Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 12

Jakobo o Ile a Hwetša Lefa

Jakobo o Ile a Hwetša Lefa

Isaka o be a na le mengwaga e 40 ge a be a nyala Rebeka. O be a mo rata kudu. Ge nako e dutše e eya, ba ile ba ba le bana ba babedi ba bašemane. Bana bao ba belegwe ka nako e tee.

Ngwana wa mathomo e be e le Esau, gomme wa bobedi e le Jakobo. Esau o be a rata go hlwa nageng, e bile a kgona go tsoma diphoofolo. Eupša Jakobo o be a rata go dula ka gae.

Mehleng yeo, ngwana wa mathomo o be a newa naga e kgolo le tšhelete e ntši ge tatagwe a hwile. Dilo tšeo di be di bitšwa lefa. Lapeng la Isaka, lefa leo le be le akaretša go dirišwa ke Jehofa go phethagatša tše dingwe tša dilo tšeo Jehofa a bego a di tshepišitše Aborahama. Esau o be a se na taba le ditshepišo tšeo, eupša Jakobo o be a tseba gore di bohlokwa kudu.

Ka letšatši le lengwe, Esau o ile a boa gae a lapile kudu ka gobane o be a ile go yo tsoma diphoofolo. O ile a kwa dijo tšeo Jakobo a bego a di apeile di nkga bose gomme a re go yena: ‘Ke bolawa ke tlala! Nnee dinawa tšeo tše dihwibidu ke je!’ Jakobo a re: ‘Ke tla go nea tšona, eupša thoma pele ka go ntshepiša gore o tla nnea lefa la gago.’ Esau a re: ‘Ga ke na taba le lefa la ka! O ka na wa le tšea. Mphe dijo tšeo hle!’ Na o nagana gore seo Esau a se dirilego se be se nepagetše? Aowa. Esau o lahlile selo sa bohlokwa kudu, feela ka gobane a be a swerwe ke tlala.

Ge Isaka a tšofetše, go ile gwa fihla nako ya gore a šegofatše ngwana wa gagwe wa  mathomo e lego Esau. Eupša Rebeka o ile a dira gore Isaka a šegofatše Jakobo, le ge Jakobo e be e le ngwana wa bona wa bobedi. Ge Esau a tsebile gore Isaka o šegofaditše Jakobo, o ile a galefa kudu gomme a nyaka go bolaya ngwana wa gabo e lego Jakobo. Isaka le Rebeka ba ile ba šireletša Jakobo, ba re go yena: ‘Sepela o yo dula le buti wa mmago e lego Labane, go fihlela Esau a tlogela go galefa.’ Jakobo o ile a theetša batswadi ba gagwe gomme a tšhaba.

“Go hola’ng gore motho a rue lefase ka moka gomme a lobe moya wa gagwe? Ruri motho a ka ananya moya wa gagwe ka go nea eng?”​—Mareka 8:36, 37