Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 THUTO 102

Johane o Bontšhwa Dipono

Johane o Bontšhwa Dipono

Ge moapostola Johane a be a golegilwe sehlakahlakeng sa Patimo, Jesu o ile a mmontšha dipono tše 16 tše di latelelanago, goba dilo tšeo di bego di tlo direga nakong e tlago. Dipono tšeo di be di bontšha kamoo leina la Jehofa le bego le tlo kgethagatšwa ka gona, kamoo Mmušo wa gagwe o bego o tla tla ka gona le kamoo thato ya gagwe e bego e tlo direga ka gona mo lefaseng go swana le ge e direga legodimong.

Ponong e nngwe, Johane o ile a bona Jehofa a dutše sedulong sa gagwe se se phadimago sa bogoši legodimong, a dikologilwe ke bagolo ba 24 bao ba aperego diaparo tše ditšhweu gomme ba rwele mefapahlogo ya gauta dihlogong tša bona. Sedulong seo sa bogoši go be go etšwa magadima le medumo. Bagolo ba 24 ba be ba khunamela Jehofa gomme ba mo rapela. Ponong e nngwe, Johane o ile a bona lešaba le legolo le rapela Jehofa. Lešaba leo e be e le la batho bao ba tšwago ditšhabeng tšohle, merafong yohle le malemeng ohle. Kwana, e lego Jesu, o be a eteletše pele lešaba leo gomme a le iša meetseng a bophelo. Ka morago, ponong e nngwe, Johane o ile a bona Jesu a thoma go buša e le Kgoši legodimong a na le bagolo ba 24. Ponong e latelago, Johane o ile a bona Jesu a elwa le Sathane, yoo e lego  drakone, gotee le batemona ba gagwe. O ile a bona Jesu a ba raka legodimong, gomme a ba lahlela lefaseng.

Ka morago, Johane o ile a bona pono e kgahlišago ya mabapi le Kwana le batho ba 144 000 ba eme Thabeng ya Tsione. Le gona o ile a bona morongwa a fofa lefaseng ka moka. Morongwa yoo o be a botša batho gore ba hlankele Modimo le go mo tumiša.

Ponong e latelago yeo, Johane o ile a bona ntwa ya Haramagedone. Ntweng yeo, Jesu le mašole a gagwe ba fenya Sathane le batho ba babe. Ponong ya mafelelo, Johane o ile a bona go na le khutšo legodimong le lefaseng. O ile a bona Sathane le batho bao ba mo latelago ba fedišwa. Ka morago ga moo, o ile a bona yo mongwe le yo mongwe legodimong le lefaseng a kgethagatša leina la Jehofa e bile a rapela yena feela.

“Ke tla tsoša bonaba magareng ga gago le mosadi le magareng ga peu ya gago le peu ya gagwe. E tla go pšhatla hlogo gomme wena wa e loma serethe.”—Genesi 3:15