Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

Lengwalo le le Tšwago go Sehlopha se Bušago

Lengwalo le le Tšwago go Sehlopha se Bušago

Badumedigotee le Rena ba ba Rategago:

Ka ge re le bahlanka ba Jehofa, re rata Lentšu la gagwe e lego Beibele. Re kgodišegile gore Beibele e re botša therešo, e re nea tlhahlo e botse gotee le bohlatse bjo bontši bja gore Jehofa o rata batho. (Psalme 119:105; Luka 1:3; 1 Johane 4:19) Re rata go thuša batho ba bangwe ka pelo ka moka gore le bona ba ithute ditherešo tše di holago tšeo di lego ka Lentšung la Modimo. Ka baka leo, re thabela go le nea puku ye yeo e nago le sehlogo se se rego, Ithute ka Dilo tša ka Beibeleng. E re re go botše ganyenyane ka puku ye.

Puku ye gabotse e ngwaletšwe bana. Lega go le bjalo, batho ba bagolo bao ba ratago go oketša tsebo ya bona ka Beibele le bona ba ka e bala. Le gona ka ge Beibele e le puku ya batho ka moka, ga go pelaelo gore ka moka ga rena re tla holwa ke go bala dithuto tša ka pukung ye tšeo di ka re thušago go hwetša lethabo la kgonthe.

Puku ye e theilwe dipegong tša ka Beibeleng. E re botša kamoo bophelo bo thomilego ka gona le go ya pele. Go dirilwe maiteko a magolo gore dipego tše tša ka Beibeleng di kwagale le go kwešišega gabonolo. E bile moo go kgonegago, go dirilwe maiteko a gore dipego tše di anegwe ka tatelano ya tšona.

Eupša puku ye ga e no re anegela ka dipego tša ka Beibeleng. Tsela yeo e ngwadilwego ka yona le diswantšho tša yona di phediša dipego tša Beibele. Go oketša moo, e re thuša go kwešiša kamoo batho bao go bolelwago ka bona ka Beibeleng ba bego ba ikwa ka gona.

Kgatišo ye e re thuša go bona gore Beibele ke puku yeo e bolelago ka batho ba go swana le rena—bao ba ilego ba kwa Jehofa le bao ba sa kago ba mo kwa. Le gona e re šušumeletša gore re ithute mehlaleng ya bona. (Baroma 15:4; 1 Bakorinthe 10:6) Puku ye e arotšwe ka dikarolo tše 14. Mathomong a karolo e nngwe le e nngwe,  go na le kakaretšo e kopana yeo e hlalosago tše dingwe tša dilo tšeo re ka ithutago tšona.

Ge e ba o le motswadi, o ka bala thuto e nngwe le e nngwe ya ka pukung ye o na le ngwana wa gago gomme la boledišana le ka diswantšho tša thutong yeo. Le gona balang Mangwalo ao thuto yeo e theilwego go ona. Thuša ngwana wa gago go bona kamoo Mangwalo ao a sepedišanago ka gona le thuto yeo le tla bego le e bala. Re ka diriša mokgwa o swanago ge re thuša motho yo mogolo gore a kwešiše ka boripana seo Beibele e se rutago.

Re holofela gore puku ye e tla thuša batho ka moka ba dipelo tše dibotse—ba banyenyane le ba bagolo—gore ba ithute dilo tše bohlokwa tšeo di lego ka Lentšung la Modimo le go diriša seo ba ithutilego sona. Seo se tla ba thuša gore le bona ba hlankele Jehofa e bile ba be karolo ya lapa la gagwe le le kgahlišago.

Bana babo lena,

Sehlopha se Bušago sa Dihlatse tša Jehofa