Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 40: Moshe o Itia Leswika

Kgaolo 40: Moshe o Itia Leswika

GO ILE gwa feta nywaga e mentši—e 10, e 20, e 30 le e 39. Baisiraele ba be ba sa dutše ba le lešokeng. Eupša nywageng yeo ka moka, Jehofa o ile a hlokomela setšhaba sa gagwe. O be a se fepa ka manna. O be a se eta pele ka thololo ya leru mosegare gomme bošego a se eta pele ka thololo ya mollo. Le gona nywageng yeo ka moka, diaparo tša sona ga se tša ka tša onala e bile maoto a sona ga se a ka a ruruga.

Ga bjale ke kgwedi ya pele ya ngwaga wa bo-40 ga e sa le Baisiraele ba tlogile Egipita. Ba ile ba hloma mešaša ya bona gape Kadeshe. Mo ke moo ba bego ba le gona ge dihlodi tše 12 di be di romelwa go yo hlola naga ya Kanana mo e ka bago nywaga e 40 e fetilego. Miriamo kgaetšedi ya Moshe o ile a hwela gona mo Kadeshe. Ka gona go etša peleng, mo Kadeshe go ile gwa ba le mathata.

Setšhaba se ile sa se hwetše meetse. Ka gona sa ngongoregela Moshe sa re: ‘Go ka ba go bile kaone ge nkabe re hwile. Ke ka baka la’ng o re ntšhitše Egipita wa re tliša lefelong le le lebe leo go sa melego selo go lona? Ga go na mabele, mago, diterebe le digarenate. E bile ga go na le ka meetse a go nwa.’

Moshe o itia leswika

Ge Moshe le Arone ba be ba eya taberenakeleng go yo rapela, Jehofa o ile a re go Moshe: ‘Kgoboketša setšhaba. Ke moka o bolele le leswika lela pele ga sona ka moka. Go tla tšwa meetse a lekanego go lona bakeng sa setšhaba le diruiwa tša sona ka moka.’

Ka gona Moshe a kgoboketša setšhaba gomme a re go sona: ‘Theetšang lena batho ba go se bote Modimo! Na le nyaka gore nna le Arone re le ntšhetše meetse leswikeng le?’ Ke moka Moshe a itia leswika leo ka lepara gabedi gomme gwa tšwa meetse a mantši go lona. Gwa ba le meetse a lekanego bakeng sa setšhaba le diruiwa ka moka.

Eupša Jehofa o ile a galefela Moshe le Arone. Na o a tseba gore ke ka baka la’ng? Ke ka gobane Moshe le Arone ba boletše gore bona ba be ba tla ntšha meetse leswikeng leo. Ge e le gabotse, Jehofa ke yena yo a bego a a ntšhitše. Le gona, ka baka la ge Moshe le Arone ba se ba bolela therešo ka taba ye, Jehofa o ile a re o tlo ba otla. A re go bona: ‘Le ka se tsenye setšhaba sa ka nageng ya Kanana.’

Go se go ye kae, Baisiraele ba ile ba tloga Kadeshe. Ka moragonyana, ba fihla Thabeng ya Horo. Arone o ile a hwela gona moo godimo ga thaba. O be a na le nywaga e 123 ge a ehwa. Baisiraele ba nyama kudu gomme ba llela Arone matšatši a 30. Eleasara morwa wa gagwe o ile a ba moperisita yo mogolo wa setšhaba sa Isiraele.

Numeri 20:1-13, 22-29; Doiteronomio 29:5.



Dipotšišo

  • Jehofa o ile a hlokomela Baisiraele bjang ge ba be ba le lešokeng?
  • Baisiraele ba ile ba ngongorega ka eng ge ba be ba hlomile mešaša Kadeshe?
  • Jehofa o ile a nea bjang setšhaba le diruiwa tša sona meetse?
  • Ke mang monna yo a itšhupilego mo seswantšhong, gomme ke ka baka la’ng a ile a itšhupa?
  • Ke ka baka la’ng Jehofa a ile a galefela Moshe le Arone, gona ba ile ba otlwa bjang?
  • Ke’ng seo se ilego sa direga Thabeng ya Horo, gomme ke mang yo ka morago a ilego a ba moperisita yo mogolo wa Isiraele?

Dipotšišo tša tlaleletšo

  • Bala Numeri 20:1-13, 22-29 le Doiteronomio 29:5.

    Re ithuta’ng tseleng yeo ka yona Jehofa a ilego a hlokomela Baisiraele lešokeng? (Doit. 29:5; Mat. 6:31; Baheb. 13:5; Jak. 1:17)

    Jehofa o ile a re’ng ge Moshe le Arone ba be ba palelwa ke go mo kgethagatša pele ga setšhaba sa Isiraele? (Num. 20:12; 1 Bakor. 10:12; Kut. 4:11)

    Re ka ithuta’ng tseleng yeo Moshe a ilego a arabela ka yona tayong yeo a ilego a e newa ke Jehofa? (Num. 12:3; 20:12, 27, 28; Doit. 32:4; Baheb. 12:7-11)

Ithute ka mo go oketšegilego

FEBRUARY 2013 Seo re Ithutago Sona go Moshe

Hlahloba tše tharo tša dika tše dibotse tšeo Moshe a di bontšhitšego le seo re ka ithutago sona mohlaleng wa gagwe.