Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 38

Jehofa o Ile a Nea Simisone Matla a Magolo

Jehofa o Ile a Nea Simisone Matla a Magolo

Baisiraele ba bantši ba ile ba boela ba rapela medimo ya maaka. Ka gona Jehofa a tlogela Bafilisita gore ba ba tshwenye. Eupša go be go na le Baisiraele ba bangwe bao ba bego ba rata Jehofa. Yo mongwe wa bona e be e le monna yo a bitšwago Manoa. Manoa le mosadi wa gagwe ba be ba se na bana. Ka letšatši le lengwe, Jehofa o ile a romela morongwa go mosadi wa Manoa. Morongwa yoo o ile a re go yena: ‘Tseba gore o tlo belega ngwana wa mošemane. Ngwana yoo o tlo hlakodiša Baisiraele go Bafilisita. E tla ba Monasari.’ Na o a tseba gore Banasari e be e le bomang? E be e le batho bao ba bego ba šomela Jehofa ka tsela e kgethegilego. Jehofa o be a sa dumelele Banasari gore ba kote meriri ya bona.

Ge nako e dutše e eya, Manoa le mosadi wa gagwe ba ile ba ba le ngwana. Ba ile ba mo rea leina ba re ke Simisone. Ge Simisone a gotše, Jehofa o ile a mo nea matla a magolo. O be a kgona go bolaya tau ka matsogo feela. Nakong e nngwe, o ile a bolaya Bafilisita ba 30 a nnoši. Bafilisita ba be ba mo hloile gomme ba nyaka go mmolaya. Bošegong bjo bongwe ge a be a robetše motseng wa Gatsa, Bafilisita ba ile ba mo lalela kgorong ya motse woo gore ba kgone go mmolaya mesong. Eupša gare ga bošego, Simisone o ile a tsoga, a ya kgorong ya motse gomme a tumola mejako ya wona lebotong. O ile a rwala mejako yeo magetleng gomme a rotogela godimo ga thaba ya kgauswi le Heburone!

Ka morago ga moo, Bafilisita ba ile ba ya go Delila, e lego kgarebe yeo e bego e ratana le Simisone, gomme ba re go yona: ‘Botšiša Simisone gore matla a gagwe a tšwa kae, gomme re tla go nea tšhelete e ntši kudu. Re nyaka go mo swara gomme re mo lahlele kgolegong.’ Ka ge Delila a be a nyaka tšhelete yeo, o ile a dumela go ba thuša. Mathomong, Simisone o ile a gana go botša Delila gore matla a gagwe a tšwa kae. Eupša ka ge Delila a be a mmotšiša gantšintši, Simisone o ile a mmotša gore matla a gagwe a tšwa kae. O ile a re: ‘Ga sa nka ka kotwa moriri ka gobane ke Monasari. Ge moriri wa ka o ka kotwa, nka se sa ba le matla.’ Simisone o dirile phošo e kgolo ka go botša Delila taba yeo, na ga go bjalo?

Gateetee Delila o ile a botša Bafilisita a re: ‘Ke tseba moo matla a Simisone a tšwago gona.’ Delila o ile a robatša Simisone diropeng tša  gagwe, ke moka a bitša motho gore a kote moriri wa Simisone. Delila o ile a goeletša a re: ‘Simisone, Bafilisita ba a go swara!’ Simisone a tsoga, gomme a hwetša gore matla a gagwe a fedile. Ke moka Bafilisita ba mo swara, ba mo tlema gomme ba mo lahlela kgolegong.

Ka letšatši le lengwe, Bafilisita ba bantši ba ile ba kgobokana ka tempeleng ya modimo wa bona e lego Dagoni, ba goeletša ba re: ‘Dagoni modimo wa rena o re thušitše go swara Simisone! Tlišang Simisone mo a tle a re tloše bodutu!’ Ka gona ba mo emiša magareng ga dikokwane tše pedi tšeo di bego di thekgile tempele yeo, gomme ba mo kwera. Ke moka Simisone a goeletša a re: ‘Hle Jehofa, mphe matla la mafelelo.’ Ka nako yeo, moriri wa Simisone o be o metše gomme e le o motelele. O ile a kgorometša dikokwane tša tempele yeo ka matla a gagwe ka moka. Tempele yeo e ile ya wa, gomme batho ka moka bao ba bego ba le ka go yona ba hwa. Simisone le yena a hwa.

“Dilong tšohle ke na le matla ka baka la yo a mphago matla.”​—Bafilipi 4:13