Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 46: Merako ya Jeriko

Kgaolo 46: Merako ya Jeriko

KE ENG seo se dirago gore merako ye ya Jeriko e we? Go bjalo ka ge eka e thuthupišitšwe ke pomo e kgolo. Eupša batho ba mehleng yeo ba be ba se na dipomo; e bile ba be ba se na dithunya. Wo e be e le mohlolo o mongwe o tšwago go Jehofa! Anke re ithute kamoo se se diregilego ka gona.

Merako ya Jeriko e a wa

Ekwa seo Jehofa a se botšago Joshua. O re go yena: ‘Wena le banna ba gago ba ntwa le dikologe motse wa Jeriko. Le o dikologe gatee letšatši le lengwe le le lengwe matšatšing a tshelelago. Le rwale areka ya kgwerano. Baperisita ba šupago ba swanetše go e eta pele gomme ba letše dinaka tša bona.

‘Ka letšatši la bošupa le dikologe motse gašupa. Baperisita ba letše dinaka tša bona kudu gomme setšhaba ka moka se hlabe mokgoši o mogolo wa ntwa. Ke moka merako ya Jeriko e tla wa!’

Joshua le setšhaba ba dira seo Jehofa a se boletšego. Ge ba dutše ba dikologa motse, bohle ba be ba homotše ba itše tuu! Go be go kwala feela medumo ya dinaka le mešito ya maoto. Manaba a setšhaba sa Modimo a Jeriko a swanetše go ba a ile a tšhoga. Na o a e bona thapo e khwibidu yeo e lekeletšego mola lefasetereng? Ke lefasetere la ntlo ya mang? Ee, Rahaba o be a dirile seo dihlodi tšela tše pedi di bego di mmoditše gore a se dire. Yena gotee le ba lapa labo ka moka ba be ba le ka moo ntlong ba bogetše.

Joshua

Mafelelong ka letšatši la bošupa ka morago ga ge ba dikologile motse woo gašupa, baperisita ba ile ba letša dinaka tša bona gomme banna ba ntwa ba hlaba mokgoši, ke moka merako ya napa ya wa. Bjale Joshua a re: ‘Bolayang bohle bao ba lego motseng gomme le o fiše ka mollo. Fišang dilo ka moka. Le tšee feela silifera, gauta, koporo le tšhipi gomme le di iše mahumong a tenteng ya Jehofa.’

Joshua a re go dihlodi tšela tše pedi: ‘Tsenang ntlong ya Rahaba gomme le mo ntšhe go yona gotee le ba lapa labo.’ Rahaba le ba lapa labo ba ile ba phološwa, bjalo ka ge dihlodi tšeo di be di mo holofeditše.

Joshua 6:1-25.



Dipotšišo

  • Jehofa o ile a botša banna ba ntwa le baperisita gore ba dire’ng ka matšatši a tshelelago?
  • Ke’ng seo banna bao ba bego ba swanetše go se dira ka letšatši la bošupa?
  • Go etša ge o bona mo seswantšhong, ke eng seo se diregago ka merako ya Jeriko?
  • Ke ka baka la’ng go na le thapo e khwibidu yeo e lekeletšego lefasetereng?
  • Joshua o ile a botša banna ba gagwe ba ntwa gore ba dire’ng ka batho ba Jeriko le ka motse woo, eupša o ile a re ba dire’ng ka silifera, gauta, koporo le tšhipi?
  • Ke’ng seo dihlodi tšela tše pedi di ilego tša botšwa gore di se dire?

Dipotšišo tša tlaleletšo

  • Bala Joshua 6:1-25.

    Go dikologa ga Baisiraele motse wa Jeriko ka letšatši la bošupa go swana bjang le mediro ya go ruta ya Dihlatse tša Jehofa mehleng ye ya bofelo? (Josh. 6:15, 16; Jes. 60:22; Mat. 24:14; 1 Bakor. 9:16)

    Boporofeta bjo bo begilwego go Joshua 6:26 bo ile bja phethagala bjang nywageng e ka bago e 500 ka morago, gomme se se re ruta’ng ka lentšu la Jehofa? (1 Dikg. 16:34; Jes. 55:11)