Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 THUTO 56

Josia o be a Rata Molao wa Modimo

Josia o be a Rata Molao wa Modimo

Josia o thomile go ba kgoši ya Juda a na le mengwaga e seswai. Ka nako yeo, batho ba be ba rapela medimo ya maaka e bile ba dira dilo tša boloi. Ge Josia a na le mengwaga e 16, o ile a ithuta ka seo Jehofa a se nyakago bathong ba gagwe. Ge a na le mengwaga e 20, o ile a thoma go fediša medimo ya maaka le dialetare tša yona nageng ka moka ya Juda. Ke moka ge a na le mengwaga e 26, a dira gore tempele ya Jehofa e lokišwe.

Ge tempele ya Jehofa e dutše e lokišwa, moperisita yo a phagamego e lego Hilikia o ile a hwetša puku ya Molao wa Jehofa ka moo tempeleng. Mohlomongwe puku yeo e be e le yeo e ngwadilwego ke Moshe ka letsogo la gagwe. Mongwaledi wa kgoši e lego Shafane o ile a iša puku yeo go Josia gomme a fihla a mmalela yona. Ge kgoši Josia a dutše a theeditše, o ile a lemoga gore ke kgale setšhaba se dira dilo tšeo Jehofa a di hloilego. Ke moka kgoši Josia a re go Hilikia: ‘Jehofa o re galefetše. Eya o bolele le yena. Jehofa o tla re botša seo re swanetšego go se dira.’ Jehofa o ile a araba Josia a diriša moporofeta wa mosadi e lego Huluda. O ile a re: ‘Setšhaba sa Juda se ntlogetše. Ke tlo se otla, eupša ke tlo se otla ge kgoši Josia a hwile, ka gobane yena o a nkwa ge ke bolela.’

Ge Kgoši Josia a kwele molaetša wo, a ya tempeleng gomme a kgoboketša setšhaba ka moka sa Juda. Ke moka a balela setšhaba ka moka Molao wa Jehofa. Josia le setšhaba ba tshepiša Jehofa gore ba tla mo kwa ka dipelo tša bona ka moka.

E be e le kgale setšhaba sa Juda se sa keteke Monyanya wa Paseka.  Eupša ge Josia a be a se balela Molao wa gore Paseka e swanetše go ketekwa ngwaga o mongwe le o mongwe, o ile a re go sona: ‘Re tlo direla Jehofa Monyanya wa Paseka.’ Ke moka Josia o ile a rulaganya gore go dirwe dihlabelo tše dintši. E bile o ile a rulaganya gore go be le batho ba go opela tempeleng. Ke moka setšhaba sa keteka Monyanya wa Paseka, gomme ka morago sa keteka Monyanya wa Dinkgwa tše di sa Omelwago ka matšatši a šupago. Ga se gwa ka gwa ba le monyanya o mogolo go swana le woo ga e sa le go tloga mehleng ya Samuele. Se se bontšha gore Josia o be a rata Molao wa Modimo kudu. Na le wena o rata go ithuta ka Jehofa?

“Lentšu la gago ke lebone dinaong tša ka, e bile ke seetša tseleng ya ka.”—Psalme 119:105