Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 45: Go Tshela Noka ya Jorodane

Kgaolo 45: Go Tshela Noka ya Jorodane

BONA! Baisiraele ba tshela Noka ya Jorodane! Eupša meetse a noka ye a kae? Ka ge dipula di be di ena kudu nakong ye ya ngwaga, noka ye e be e tletše kudu metsotsong e sego kae pele ga moo. Eupša ga bjale meetse ao a be a se gona! Baisiraele ba sepela mo go omilego go swana le ge ba ile ba dira bjalo Lewatleng le Lehwibidu! Meetse ao ka moka a ile kae? Anke re bone.

Baisiraele ba tshela Noka ya Jorodane

Nakong ya ge Baisiraele ba tlo tshela Noka ya Jorodane, Jehofa o ile a re Joshua a botše setšhaba a re: ‘Baperisita ba swanetše go rwala areka ya kgwerano gomme ba re ete pele. E tla re ge dinao tša bona di gata ka meetseng a Noka ya Jorodane, meetse ao a tla ema.’

Ka go re’alo, baperisita ba rwala areka ya kgwerano gomme ba eta setšhaba pele. Ge ba fihla Nokeng ya Jorodane, ba gata meetse a yona. E be e ela ka matla e bile e iša fase kudu. Eupša eitše ge dinao tša bona di kgoma meetse ao, a ema! E be e le mohlolo! Jehofa o ile a emiša meetse ao a etša letamo. Gateetee ke ge noka yeo e se sa na meetse!

Baperisita bao ba bego ba rwele areka ya kgwerano ba ile ba tsena ka gare ga noka e omilego. Na o a ba bona mo seswantšhong? Ge ba sa eme gona moo, Baisiraele ka moka ba ile ba tshela Noka ya Jorodane ba sepela mo go omilego!

Ge ba tshetše ka moka, Jehofa o ile a botša Joshua gore a bolele le banna ba 12 ba matla a re: ‘Eyang kamoo nokeng moo baperisita ba emego gona ba rwele areka ya kgwerano. Le itšeele maswika a 12 gomme le a bee moo le tlago go robala gona bošegong bjo. E tla re nakong e tlago ge bana ba lena ba le botšiša seo se bolelwago ke maswika a, la ba botša gore meetse a noka ye a kile a ema nakong ya ge areka ya kgwerano ya Jehofa e be e tshela Jorodane. Maswika a a tla le gopotša mohlolo wo!’ Le gona Joshua o ile a hloma maswika a mangwe a 12 moo baperisita ba bego ba eme gona gare ga noka.

Joshua

Mafelelong Joshua a botša baperisita bao ba bego ba rwele areka ya kgwerano a re: ‘Etšwang ka moo Nokeng ya Jorodane.’ Eitše gateetee ge ba tšwile, noka yeo ya thoma go ela gape go etša pele.

Joshua 3:1-17; 4:1-18.



Dipotšišo

  • Ke mohlolo ofe woo Jehofa a ilego a o dira e le gore Baisiraele ba tle ba kgone go tshela Noka ya Jorodane?
  • Ke tiro efe ya go bontšha tumelo yeo Baisiraele ba ilego ba swanelwa ke go e dira e le gore ba tle ba tshele Noka ya Jorodane?
  • Ke ka baka la’ng Jehofa a ile a botša Joshua gore a tšee maswika a 12 a magolo ka nokeng?
  • Go ile gwa direga’ng gateetee ge baperisita ba tšwile ka Nokeng ya Jorodane?

Dipotšišo tša tlaleletšo

  • Bala Joshua 3:1-17.

    Go etša ge pego ye e bontšha, ke eng seo re swanetšego go se dira e le gore Jehofa a tle a re thuše le go re šegofatša? (Josh. 3:13, 15; Die. 3:5; Jak. 2:22, 26)

    Noka ya Jorodane e be e le bjang ge Baisiraele ba be ba tshelela Nageng ya Kholofetšo, gomme se se ile sa godiša bjang leina la Jehofa? (Josh. 3:15; 4:18; Ps. 66:5-7)

  • Bala Joshua 4:1-18.

    Maswika a 12 ao a ilego a tšewa Nokeng ya Jorodane gomme a bewa Giligala a ile a phetha morero ofe? (Josh. 4:4-7)