Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 35: Jehofa o Nea Melao ya Gagwe

Kgaolo 35: Jehofa o Nea Melao ya Gagwe

MO E ka bago dikgwedi tše pedi ka morago ga gore Baisiraele ba tloge Egipita, ba ile ba fihla Thabeng ya Sinai, yeo gape e bego e bitšwa Horebe. Mo ke gona mola Jehofa a ilego a bolela le Moshe sehlareng seo se bego se tuka mollo. Setšhaba se ile sa hloma mešaša moo gomme sa dula ka nakwana.

Ge setšhaba se be se letile moo pele ga thaba, Moshe o ile a rotogela thabeng. Gona moo godimo ga thaba, Jehofa o ile a mmotša gore O nyaka gore Baisiraele ba Mo kwe le go ba setšhaba sa Gagwe seo se kgethegilego. Ge Moshe a boile, a botša Baisiraele seo Jehofa a se boletšego. Ke moka setšhaba sa re se tla kwa Jehofa, ka gobane se be se nyaka go ba setšhaba sa Gagwe.

Bjale Jehofa o ile a dira selo seo se makatšago. A dira gore thaba yeo e thunye muši gomme go be le modumo o mogolo wa magadima. Le gona a bolela le setšhaba a re: ‘Ke nna Jehofa Modimo wa lena yo a le ntšhitšego nageng ya Egipita.’ Ke moka a se laela a re: ‘Le se ke la rapela medimo le ge e le efe e mengwe ka ntle le nna.’

Diphaphathi tše pedi tša leswika

Modimo o ile a nea Baisiraele ditaelo tše dingwe tše senyane goba melao. Setšhaba se be se tšhogile kudu. Sa re go Moshe: ‘Wena bolela le rena, ka gobane re boifa gore ge Modimo a ka bolela le rena re ka hwa.’

Ka morago ga moo, Jehofa a re go Moshe: ‘Rotogela mono go nna thabeng. Ke tla go nea diphaphathi tše pedi tša maswika tšeo go tšona ke ngwadilego melao yeo ke nyakago gore setšhaba se se e boloke.’ Ka gona Moshe a rotogela thabeng gape. A dula moo matšatši a 40 le mašego a ona.

Modimo o be a na le melao e mentšintši bakeng sa setšhaba sa gagwe. Moshe o ile a e ngwala. Modimo o ile a ba a nea Moshe diphaphathi tše pedi tša maswika. Maswikeng ao, Modimo ka boyena o be a ngwadile melao e 10 yeo a bego a e boditše setšhaba ka moka. E be e bitšwa Melao e Lesome.

Moshe Thabeng ya Sinai

Melao e Lesome ke melao e bohlokwa kudu. Eupša go bjalo le ka melao e mengwe e mentši yeo Modimo a bego a e neile Baisiraele. O mongwe wa melao yeo ke wo o rego: ‘O rate Jehofa Modimo wa gago ka pelo ya gago ka moka, ka monagano wa gago ka moka, ka moya wa gago ka moka le ka matla a gago ka moka.’ O mongwe gape ke wo o rego: ‘O rate moagišani wa gago ka mokgwa wo o ithatago ka wona.’ Morwa wa Modimo e lego Jesu Kriste o boletše gore ye ke yona melao e mebedi e megologolo yeo Jehofa a ilego a e nea setšhaba sa gagwe sa Isiraele. Ka moragonyana re tla ithuta dilo tše dintši ka Morwa yo wa Modimo le dithuto tša gagwe.

Ekisodo 19:1-25; 20:1-21; 24:12-18; 31:18; Doiteronomio 6:4-6; Lefitiko 19:18; Mateo 22:36-40.



Dipotšišo

  • Baisiraele ba ile ba hloma mešaša kae mo e ka bago dikgwedi tše pedi ka morago ga ge ba tlogile Egipita?
  • Ke’ng seo Jehofa a ilego a re o nyaka gore Baisiraele ba se dire, gomme ba ile ba arabela bjang?
  • Ke ka baka la’ng Jehofa a ile a nea Moshe diphaphathi tše pedi tša maswika?
  • Ka ntle le Melao e Lesome, ke melao efe e mengwe yeo Jehofa a ilego a e nea Baisiraele?
  • Ke melao efe e mebedi yeo Jesu Kriste a ilego a re ke e megologolo?

Dipotšišo tša tlaleletšo

  • Bala Ekisodo 19:1-25; 20:1-21; 24:12-18 le 31:18.

    Mantšu ao a begilwego go Ekisodo 19:8 a re thuša bjang go kwešiša seo se akaretšwago ge motho a ineela gore e be Mokriste? (Mat. 16:24; 1 Pet. 4:1-3)

  • Bala Doiteronomio 6:4-6; Lefitiko 19:18 le Mateo 22:36-40.

    Bakriste ba bontšha bjang gore ba rata Modimo le moagišani? (Mar. 6:34; Dit. 4:20; Baroma 15:2)