Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 39: Lepara la Arone le Mela Matšoba

Kgaolo 39: Lepara la Arone le Mela Matšoba

BONA matšoba le dialmonte tše di butšwitšego tšeo di lego lepareng le. Lepara le ke la Arone. Matšoba a le dienywa tše di butšwitšego di metše lepareng la Arone ka bošego botee feela! Anke re bone lebaka la gore seo se direge.

Moshe o nea Arone lepara la go mela matšoba

Ga bjale e be e šetše e le nako e telele Baisiraele ba ralala lešokeng. Ba bangwe ba bona ba be ba nagana gore Moshe ga se a swanela go ba moetapele goba gore Arone ga se a swanela go ba moperisita yo mogolo. Kora e be e le yo mongwe wa batho bao ba bego ba nagana ka tsela yeo, le gona go be go le bjalo le ka Dathane, Abirama le baetapele ba bangwe ba 250 ba setšhaba. Ba ka moka ba ile ba tla go Moshe gomme ba re: ‘O re’ng o iphagamišetša rena ka moka?’

Moshe a re go Kora le balatedi ba gagwe: ‘Gosasa mesong le tšeeng dibjana tša go swara magala gomme le tsenye diorelo ka gare ga tšona. Ke moka le tle taberenakeleng ya Jehofa. Re tla bona motho yoo Jehofa a tlago go mo kgetha.’

Letšatšing le le latelago, Kora le balatedi ba gagwe ba 250 ba ile ba tla taberenakeleng. Gwa tla le batho ba bangwe ba bantši go tlo thekga banna ba. Jehofa o be a galefile kudu. Moshe a re: ‘Tlogang ditenteng tša banna ba ba kgopo. Le se ke la swara selo le ge e le sefe sa bona.’ Setšhaba sa theetša gomme sa tloga tenteng ya Kora, ya Dathane le ya Abirama.

Ke moka Moshe a re: ‘Le tla tseba motho yoo Jehofa a mo kgethilego ka se se latelago. Lefase le tla bulega gomme la metša banna ba ba kgopo.’

Gateetee ge Moshe a fetša go bolela, lefase la bulega. Tente ya Kora le dithoto tša gagwe, Dathane le Abirama gotee le bao ba bego ba na le bona ba sobelela gomme lefase la ba khupetša. Ge setšhaba se ekwa sello sa bao ba bego ba sobelela mmung, sa goeletša sa re: ‘A re tšhabeng! Mohlomongwe le rena lefase le tla re metša!’

Ka nako yeo, Kora le balatedi ba gagwe ba 250 ba be ba sa eme kgauswi le taberenakele. Ka gona Jehofa a romela mollo gomme wa ba fiša ka moka gabona. Ke moka Jehofa a botša Eleasara morwa wa Arone gore a tšee dibjana tša go swara magala tša banna bao ba hwilego gomme a dire diphaphathi tša go manega aletare. Diphaphathi tšeo e be e tla ba temošo go Baisiraele gore ga go na motho yo mongwe ka ntle le Arone le barwa ba gagwe yo a swanetšego go hlankela e le moperisita wa Jehofa.

Eupša Jehofa o ile a nyaka gore go be molaleng gore o be a kgethile Arone le barwa ba gagwe gore e be baperisita. Ka gona o ile a re go Moshe: ‘Botša moetapele wa lešika le lengwe le le lengwe la Isiraele gore a tliše lepara la gagwe. Lešikeng la Lefi, o botše Arone gore a tliše lepara la gagwe. Ke moka o bee le lengwe le le lengwe la mapara ao ka taberenakeleng pele ga areka ya kgwerano. Lepara la monna yoo ke mo kgethilego gore e be moperisita le tla mela matšoba.’

Mesong e latelago ge Moshe a lebelela mapara ao, o ile a hwetša gore lepara la Arone le metše matšoba ao o a bonago mo seswantšhong le dialmonte tše di butšwitšego. Ka gona, na o bona lebaka leo ka lona Jehofa a ilego a dira gore lepara la Arone le mele matšoba?

Numeri 16:1-49; 17:1-11; 26:10.



Dipotšišo

  • Ke bomang bao ba ilego ba hlanogela boetapele bja Moshe le Arone, gona ba ile ba re’ng go Moshe?
  • Moshe o ile a botša Kora le balatedi ba gagwe ba 250 gore ba dire eng?
  • Ke’ng seo Moshe a ilego a se botša setšhaba, gomme go ile gwa direga’ng gateetee ge a feditše go bolela?
  • Go ile gwa direga’ng ka Kora le balatedi ba gagwe ba 250?
  • Eleasara morwa wa Arone o ile a dira’ng ka dibjana tša go swara magala tša banna bao ba bego ba hwile, gona ka baka la’ng?
  • Ke ka baka la’ng Jehofa a ile a dira gore lepara la Arone le mele matšoba? (Lebelela seswantšho.)

Dipotšišo tša tlaleletšo

  • Bala Numeri 16:1-49.

    Kora le balatedi ba gagwe ba ile ba dira’ng, gomme ke ka baka la’ng seo e be e le go rabela go Jehofa? (Num. 16:9, 10, 18; Lef. 10:1, 2; Die. 11:2)

    Ke pono efe e fošagetšego yeo Kora le “dikgošana tša setšhaba” tše 250 ba ilego ba ba le yona? (Num. 16:1-3; Die. 15:33; Jes. 49:7)

  • Bala Numeri 17:1-11 le 26:10.

    Go mela matšoba ga lepara la Arone go be go bolela’ng, gona ke ka baka la’ng Jehofa a ile a laela gore le bewe ka arekeng? (Num. 17:5, 8, 10)

    Ke thuto efe ya bohlokwa yeo re ka ithutago yona go seo se bego se swantšhetšwa ke lepara la Arone? (Num. 17:10; Dit. 20:28; Bafil. 2:14; Baheb. 13:17)