Moshe o be a eteletše pele setšhaba sa Isiraele ka mengwaga e mentši, gomme ga bjale o be a le kgauswi le go hwa. Jehofa o ile a re go yena: ‘Ga se wena o tlago go tsenya Baisiraele Nageng ya Kholofetšo. Eupša ke tla go dumelela gore o bone naga yeo.’ Ke moka Moshe a kgopela Jehofa gore a kgethele Baisiraele moetapele yo mongwe. Jehofa a re go yena: ‘Sepela o yo botša Joshua gore ke kgethile yena gore e be moetapele.’

Moshe a botša Baisiraele gore o kgauswi le go hwa le gore Jehofa o kgethile Joshua gore a ba etelele pele go tsena Nageng ya Kholofetšo. Ke moka Moshe a re go Joshua: ‘O se ke wa tšhoga. Jehofa o tla go thuša.’ Ka moragonyana ga moo, Moshe a rotogela Thabeng ya Nebo gomme Jehofa a mmontšha naga yeo a e tshepišitšego Aborahama, Isaka le Jakobo. Moshe o hwile a na le mengwaga e 120.

Jehofa a re go Joshua: ‘Tshela Noka ya Jorodane gomme o tsene nageng ya Kanana. Ke tla go thuša, go swana le ge ke thušitše Moshe. Wena o bale Molao wa ka letšatši le lengwe le le lengwe. O se ke wa tšhoga. Eba le sebete. Sepela gomme o dire dilo ka moka tšeo ke go laetšego tšona.’

 Joshua a romela banna ba babedi gore ba yo hlola motse wa Jeriko. Kgaolong e latelago, re tlo ithuta seo se ilego sa direga ge ba le moo. Ge banna bao ba boa, ba ile ba botša Joshua gore nako e fihlile ya gore Baisiraele ba tšee naga ya Kanana. Letšatšing le le latelago, Joshua o ile a botša Baisiraele gore ba itokišeletše go tsena Kanana. Ke moka a roma baperisita bao ba bego ba rwele areka ya kgwerano gore ba ete setšhaba pele go ya Nokeng ya Jorodane. Noka ya Jorodane e be e tletše kudu. Eupša gateetee ge dinao tša baperisita bao di gata noka yeo, meetse a yona a ile a ema! Baperisita bao ba ile ba tsena ka nokeng gomme ba fihla ba ema gare ga yona, ke moka setšhaba sa kgona go tshela. Na ga o nagane gore mohlolo wo o ile wa gopotša Baisiraele seo Jehofa a ilego a se dira Lewatleng le Lehwibidu?

Ka ge Baisiraele ba be ba feditše mengwaga e mentši ba sepela, gona bjale ba be ba fihlile Nageng ya Kholofetšo. Ga bjale ba be ba ka kgona go aga dintlo le go ba le metse. Le gona ba be ba ka kgona go lema mašemo, go bjala diterebe le dienywa tše dingwe. E be e le naga e botse kudu.

“Jehofa o tla le hlahla ka mehla, a kgotsofatša moya wa lena nageng e omilego.”​—Jesaya 58:11