AOWII! Bjale setšhaba se se dira eng? Se rapela namane! Ke ka baka la’ng se be se dira seo?

Ge Moshe a be a dutše nako e telele thabeng, setšhaba se ile sa re: ‘Ga re tsebe seo se diragaletšego Moshe. A re direng modimo yo a tlago go re eta pele a re ntšha nageng ye.’

Moshe o lahlela fase diphaphathi tše pedi tša maswika

Arone ngwanabo Moshe a re: ‘Go lokile. Rolang mangina a lena a gauta le a tlišeng mo go nna.’ Ge setšhaba se dirile seo, Arone o ile a a tološa gomme a dira namane ya gauta ka ona. Setšhaba sa re: ‘Yo ke Modimo wa rena yo a re etilego pele a re ntšha nageng ya Egipita!’ Ke moka Baisiraele ba ba le monyanya o mogolo gomme ba rapela namane yeo ya gauta.

Ge Jehofa a bona se, a galefa kudu. Ka gona a re go Moshe: ‘Theoga ka go akgofa. Setšhaba se sentše. Se lebetše melao ya ka gomme se khunamela namane ya gauta.’

Batho ba rapela namane ya gauta

Moshe a theoga thabeng ka go akgofa. Ge a batamela, a bona se se latelago: Setšhaba se be se opela e bile se bina go dikologa namane ya gauta! Moshe o ile a galefa kudu moo a ilego a lahlela fase diphaphathi tše pedi tša maswika tšeo di bego di na le melao gomme tša pšhatlega tša tšwa diripanaripana. Ka morago ga moo, a tšea namane yeo ya gauta a e tološa. Ke moka a e šilakanya go fihlela e eba lerole.

Setšhaba seo se be se dirile selo se sebe kudu. Ka gona Moshe o ile a botša ba bangwe ba banna gore ba itlhame ka ditšhoša tša bona. A re go bona: ‘Batho ba babe bao ba rapetšego namane ya gauta ba swanetše go hwa.’ Ka gona banna bao ba bolaya batho ba 3 000. Na se ga se bontšhe gore re swanetše go kgonthišetša gore re rapela Jehofa a nnoši, e sego medimo e mengwe ya maaka?

Ekisodo 32:1-35.



Dipotšišo

  • Batho ba mo seswantšhong ba dira’ng, gona ka baka la’ng?
  • Ke ka baka la’ng Jehofa a ile a galefa, gomme Moshe o ile a dira’ng ge a bona seo batho ba ba bego ba se dira?
  • Ke’ng seo Moshe a ilego a botša ba bangwe ba banna gore ba se dire?
  • Tiragalo ye e swanetše go re ruta thuto efe?

Dipotšišo tša tlaleletšo

  • Bala Ekisodo 32:1-35.

    Pego ye e bontšha bjang pono ya Jehofa mabapi le go kopanya bodumedi bja maaka le borapedi bja therešo? (Ek. 32:4-6, 10; 1 Bakor. 10:7, 11)

    Bakriste ba swanetše go ba šedi ka eng ge ba kgetha boithabišo, bjalo ka go opela le go bina? (Ek. 32:18, 19; Baef. 5:15, 16; 1 Joh. 2:15-17)

    Moloko wa Lefi o beile bjang mohlala o mobotse wa go emela go loka? (Ek. 32:25-28; Ps. 18:25)