Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 49: Letšatši la Ema

Kgaolo 49: Letšatši la Ema

BONA Joshua. O re: “Letšatši, ema!” Letšatši le ile la ema. La ema moo sebakabakeng letšatši ka moka. Jehofa o ile a dira gore seo se kgonege. Eupša anke re bone lebaka leo le dirilego gore Joshua a nyake gore letšatši le se ke la sobela.

Letšatši

Ge dikgoši tšela tše hlano tše mpe tša nageng ya Kanana di thoma go lwa le Bagibeoni, bona ba romela motho go Joshua gore a tle a ba thuše. A re: ‘Akgofela go rena o re hlakodiše! Dikgoši ka moka tša naga ya dithabeng di tlile go lwa le rena bahlanka ba gago.’

Gateetee Joshua a sepela le banna ba gagwe ka moka ba ntwa. Ba ile ba sepela bošego ka moka. Ge ba fihla Gibeoni, bahlabani ba dikgoši tšeo tše hlano ba boifa ke moka ba tšhaba. Bjale Jehofa a neša sefako se segolo go tšwa legodimong gomme sa bolaya bahlabani ba bantši go feta bao ba bolailwego ke banna ba Joshua ba ntwa.

Joshua

Joshua a bona gore letšatši le kgauswi le go sobela. Go be go tla swifala gomme bahlabani ba bantši ba dikgoši tšeo tše hlano tše mpe ba be ba tla tšhaba. Ke ka baka leo Joshua a ilego a rapela Jehofa a re: “Letšatši, ema!” Ke moka ge letšatši le eme, Baisiraele ba ile ba kgona go fenya ntwa yeo.

Go be go na le dikgoši tše dingwe tše dintši tše mpe Kanana tšeo di bego di hloile batho ba Modimo. Go ile gwa tšea Joshua le madira a gagwe mo e ka bago nywaga e tshelelago gore ba fenye dikgoši tše 31 tša Kanana. Ge dintwa di fedile, Joshua o ile a kgonthišetša gore naga ya Kanana e arolelwa meloko yeo e bego e sešo ya hwetša naga.

Go ile gwa feta nywaga e mentši gomme mafelelong Joshua a hwa a na le nywaga e 110. Ge yena le bagwera ba gagwe ba be ba sa phela, setšhaba se be se ekwa Jehofa. Eupša ge banna ba ba go loka ba hwile, setšhaba se ile sa thoma go dira dilo tše mpe gomme sa wela mathateng. Ge se be se le mathateng, ke gona moo se bego se nyaka thušo ya Modimo.

Joshua 10:6-15; 12:7-24; 14:1-5; Baahlodi 2:8-13.



Dipotšišo

  • Joshua o re’ng mo seswantšhong, gona ke ka baka la’ng?
  • Jehofa o ile a thuša bjang Joshua le banna ba gagwe ba ntwa?
  • Ke dikgoši tše kae tšeo Joshua a ilego a di fenya, gomme se se ile sa tšea nako e kaaka’ng?
  • Ke ka baka la’ng Joshua a ile a aroganya naga ya Kanana?
  • Joshua o ile a hwa a na le nywaga e mekae, gomme ka morago ga moo setšhaba se ile sa diragalelwa ke eng?

Dipotšišo tša tlaleletšo

  • Bala Joshua 10:6-15.

    Ka ge re tseba gore Jehofa o ile a emišetša Baisiraele letšatši le kgwedi, re na le kgodišego efe lehono? (Josh. 10:8, 10, 12, 13; Ps. 18:3; Die. 18:10)

  • Bala Joshua 12:7-24.

    Ke mang yoo ge e le gabotse re ka rego ke yena a fentšego dikgoši tše 31 tša Kanana, gomme ke ka baka la’ng se e le sa bohlokwa go rena lehono? (Josh. 12:7; 24:11-13; Doit. 31:8; Luka 21:9, 25-28)

  • Bala Joshua 14:1-5.

    Naga ya Kanana e ile ya arolelwa meloko ya Isiraele bjang, gona se se bontšha’ng ka bohwa bjoo re tlago go bo hwetša Paradeiseng? (Josh. 14:2; Jes. 65:21; Hesek. 47:21-23; 1 Bakor. 14:33)

  • Bala Baahlodi 2:8-13.

    Go swana le Joshua kua Isiraele, ke bomang bao lehono ba thibelago bohlanogi? (Baa. 2:8, 10, 11; Mat. 24:45-47; 2 Bathes. 2:3-6; Tito 1:7-9; Kut. 1:1; 2:1, 2)