Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 41: Noga ya Koporo

Kgaolo 41: Noga ya Koporo
Moshe le noga ya koporo

NA NOGA yeo e tateditšwego koteng mo seswantšhong ke ya kgonthe? Aowa. Ke noga yeo e dirilwego ka koporo. Jehofa o ile a botša Moshe gore a e fege koteng e le gore batho ba e lebelele gomme ba phele. Eupša dinoga tše dingwe tšeo di lego mo fase ke tša kgonthe. Di be di loma batho gomme di dira gore ba babje. Na o a tseba gore ke ka baka la’ng?

Ke ka gobane Baisiraele ba be ba boletše gampe ka Modimo le ka Moshe. Ba ile ba ngongorega ba re: ‘Le re’ng le re ntšhitše Egipita gore re tlo hwela mo lešokeng? Mo ga go na dijo goba meetse. E bile re lapišitšwe ke go ja manna a.’

Eupša manna e be e le dijo tše dibose. Jehofa o be a ba neile ona ka mohlolo. Le gona o be a ile a ba nea meetse ka mohlolo. Eupša setšhaba se be se sa leboge tsela yeo Modimo a bego a se hlokomela ka yona. Ka gona Jehofa o ile a romela dinoga tše tšeo di nago le mpholo gore a otle Baisiraele. Dinoga tše di ile tša ba loma gomme ba bantši ba bona ba hwa.

Baisiraele ba lomilwe ke dinoga

Mafelelong setšhaba se ile sa tla go Moshe gomme sa re: ‘Re dirile sebe, ka gobane re boletše gampe ka wena le ka Jehofa. Bjale re rapelele go Jehofa gore a tloše dinoga tše.’

Ka gona Moshe o ile a rapelela setšhaba. Jehofa a mmotša gore a dire noga ye ya koporo. A re a e fege koteng, le gore motho le ge e le ofe yo a lomilwego ke noga a e lebelele. Moshe a dira seo Modimo a se boletšego. Ka gona batho bao ba bego ba lomilwe ba ile ba lebelela noga yeo ya koporo gomme ba fola.

Go na le seo re ithutago sona tabeng ye. Ka tsela e itšego, ka moka ga rena re boemong bjo bo swanago le bja Baisiraele bao ba bego ba lomilwe ke dinoga. Ka moka ga rena re a hwa. Lebelela gohle mo o dulago, o tla bona gore batho ba a tšofala, ba a babja e bile ba a hwa. Se ke ka gobane monna wa pele le mosadi wa pele e lego Adama le Efa, ba ile ba furalela Jehofa gomme ka moka ga rena re bana ba bona. Eupša Jehofa o butše tsela e le gore re tle re phele ka mo go sa felego.

Jehofa o ile a romela Morwa wa gagwe e lego Jesu Kriste mo lefaseng. Jesu o ile a fegwa koteng ka ge batho ba bantši ba be ba nagana gore ke yo mobe. Eupša Jehofa o re neile Jesu gore a re phološe. Ge e ba re ithuta go yena e bile re mo latela, gona re tla hwetša bophelo bjo bo sa felego. Eupša ka moragonyana re tla ithuta ka mo go oketšegilego ka taba ye.

Numeri 21:4-9; Johane 3:14, 15.



Dipotšišo

  • Mo seswantšhong, ke eng se se tateditšwego koteng, gomme ke ka baka la’ng Jehofa a ile a botša Moshe gore a e fege moo?
  • Setšhaba se ile sa bontšha bjang gore ga se leboge dilo ka moka tšeo Modimo a bego a se diretše tšona?
  • Baisiraele ba ile ba kgopela Moshe gore a dire’ng ka morago ga ge Jehofa a rometše dinoga tše tšeo di nago le mpholo gore di tle di ba lome?
  • Ke ka baka la’ng Jehofa a ile a botša Moshe gore a dire noga ya koporo?
  • Re ka ithuta thuto efe tiragalong ye?

Dipotšišo tša tlaleletšo

  • Bala Numeri 21:4-9.

    Ke temošo efe yeo re e newago tabeng ya go ngongorega ga Baisiraele ka ditokišetšo tšeo di tšwago go Jehofa? (Num. 21:5, 6; Baroma 2:4)

    Baisiraele ba ile ba dira’ng ka noga ya koporo nywagakgolong ya ka morago, gomme ke kgato efe yeo Kgoši Hesekia a ilego a e tšea? (Num. 21:9; 2 Dikg. 18:1-4)

  • Bala Johane 3:14, 15.

    Go fegwa ga noga ya koporo koteng ya seswantšhetšo go ile gwa swantšhetša bjang go kokotelwa ga Jesu Kriste koteng? (Bagal. 3:13; 1 Pet. 2:24)