Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 21

Kotlo ya Lesome

Kotlo ya Lesome

Moshe o ile a botša Farao gore ba ka se sa bonana gape. Eupša pele ga ge Moshe a ka tloga, o ile a re go Farao: ‘Gare ga bošego, ngwana yo mongwe le yo mongwe wa mathomo mo Egipita, go thoma ka morwa wa gago go fihla ka barwa ba makgoba a gago, ba tlo hwa.’

Jehofa o ile a botša Baisiraele gore ba je dijo tšeo ba bego ba sa di tlwaela. O ile a re: ‘Lapa le lengwe le le lengwe le bolaye nku yeo e nago le ngwaga o tee goba pudi, gomme le tšee a mangwe a madi a yona le a tlotše diforeimeng tša mabati a ntlo ya lona. Le beše nama ya yona, gomme le e je ka dinkgwa tše di sa omelwago. Le je le apere diaparo tša lena le dieta, le itokišeleditše go sepela. Bošegong bjo ke le ntšha Egipita.’ Na o kgona go bona kamoo Baisiraele ba bego ba thabile ka gona?

Gare ga bošego, morongwa wa Jehofa o ile a ya ntlong e nngwe le e nngwe ya kua Egipita. Morongwa yoo o ile a bolaya bana ba mathomo bao mabati a dintlo tša gabo bona a bego a sa tlotšwa madi. Eupša morongwa yoo o ile a feta dintlo tšeo mabati a tšona a bego a tloditšwe madi. Baegipita ka moka, ba bahumi le ba badiidi, ba ile ba hwelwa ke bana. Eupša ga go le o tee wa bana Baisiraele yo a ilego a hwa.

Ngwana wa Farao le yena o ile a hwa. Farao o ile a kwa bohloko kudu, gomme gateetee a botša Moshe le Arone a re: ‘Tsogang le tloge mo nageng ya ka. Sepelang le yo hlankela Modimo wa lena. Tšeang le diruiwa tša lena le sepele!’

Ka ge e be e le bošego, Baisiraele ba ile ba tšwa Egipita ka malapa le meloko ya bona ba  bonegetšwe ke ngwedi. Gare ga bona go be go na le banna ba 600 000 le basadi ba bantši le bana. Le gona batho ba bangwe ba ile ba tloga le Baisiraele Egipita, gore le bona ba yo hlankela Jehofa. Ka ge e be e le kgale Baisiraele ba hlaka kua Egipita, mafelelong ba be ba lokologile!

Ngwaga o mongwe le o mongwe, Baisiraele ba be ba tlo swanelwa ke go ja dijo tšeo ba di jelego bošegong bjo, gore ba gopole kamoo Jehofa a ba phološitšego Egipita ka gona. Tiragalo yeo e be e bitšwa Paseka.

“Ke ka lona lebaka le ke go dumeletšego gore o dule o le gona, gore ke bontšhe matla a ka mabapi le wena le gore leina la ka le bolelwe lefaseng lohle.”​—Baroma 9:17