Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 48

Morwa wa Mohlologadi o Tsoga Bahung

Morwa wa Mohlologadi o Tsoga Bahung

Ge pula e be e sa ne kua Isiraele, Jehofa o ile a re go Eliya: ‘Eya motseng wa Tsarepata, gomme mosadi yo mongwe gona moo o tla go nea dijo.’ Ge Eliya a fihla kgorong ya motse woo, o ile a bona mohlologadi wa modiidi a topelela dikgong. Eliya o ile a kgopela meetse go mosadi yoo. Ge mosadi yoo a sa yo mo gela wona, Eliya o ile a mmitša gomme a re go yena: ‘Hle, o ntlišetše le senkgwanyana.’ Eupša mohlologadi yoo a re: ‘Ga ke na senkgwa seo nka go neago sona. Ke šetše ka bupi bjo bonyenyane le makhura a manyenyane. Ke tlo di šomiša go dira dijo tšeo di lekanago nna le morwa wa ka feela.’ Eliya a re go yena: ‘Jehofa o re ge o ka ntirela senkgwa, bupi bja gago le makhura di ka se ke tša fela go fihlela a neša pula.’

Ka gona mohlologadi yoo a ya gae gomme a direla moporofeta wa Jehofa senkgwa. Ka ge Jehofa a be a tshepišitše, mohlologadi yoo le morwa wa gagwe ba ile ba dula ba na le dijo nakong ya komelelo. Bupi bja gagwe le makhura ga se tša ka tša fela.

Ka morago ga moo, go ile gwa direga selo se sengwe sa go kweša bohloko. Morwa wa mohlologadi yoo o ile a babja kudu gomme a hwa. Mohlologadi yoo o ile a llela Eliya gore a mo thuše. Eliya o ile a tšea mošemanyana yoo diatleng tša  mmagwe gomme a mo iša phapošing ya ka godimo. O ile a mmea mpeteng gomme a rapela a re: ‘Jehofa, hle anke ngwana yo a boele a phele.’ Na o a tseba gore ke ka baka la eng Jehofa a be a tlo thabela go tsoša ngwana yoo bahung? Ke ka gobane go be go se na motho yo re tsebago a ile a tsoga bahung ka nako yeo. Lebaka le lengwe ke gore mohlologadi yo le morwa wa gagwe e be e se Baisiraele.

Mošemanyana yoo o ile a boela a phela! Ke moka Eliya a re go mmagwe: “Bona! Morwa wa gago o a phela.” Mohlologadi yoo o ile a thaba kudu gomme a re go Eliya: ‘Bjale ke a tseba gore o monna wa Modimo. Ke tseba seo ka gobane o bolela feela dilo tšeo Jehofa a go botšago tšona, e bile dilo tšeo o di bolelago di a direga.’

“Elang hloko magokobu. Ga a bjale peu goba go buna; ga a na leobo goba ntlo ya polokelo. Fela Modimo o a a fepa. Na lena ga le bohlokwa kudu go feta dinonyana?”​—Luka 12:24