motho yo a di tšerego.’ Jehofa o ile a re o tla bontšha Joshua motho yoo yo mobe.

Ka gona Joshua a kgoboketša setšhaba gomme Jehofa a šupa Akane gore ke yena motho yo mobe. Akane a re: ‘Ke sentše. Ke bone kobo e botse, gauta le silifera. Ka di kganyoga kudu moo ke ilego ka di tšea. Le tla di hwetša ke di epetše ka tenteng ya ka.’

Ge dilo tše di hweditšwe gomme di tlišitšwe go Joshua, yena a re go Akane: ‘Ke ka baka la’ng o re tlišeditše mathata? Bjale Jehofa o tla tlišetša wena mathata!’ Ge a re’alo, setšhaba ka moka sa kgatla Akane le ba lapa la gagwe ka maswika ba hwa. Na se ga se bontšhe gore le ka mohla ga se ra swanela go tšea dilo tšeo e sego tša rena?

Ka morago ga moo, Baisiraele ba ile ba yo lwa le Ai gape. Mo nakong ye Jehofa o ile a thuša setšhaba sa gagwe gomme sa fenya ntweng.

Joshua 7:1-26; 8:1-29.



Dipotšišo

  • Mo seswantšhong, ke mang monna yo a utago mahumo ao a tšerwego Jeriko, gomme ke bomang bao ba mo thušago?
  • Ke ka baka la’ng tiro ya Akane le lapa la gagwe e be e le sebe se segolo?
  • Jehofa o ile a re’ng ge Joshua a be a botšiša lebaka leo ka lona Baisiraele ba bego ba fentšwe ntweng kua Ai?
  • Ka morago ga ge Akane le lapa la gagwe ba tlišitšwe go Joshua, ba ile ba diragalelwa ke eng?
  • Kahlolo yeo Akane a ilego a e hwetša e re ruta thuto efe ya bohlokwa?

Dipotšišo tša tlaleletšo

  • Bala Joshua 7:1-26.

    Dithapelo tša Joshua di utolla’ng ka tswalano ya gagwe le Mmopi wa gagwe? (Josh. 7:7-9; Ps. 119:145; 1 Joh. 5:14)

    Mohlala wa Akane o bontšha’ng, gona se ke temošo bjang go rena? (Josh. 7:11, 14, 15; Die. 15:3; 1 Tim. 5:24; Baheb. 4:13)

  • Bala Joshua 8:1-29.

    Ke boikarabelo bofe bjo re nago le bjona ka phuthegong ya Bokriste lehono? (Josh. 7:13; Lef. 5:1; Die. 28:13)