Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 53: Kholofetšo ya Jefeta

Kgaolo 53: Kholofetšo ya Jefeta
Morwedi wa Jefeta

NA O kile wa holofetša go dira selo se itšego gomme ka morago wa hwetša go le thata go se phetha? Monna yo a lego mo seswantšhong o dirile bjalo gomme ke ka baka leo a nyamilego kudu. Ke moahlodi wa Isiraele yo a nago le sebete yo a bitšwago Jefeta.

Jefeta o phetše mehleng ya ge Baisiraele ba be ba tlogetše go rapela Jehofa. Ba be ba dira dilo tše mpe gape. Ka gona Jehofa o ile a dumelela setšhaba sa Baamoni gore se ba tlaiše. Se se ile sa dira gore Baisiraele ba llele Jehofa ba re: ‘Re go senyeditše. Re phološe hle!’

Jefeta le banna ba gagwe

Baisiraele ba be ba itshola ka baka la dilo tše mpe tšeo ba di dirilego. Ba ile ba bontšha gore ba a itshola ka gore ba rapele Jehofa gape. Ka gona Jehofa o ile a ba thuša gape.

Setšhaba se ile sa kgetha Jefeta gore a lwe le Baamoni ba babe. Jefeta o be a tloga a nyaka gore Jehofa a mo thuše ntweng. Ka gona o ile a holofetša Jehofa a re: ‘Ge o ka dira gore ke fenye Baamoni, gona motho wa pele yo a tlago go tšwa ka ntlong ya ka a etla go nkgahlanetša ge ke boa ntweng, ke tla go nea yena.’

Jehofa o ile a theetša kholofetšo ya Jefeta gomme a mo thuša go fenya ntwa. Ge Jefeta a boa gae, na o a tseba gore ke mang wa pele yo a ilego a tšwa ka ntlong go tlo mo gahlanetša? Ke morwedi wa gagwe yoo e bego e le ngwana a nnoši wa gagwe. Jefeta o ile a lla ka gore: ‘Joo, morwedi wa ka! O nnyamišeditše eng. Ke holofeditše Jehofa selo se itšego gomme nka se ke ka lesa go se phetha.’

Ge morwedi wa Jefeta a ekwa ka kholofetšo yeo, mathomong le yena o ile a nyama. O ile a nyama ka gobane se se be se bolela gore o tlo tlogela tatagwe le bagwera ba gagwe. Eupša o be a tlo hlankela Jehofa bophelo bja gagwe ka moka taberenakeleng kua Shilo. Ka gona o ile a re go tatagwe: ‘Ge e ba o holofeditše Jehofa selo se itšego, o swanetše go se phetha.’

Ka gona morwedi wa Jefeta o ile a ya Shilo gomme a fetša bophelo bja gagwe ka moka a hlankela Jehofa taberenakeleng ya gagwe. Barwedi ba Baisiraele ba be ba mo etela moo ka matšatši a mane ngwageng o mongwe le o mongwe gomme ba thaba gotee le yena. Batho ba be ba rata morwedi wa Jefeta ka gobane e be e le mohlanka wa go loka wa Jehofa.

Baahlodi 10:6-18; 11:1-40.



Dipotšišo

  • Jefeta e be e le mang, gona o phetše neng?
  • Jefeta o ile a holofetša Jehofa eng?
  • Ke ka baka la’ng Jefeta a ile a nyama ge a be a boa ntweng ka morago ga gore a fenye Baamoni?
  • Morwedi wa Jefeta o ile a re’ng ge a be a ekwa ka kholofetšo ya tatagwe?
  • Ke ka baka la’ng batho ba be ba rata morwedi wa Jefeta?

Dipotšišo tša tlaleletšo

  • Bala Baahlodi 10:6-18.

    Ke temošo efe yeo re swanetšego go e ela hloko pegong ya Baisiraele ya go se botegele Jehofa? (Baa. 10:6, 15, 16; Baroma 15:4; Kut. 2:10)

  • Bala Baahlodi 11:1-11, 29-40.

    Re tseba bjang gore go neela ga Jefeta morwedi wa gagwe bjalo ka “sebego sa go fišwa” go be go sa bolele gore o ile a mo fiša mollong gore e be sehlabelo seo se dirwago ka motho? (Baa. 11:31; Lef. 16:24; Doit. 18:10, 12)

    Ke ka tsela efe Jefeta a ilego a neela morwedi wa gagwe bjalo ka sehlabelo?

    Re ka ithuta’ng tseleng yeo ka yona Jefeta a ilego a lebelela keno yeo a bego a e enetše Jehofa? (Baa. 11:35, 39; Mmo. 5:4, 5; Mat. 16:24)

    Morwedi wa Jefeta ke mohlala o mobotse bjang go bafsa ba Bakriste tabeng ya go phegelela tirelo ya nako e tletšego? (Baa. 11:36; Mat. 6:33; Bafil. 3:8)