Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 27

Ba Ile ba Fetoga Marabele

Ba Ile ba Fetoga Marabele

Ka morago ga nako e itšego Baisiraele ba le lešokeng, Kora, Dathane, Abirama le batho ba bangwe ba 250 ba ile ba gana go kwa Moshe. Ba ile ba re go yena: ‘O re lapišitše! Ga se wa swanela go ba moetapele wa rena, e bile Arone ga se a swanela go ba moperisita yo a phagamego. Jehofa o na le rena ka moka, e sego wena le Arone feela.’ Jehofa o ile a galefišwa ke seo. O ile a bona banna bao ba sa kwe yena!

Moshe o ile a botša Kora le batho bao ba bego ba mo thekga a re: ‘Gosasa le tleng taberenakeleng. Le tle le dibjana tša lena tša go swara magala le bee diorelo godimo ga tšona. Jehofa o tla re bontšha yo a mo kgethilego.’

Letšatšing le le latelago, Kora le banna ba bangwe ba 250 ba ya go kopana le Moshe taberenakeleng. Ge ba le moo, ba ile ba itira baperisita gomme ba fiša diorelo. Ke moka Jehofa a re go Moshe le Arone: ‘Tlogang gare ga Kora le banna ba gagwe.’

Le ge Kora a be a ile go Moshe kua taberenakeleng, Dathane, Abirama le malapa a bona ba ile ba gana go ya moo. Jehofa o ile a botša Baisiraele gore ba tloge tenteng ya Kora, ya Dathane le ya Abirama. Baisiraele ba ile ba tloga ka yona nako yeo. Dathane, Abirama le malapa a bona ba be ba eme ka ntle ga ditente tša bona. Gateetee lefase la ahlama gomme la ba  metša! Kua taberenakeleng, mollo o ile wa theoga legodimong gomme wa fiša Kora le banna ba gagwe ba 250.

Ke moka Jehofa a re go Moshe: ‘Tšea mapara a baetapele ba moloko o mongwe le o mongwe wa Isiraele, gomme lepareng la moetapele yo mongwe le yo mongwe o ngwale leina la gagwe. Eupša lepareng la moetapele wa moloko wa Lefi, o ngwale leina la Arone. O bee mapara ao ka taberenakeleng, gomme lepara la monna yo ke tlago go mo kgetha le tla mela matšoba.’

Letšatšing le le latelago, Moshe o ile a tliša mapara ale ka moka gomme a a bontšha baetapele ba meloko ya Isiraele. Lepara la Arone le be le metše matšoba e bile le na le dienywa tše di butšwitšego. Ka go dira bjalo, Jehofa o ile a bontšha Baisiraele gore o be a kgethile Arone gore e be moperisita yo a phagamego.

“Kwang bao ba etelelago pele gare ga lena gomme le ikokobetše.”​—Baheberu 13:17