Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 43: Joshua e ba Moetapele

Kgaolo 43: Joshua e ba Moetapele

MOSHE o be a nyaka go tsena nageng ya Kanana le Baisiraele. Ka gona o ile a kgopela Jehofa a re: ‘Ntumelele ke tshele Noka ya Jorodane gomme ke yo bona naga e botse.’ Eupša Jehofa a re: ‘Homola! O se sa hlwa o bolela le nna gape ka taba ye!’ Na o a tseba gore ke ka baka la’ng Jehofa a ile a bolela bjalo?

Ke ka baka la seo se ilego sa direga nakong ya ge Moshe a be a itia leswika. Gopola gore yena le Arone ba ile ba se ke ba godiša Jehofa. Ga se ba ka ba botša setšhaba gore ke Jehofa a bego a ntšhitše meetse leswikeng. Ka baka leo, Jehofa o ile a re a ka se ba dumelele go tsena nageng ya Kanana.

Bjale dikgwedi tše sego kae ka morago ga ge Arone a hwile, Jehofa o ile a re go Moshe: ‘Tšea Joshua gomme o mo emiše pele ga moperisita Eleasara le pele ga setšhaba. Ke moka gona moo pele ga bona ka moka, o botše setšhaba ka moka gore Joshua ke moetapele yo mofsa.’ Moshe o ile a dira seo Jehofa a se boletšego, go etša ge o ka bona mo seswantšhong.

Moshe o bolela gore Joshua ke moetapele

Ke moka Jehofa a re go Joshua: ‘Tia matla gomme o se ke wa boifa. O tla etelela Baisiraele pele go tsena nageng ya Kanana yeo ke ba holofeditšego yona, e bile ke tla ba le wena.’

Ka morago Jehofa o ile a botša Moshe gore a rotogele godimo ga Thaba ya Nebo yeo e lego nageng ya Moaba. Gona moo, Moshe o ile a kgona go lebelela ka mošola wa Noka ya Jorodane gomme a bona naga e botse ya Kanana. Jehofa a re go yena: ‘Ye ke naga yeo ke holofeditšego go e nea bana ba Aborahama, Isaka le Jakobo. Ke go dumeletše go e bona, eupša nka se go dumelele go tsena go yona.’

Moshe o ile a hwela gona moo godimo ga Thaba ya Nebo. O be a na le nywaga e 120. O be a sa na le matla e bile mahlo a gagwe a be a sa bona gabotse. Setšhaba sa nyama kudu gomme sa lla ka gobane Moshe a hwile. Eupša sa thabišwa ke gore Joshua e be e le moetapele wa sona yo mofsa.

Numeri 27:12-23; Doiteronomio 3:23-29; 31:1-8, 14-23; 32:45-52; 34:1-12.



Dipotšišo

  • Banna ba babedi bao ba emego le Moshe mo seswantšhong ke bomang?
  • Ke’ng seo Jehofa a ilego a se botša Joshua?
  • Ke ka baka la’ng Moshe a ile a rotogela godimo ga Thaba ya Nebo, gomme Jehofa o ile a mmotša eng gona moo?
  • Moshe o hwile a na le nywaga e mekae?
  • Ke ka baka la’ng setšhaba se ile sa nyama, eupša se be se na le lebaka lefe la go thaba?

Dipotšišo tša tlaleletšo

  • Bala Numeri 27:12-23.

    Ke modiro ofe o mogolo woo Joshua a ilego a o newa ke Jehofa, gomme re bona bjang gore Jehofa o hlokomela batho ba Gagwe lehono? (Num. 27:15-19; Dit. 20:28; Baheb. 13:7)

  • Bala Doiteronomio 3:23-29.

    Ke ka baka la’ng Jehofa a ile a se dumelele Moshe le Arone go tsena nageng ya kholofetšo, gomme ke thuto efe yeo re ka ithutago yona go se? (Doit. 3:25-27; Num. 20:12, 13)

  • Bala Doiteronomio 31:1-8, 14-23.

    Mantšu a Moshe a go laelana le Baisiraele a bontšha bjang gore o ile a amogela tayo e tšwago go Jehofa ka boikokobetšo? (Doit. 31:6-8, 23)

  • Bala Doiteronomio 32:45-52.

    Lentšu la Modimo le swanetše go kgoma bjang maphelo a rena? (Doit. 32:47; Lef. 18:5; Baheb. 4:12)

  • Bala Doiteronomio 34:1-12.

    Gaešita le ge Moshe a se a ka a bona Jehofa, Doiteronomio 34:10 e bontšha’ng mabapi le tswalano ya gagwe le Jehofa? (Ek. 33:11, 20; Num. 12:8)

Ithute ka mo go Oketšegilego

DIKARATA TŠA BATHO BA KA BEIBELENG

Karata ya Beibele ya Joshua

Joshua le madira a gagwe ba ile ba wiša bjang merako ya Jeriko? Printha karata ye ya Beibele gomme o ithute ka mo go oketšegilego ka motho yo wa ka Beibeleng yo a bego a na le sebete.