Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 37: Tente ya Borapedi

Kgaolo 37: Tente ya Borapedi

NA O a tseba gore moago wo ke eng? Ke tente e kgethegilego bakeng sa go rapela Jehofa. E bile e bitšwa taberenakele. Setšhaba se ile sa fetša go e aga ka morago ga ngwaga se tlogile Egipita. Na o a tseba gore ke mang yo a ilego a re e agwe?

Taberenakele

Ke Jehofa. Nakong ya ge Moshe a be a le Thabeng ya Sinai, Jehofa o ile a mmotša kamoo a swanetšego go e aga ka gona. O ile a mmotša gore a e dire ka tsela yeo go bego go tla ba bonolo go e hlahlamolla. Ka go re’alo, dikarolo tša yona di be di ka rwalwa ge go iwa lefelong le lengwe gomme ge ba fihla moo tša kgomaganywa gape. Ka gona ge Baisiraele ba be ba tloga lefelong le lengwe ba eya go le lengwe lešokeng, ba be ba rwala tente yeo.

Ge o ka lebelela ka phapošing e nyenyane yeo e lego mafelelong a tente ye, o tla bona lepokisi. Le be le bitšwa areka ya kgwerano. Le be le na le barongwa ba babedi goba bakerubi bao ba dirilwego ka gauta, yo mongwe a le ka lehlakoreng le lengwe gomme yo mongwe a le ka go le lengwe. Modimo o ile a ngwala Melao e Lesome gape diphaphathing tše pedi tša maswika, ka gobane Moshe o be a pšhatlile tšela tša pele. Ka gona maswika ao a be a bolokilwe ka arekeng ya kgwerano. Sebjana seo se bego se na le manna le sona se be se bolokilwe ka go yona. Na o a gopola gore manna ke eng?

Arone ngwanabo Moshe ke yena yoo Jehofa a ilego a mo kgetha gore e be moperisita yo mogolo. O be a etelela setšhaba pele go rapeleng Jehofa. Barwa ba gagwe le bona e be e le baperisita.

Bjale lebelela ka phapošing e kgolo ya tente. Ke e kgolo go feta phapoši yela e nyenyane gabedi. Na o bona lepokisi le lenyenyane leo muši o thunyago o etšwa go lona? Lepokisi le ke aletare yeo baperisita ba bego ba fišetša go lona dilo tše di nkgago bose tšeo di bitšwago diorelo. Go bile go na le sehlomapone seo se nago le mabone a šupago. Selo sa boraro ka phapošing yeo ke tafola. Godimo ga yona go be go beilwe dinkgwa tše 12.

Ka jarateng ya taberenakele go be go na le moruswi o mogolo goba sebjana seo se tletšego meetse. Baperisita ba be ba hlapela ka go sona. Go be go bile go na le aletare e kgolo. Mo ke moo diphoofolo tše di bolailwego di bego di fišetšwa Jehofa e le sebego. Tente ye e be e le gare ga mešaša gomme Baisiraele ba be ba dula ka ditenteng tša bona go e dikologa.

Ekisodo 25:8-40; 26:1-37; 27:1-8; 28:1; 30:1-10, 17-21; 34:1, 2; Baheberu 9:1-5.



Dipotšišo

  • Moago wo o lego mo seswantšhong o bitšwa eng, gomme o be o dirišetšwa eng?
  • Ke ka baka la’ng Jehofa a ile a botša Moshe gore a dire tente ye ka tsela yeo go bego go tla ba bonolo go e hlahlamolla?
  • Lepokisi leo le lego ka phapošing e nyenyane yeo e lego mafelelong a tente ye ke eng, gomme le be le na le eng?
  • Jehofa o ile a kgetha mang gore e be moperisita yo mogolo, gona mošomo wa moperisita yo mogolo e be e le ofe?
  • Bolela dilo tše tharo tšeo di lego ka phapošing e kgolo ya tente ye.
  • Ke dilo dife tše pedi tšeo di bego di le ka jarateng ya taberenakele, gomme di be di dirišetšwa eng?

Dipotšišo tša tlaleletšo

  • Bala Ekisodo 25:8-40; 26:1-37; 27:1-8 le 28:1.

    Bakerubi bao ba bego ba le “arekeng yeo e nago le diphaphathi tša bohlatse” ba be ba swantšhetša eng? (Ek. 25:20, 22; Num. 7:89; 2 Dikg. 19:15)

  • Bala Ekisodo 30:1-10, 17-21; 34:1, 2 le Baheberu 9:1-5.

    Ke ka baka la’ng Jehofa a ile a gatelela bohlokwa bja gore baperisita bao ba bego ba hlankela taberenakeleng ba dule ba hlwekile mmeleng, gomme se se swanetše go re ruta eng lehono? (Ek. 30:18-21; 40:30, 31; Baheb. 10:22)

    Moapostola Paulo o bontšha bjang gore taberenakele le kgwerano ya Molao di be di se sa šoma nakong ya ge a be a ngwala lengwalo la gagwe leo le yago go Bakriste ba Baheberu? (Baheb. 9:1, 9; 10:1)