Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 34: Mohuta o Mofsa wa Dijo

Kgaolo 34: Mohuta o Mofsa wa Dijo

NA O a tseba gore ke eng seo batho ba ba se topago mo fase? Se swana le phoka goba šobane. Ke se sešweu e bile ke mafoforana a masesanyane. Eupša ga se šobane; ke selo se itšego seo se jewago.

Baisiraele ba kgoboketša manna

Go be go fetile mo e ka bago kgwedi feela ga e sa le Baisiraele ba tlogile Egipita. Ba be ba le lešokeng. Go be go sa mele dibjalo tše dintši tšeo di ka jewago moo, ka gona batho ba ile ba ngongorega ka gore: ‘Re duma ge nkabe Jehofa a ile a re bolaya kua Egipita. Ka gobane moo re be re na le dijo ka moka tšeo re bego re di nyaka.’

Ka gona Jehofa a re: ‘Ke tlo le nešetša dijo go tšwa magodimong.’ Se ke seo Jehofa a ilego a se dira. Mesong e latelago ge Baisiraele ba bona dilo tše tše ditšhweu tšeo di welego, ba ile ba botšišana ba re: “Ke eng tše?”

Moshe a re: ‘Tše ke dijo tšeo Jehofa a le neago tšona gore le di je.’ Setšhaba se ile sa di bitša MANNA. Tatso ya ona e be e le bjalo ka dinkgwa tše disesanyane tšeo di dirilwego ka todi ya dinose.

Moshe a re go setšhaba: ‘Yo mongwe le yo mongwe a tope ao a mo lekanego.’ Ka gona, se ke seo setšhaba se bego se se dira mesong e mengwe le e mengwe. Ke moka ge letšatši le fiša, manna ao a bego a šetše mo fase a be a tologa.

Moshe gape a re: ‘Go se be le yo a šadišago manna go fihlela letšatšing le le latelago.’ Eupša batho ba bangwe ba ile ba se theetše. Na o a tseba gore go be go direga eng? Mesong e latelago manna ao ba bego ba a šadišitše ba be ba hwetša a tletše diboko gomme a nkga.

Lega go le bjalo, go be go na le letšatši letee mo bekeng leo ka lona Jehofa a bego a boditše setšhaba gore se tope tekanyo yeo e lego gabedi ya manna. Letšatši leo e be e le la botshelela. E bile Jehofa o ile a botša setšhaba gore se boloke a mangwe a ona bakeng sa letšatši le le latelago, ka ge a be a ka se neše manna ka letšatši la bošupa. Ge setšhaba se be se a boloka go fihlela letšatšing la bošupa, a be a sa be le diboko e bile a sa nkge! Wo e bile mohlolo o mongwe!

Nywaga ka moka yeo Baisiraele ba e feditšego ba le lešokeng, Jehofa o ile a ba fepa ka manna.

Ekisodo 16:1-36; Numeri 11:7-9; Joshua 5:10-12.



Dipotšišo

  • Mo seswantšhong, dilo tše batho ba ba di topago mo fase ke eng, gomme di bitšwa eng?
  • Ke taelo efe yeo Moshe a ilego a e nea setšhaba mabapi le go topa manna?
  • Jehofa o ile a botša setšhaba gore se dire eng ka letšatši la botshelela, gona ka baka la’ng?
  • Ke mohlolo ofe woo Jehofa a bego a o dira ge manna a be a bolokwa go fihlela letšatšing la bošupa?
  • Jehofa o tšere nako e kaaka’ng a fepa setšhaba ka manna?

Dipotšišo tša tlaleletšo

  • Bala Ekisodo 16:1-36 le Numeri 11:7-9.

    Ekisodo 16:8 e bontšha’ng mabapi le go nyakega ga gore re hlomphe batho bao ba kgethilwego ka tsela ya pušo ya Modimo ka phuthegong ya Bokriste? (Baheb. 13:17)

    Ge Baisiraele ba be ba le lešokeng, ba ile ba gopotšwa bjang letšatši le letšatši mabapi le go nyakega ga gore ba ithekge ka Jehofa? (Ek. 16:14-16, 35; Doit. 8:2, 3)

    Jesu o ile a swantšha manna le eng, gomme re holwa bjang ke “senkgwa se se tšwago legodimong”? (Joh. 6:31-35, 40)

  • Bala Joshua 5:10-12.

    Baisiraele ba ile ba ja manna ka nywaga e mekae, se e ile ya ba teko bjang go bona, gomme re ka ithuta’ng pegong ye? (Ek. 16:35; Num. 11:4-6; 1 Bakor. 10:10, 11)