Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 THUTO 44

Tempele ya Jehofa

Tempele ya Jehofa

Ka morago ga gore Solomone e be kgoši ya Isiraele, Jehofa o ile a mmotšiša a re: ‘O ka rata gore ke go nee eng?’ Solomone a re: ‘Ke sa le mofsa, e bile ga ke tsebe selo. Hle, nnee bohlale gore ke tle ke kgone go hlokomela batho ba gago.’ Jehofa a re: ‘Ka ge o kgopetše gore ke go nee bohlale, ke tlo dira gore o be bohlale go feta batho ka moka mo lefaseng. E bile ke tlo dira gore o be mohumi. Le gona ge o ka dula o nkwa, o tla phela nako e telele.’

Solomone o ile a thoma go agela Jehofa tempele. O ile a e aga ka gauta e botsebotse, silifera, dikota le maswika. Tempele yeo e ile ya agwa ke banna ba bantši le basadi bao ba nago le bokgoni. E agilwe ka mengwaga e šupago. Ge tempele yeo e feditšwe go agwa, Baisiraele ba ile ba e neela go Jehofa. E be e na le aletare, gomme godimo ga aletare yeo go beilwe dihlabelo. Solomone o ile a khunama pele ga aletare yeo gomme a rapela a re: ‘Wena Jehofa, tempele ye ga e go lekane, e bile ga se e botse ka mokgwa wo o bego o ka rata gore e be ka gona, eupša hle re amogele gomme o kwe le dithapelo tša rena.’ Jehofa o ile a ikwa bjang ka tempele yeo le thapelo ya Solomone? Gateetee ge Solomone a feditše go rapela, Jehofa o ile a romela mollo go tšwa legodimong gomme wa tšhuma sehlabelo seo se bego se le aletareng. Jehofa o ile a amogela tempele yeo. Ge Baisiraele ba bona mollo woo, ba thaba kudu.

Kgoši Solomone o ile a tuma ka bohlale bja gagwe. Batho ba be ba etla go yena gore a ba rarollele mathata a bona. Gaešita le kgošigadi ya kua Sheba e ile ya tla go Solomone gore e tlo mmotšiša dipotšišo tše thata. Ge kgošigadi yeo e ekwa dikarabo tša Solomone, e ile ya re: ‘Ke be ke sa kgolwe seo batho ba bego ba mpotša sona ka wena, eupša gona bjale ke a bona gore o bohlale kudu. E bile tšeo ba mpoditšego tšona ga se selo. Jehofa Modimo wa gago o go šegofaditše.’ Ge go be go buša kgoši Solomone, Baisiraele ba be ba phela ka khutšo le ka lethabo. Eupša dilo di be di le kgauswi le go fetoga.

“Ke re yo a fetago Solomone ka bogolo o gona mo.”​—Mateo 12:42